حكاية ” غيرة “
ميادة :يعنى راجل حاسس انه لوحده لا مهم عندك ولا فارقلك وسيباله فراغ كبير فى حياته هيعمل ايه هيزرعه نعناع اكيد هيملاه بواحدة تانية
مروة بخضة :ايه واحدة تانية تاخد مكانى
ميادة :مكانك انتى مش وخداه مكانك انتى سيباه فاضى يا مروة ومفكرة انك كده تقيلة ومخلياه زى الخاتم فى صباعك بسبب كلام شوية بنات فاضية فى عيلتك مفهمينك انك كل ما تديله على دماغه هيحبك كل ما هتهمليه هيهتم بيكى
والحقيقة انك كل ما تديله على دماغه هيديكى هو بالقفا وهيسيبك وكل ما هتهمليه هيبقى صيدة سهلة اوى لاى واحدة تهتم بيه وتكتشفى انك وقت ما كنتى مفكرة انك بتحافظى عليه طلعتى بتضيعيه من ايدك وبتخسريه
مروة :انا مش عايزة اخسره انا بحبه
ميادة :قوليله هو انك بتحبيه متقوليليش انا
كمان يا ريت لو تقطعى مع بنات عمك علشان بالامانة نصايحهم كلها بلح وتلبس فى حيط
مروة :اقطع معاهم
ميادة وهى بتضحك :لا مينفعش انتو مهما كان اهل
بس بطلى تسمعيلهم هما مش انتى وكل واحدة فيهم ليها دماغها وشخصيتها متلغيش انتى شخصيتك وتمشى وراهم عميانى كده..موبايلى بيرن ده ماجد اخويا
مروة :خلاص يا حبيبتى انا هقفل وردى عليه مع السلامة
ميادة :مع السلامة..الو يا ميجو اخبارك ايه يا قلبى
ماجد :زى الفل يا حبيبتى انتى عاملة ايه وجوزك عامل معاكى ايه اوعى يكون مزعلك
ميادة :لا يا حبيبى خالص اسلام مش مزعلنى المهم انت وحشتنى اوى
ماجد :وانتى كمان وحشتينى اوى انا قريب منك فقولت اجى اتغدى معاكى انتى فى البيت صح
ميادة :ولو مش فى البيت ابقى فى البيت علشان خاطر عيون ماجد باشا
تعالى يا حبيبى اهو اتغدى معاك بدل ما اتغدى لوحدى
ماجد :وتتغدى لوحدك ليه اسلام فين ان شاء الله وسايبك تاكلى لوحدك
ميادة :اسلام عزال صاحبه النهاردة وانت عارف بيبقى فيه اكل فهياكل مع اصحابه
ماجد :احسن اهو نبقى انا وانتى بس
خلاص انا نص ساعة وابقى عندك
ميادة :ماشى يا عمرى مستنياك
بعد ساعتين
ميادة :عجبك الاكل
ماجد بابتسامة :عجبنى جدا طعم الاكل من ايدك وحشنى واللى وحشنى اكتر مج النسكافيه العظمة اللى بتعملهولى محدش غيرك بيعملى نسكافيه بالحلاوة دى كل ما اعمل لنفسى نسكافيه وميعجبنيش احسبن على اسلام جوزك
ميادة وهى بتضحك :واسلام ذنبه ايه
ماجد :مش هو اللى اتجوزك وحرمنى منك ومن النسكافيه بتاعك
وحشتينى اوى يا ميادة اوى البيت ملوش طعم من غيرك
ميادة وهى بتحضنه :يا حبيبى بكرة تتعود وبعدين مش كده احسن اترحمت منى ومن انى كنت بسرق السويتشيرتات بتوعك
ماجد وهو بيضحك :ارجعى واسرقيهم براحتك
اسلام :السلام عليكم اخبارك ايه يا ماجد
ماجد :الحمد لله
ميادة وهى بتشرب من مج النسكافيه :تحب احطلك الغدا
اسلام :لا اتغديت بره
ميادة :اعملك حاجة تشربها طيب
اسلام وهو بيمسك ايديها بالمج اللى فى ايديها وبيشرب منه :حلو النسكافيه بتاعك اعمليلى نسكافيه انا كمان
بعد اذنك يا ابو نسب هغير هدومى وارجعلك منورنا
ماجد :البيت منور بميادة
اسلام وهو بيدخل اوضة النوم :معاك حق طبعا
ماجد :جوزك ده مستفز ..ميادة انتى روحتى فين
ميادة وهى بتفوق من سرحانها :ها..بتقول حاجة يا ماجد
ماجد :بقولك جوزك ده مستفز
يعنى ايه لازمتها الحركة الهندى القارعة دى قدامى ما يستنى اما امشى لازم يحرق دمى يعنى
ميادة :مش قصده اكيد
ماجد :لا قصده انا راجل والراجل بيفهم الراجل اللى زيه
ميادة :تعالى طيب اقف معايا فى المطبخ وانا بعمله النسكافيه
ماجد :لا انا همشى اندهيهولى اسلم عليه قبل ما امشى
ميادة :ليه بس ما انت قاعد معايا
ماجد :هجيلك تانى يا حبيبتى
بعد نص ساعة
ميادة :كنت عايزة اسالك سؤال يا اسلام
اسلام :سؤال ايه ده
ميادة :الحركة الى عملتها من شوية دى لما دوقت النسكافيه بتاعى انت عملتها ليه
اسلام :عادى يعنى كنت عايزك تعمليلى نسكافيه
ميادة :وعلشان تخلينى اعملك نسكافيه تدوق من بتاعى وكمان تمسك المج بايديا اللى مسكاه
اسلام :حركة عادية
ميادة :لا مش حركة عادية انا اتكسفت جدا
اسلام :علشان ماجد اخوكى كان قاعد صح
تتكسفى انى امسك ايدك قدامه انما متتكسفيش انك تحضنيه قدامى
ميادة :وانا هتكسف ليه ده اخويا ومش بس اخويا ده تؤامى
اسلام :وانا جوزك فين المشكلة لما امسك ايدك قدام اخوكى
ميادة :مفيش مشكلة انا بس استغربت انت عمرك ما عملت كده قبل كده
اسلام :وادينى عملت
ميادة :هو انت عملت كده علشان تضايق ماجد
اسلام :وهو ايه اللى يضايق اخوكى التؤام فى ان جوزك يمسك ايدك بقولك ايه حطيلى اكل
ميادة :سالتك من شوية وقولت مش جعان
اسلام :مكنتش جعان ودلوقتى جوعت
ميادة :خلاص حاضر هقوم احطلك تاكل
بعد اسبوع
اسلام :هو ايه اللى مش لاقية حاجة البسها اومال كل هدومك دى ايه
ميادة :مش لاقية فيهم حاجة مناسبة
اسلام :حاجة مناسبة لايه هو انتى رايحة تناقشى الدكتوراة ده انتى جاية معايا فرح صاحبى ما تلبسى اى فستان من فساتينك يا ميادة
ميادة :بص..
اسلام قاطعها :بصى انتى قدامك عشر دقايق مفيش غيرهم تنطى فى اى فستان من فساتينك دى وتنجزى والا هروح من غيرك
ميادة بسرعة :لا تروح من غيرى ايه خلاص حاضر هلبس بسرعة
ايه رايك فى الفستان ده
اسلام :حلو البنى البسيه
ميادة :بنى ايه ده هافان
اسلام :اسيب انا فرح صاحبى واقعد معاكى تدينى درس فى اسماء الالوان
ميادة العشر دقايق بقو تمنية وانتى لسه بالبيجامة
ميادة :لا خلاص هلبس بسرعة
بعد تلت ساعات
ميادة :مش هتاكل معايا
اسلام :لا انا هنام مش قادر تصبحى على خير
ميادة :وانت من اهله ايه ده موبايلى بيرن الو يا ماجد عامل ايه يا حبيبى
ماجد :انا كويس انتى عاملة ايه
ميادة :كويسة كنت فى فرح ولسه راجعة وبعمل لنفسى سندويتشات انت عارف مبعرفش اكل فى افراح
ماجد :اه ما انا عارف انك كنتى فى فرح شوفت الصور اللى منزلاها فى حالاتك على الواتس
ميادة وهى بتاكل :بجد شوفتهم طيب ايه رايك فيهم حلوين عجبك فستانى يا ميجو
ماجد :حلوين اه
شكلك فرحان وانتى مع اسلام ميادة هو انتى بتحبيه
ميادة :انا..
ماجد قاطعها :اوعى يا ميادة تحبيه اكتر منى اوعى
ميادة :متخافش انا مش ممكن احب اى راجل فى الدنيا اكتر منك
ماجد :ولا حتى اسلام
ميادة :ولا حتى اسلام
ماجد :طمنتينى فستانك حلو اوى
ميادة :عجبك حلو عليا
ماجد :حلو لان انتى اللى لابساه انتى اللى بتحلى اللبس يا ميدا
بعد يومين
ميادة :اسلام انت كويس
اسلام :اه
ميادة :متاكد اصلك بقالك يومين غريب
اسلام :غريب ازاى يعنى
ميادة :كلامك معايا قل اوى
اسلام :وانا قبل كده كنت بتكلم معاكى كتير وبقولك نكت ما انا طول عمرى كلامى قليل
ميادة :اهو كلامك القليل ده قل اكتر انت تكاد تكون مبتتكلمش معايا هو انت زعلان منى
اسلام :هو انتى عملتى حاجة تزعل
ميادة :لا وعلشان كده بسالك
اسلام :مادام شايفة انك معملتيش حاجة تزعل يبقى انتى معملتيش
وانا عادى يمكن بس مضغوط فى شغلى شوية اليومين دول
ميادة :متاكد
اسلام :اه متاكد
بعد اربع ايام
ميادة وهى بتفتح الباب :ايه ده مروة مالك بتعيطى ليه
مروة وهى بتحضنها :عادل سابنى يا ميادة فسخ خطوبتنا امبارح كان عندك حق لما قولتيلى انى كده بضيعه من ايدى مش بحافظ عليه يا ريتنى سمعت كلامك يا ريتنى ما سمعت كلام بنات عمى
ميادة :اهدى بس وتعالى نقعد واحكيلى حصل ايه
مروة :جالنا امبارح وقالى انه مش هيقدر يكمل معايا اتخضيت وقولتله انى مقدرش اعيش من غيره قالى والله بجد بس انا اللى باينلى انك تقدرى تعيشى من غيرى وان وجودى من عدمه مش فارق فى حياتك
قولتله انى اسفة وطلبت منه يدينى فرصة تانية قالى انه مش هيقدر لانه مبقاش يحبنى كل حاجة وحشة عملتها معاه مسحت حبى من قلبه وبقى وجودى انا من عدمه اللى مش فارق فى حياته
رفض اى محاولة منى وسابلى الشبكة وقالى كل شئ قسمة ونصيب
انا مش عايزة الشبكة انا عايزاه هو يا ريتنى سمعت كلامك يا ميادة كان معاكى حق
ميادة :خلاص يا حبيبتى اهدى اديله شوية وقت هيكون هدى
مروة :مش هيحصل حاجة يا ميادة خلاص انا بالنسباله حكاية وخلصت اهمالى ليه حول حبه ليا لكره هو مش عايزنى فى حياته خلاص انا شوفتها فى عينيه
انتى اصلك مشوفتيش هو كان بيكلمنى بثقة ازاى
انا خسرته خلاص
ميادة وهى بطبطب عليها :ربنا يهون عليكى ويريح قلبك يا حبيبتى
بعد اربع ساعات
اسلام :شكلك مضايق فى حاجة حصلت
ميادة :مروة صاحبتى خطوبتها اتفسخت وهى تعبانة اوى وزعلانة وانا زعلانة علشانها
اسلام :هو اللى سابها
ميادة :اه
اسلام :مادام باعها يبقى متزعلش عليه
ميادة :هو مباعهاش بس هى اللى غلطت جت عليه لحد ما جابت اخره انا مش لايمة عليه وحذرتها كتير بس هى مسمعتليش هو مغلطش فى اللى عمله بس فى نفس الوقت انا مضايقة علشانها اوى دى صاحبتى ووجعها يوجعنى
اسلام :لا وانتى الشهادة لله مبتوجعيش حد ابدا خصوصا اللى بيتحبيهم انما اللى مبتحبيهمش عادى توجعيهم
ميادة :قصدك ايه
اسلام :مقصديش حاجة متاخديش فى بالك
ميادة :لا قصدك حاجة انت بقالك حوالى اسبوع تعاملك معايا غريب وكويس انك قررت تتكلم معايا فى ايه يا اسلام انا عملت ايه مزعلك منى
اسلام :مفيش حاجة قولتلك
ميادة :لا فيه وفى حاجة كبيرة كمان علشان خاطرى اتكلم معايا وقولى فى ايه انا مضايقة وانت مضايق منى كده وكل ما اسالك تقولى مفيش وغلاوتى عندك تقولى فى ايه
اسلام :بتقوليلى وغلاوتك عندى علشان اتكلم لانك عارفة انك غالية عندى بس يا ترى انا بقى غالى عندك ولا معندكيش غالى غير ماجد زى ما انتى مش ممكن تحبى اى راجل فى الدنيا اكتر منه مهما كان مين حتى لو كان انا يا ميادة حتى لو كان انا
ميادة بخضة :انت سمعتنى وانا بتكلم مع ماجد فى المطبخ صح
اسلام :سمعتك اه بس عادى كلامك اكدلى احساسى انتى بتحبى اخوكى واخوكى بيحبك ومش بيحبنى ومش طايقنى لانه شايف انى خدتك منه ومش عارف الصراحة هو كان مفكر انه هيقعدك جمبه لحد امتى
ميادة :انا اسفة بجد اسفة على اللى انت سمعته انا مكنش قصدى
اسلام :مكنش قصدك اسمعك
ميادة :مكنش قصدى اللى انت فهمته
اسلام :اللى فهمته ايه هو كلامك ليه مية معنى هو معنى واحد انتى بتحبى اخوكى ومش ممكن تحبى اى راجل فى الدنيا اكتر منه
ميادة :بس انا بحبك يا اسلام
اسلام :بجد بتحبينى
اه بتحبينى بس طبعا بتحبينى اقل بكتير من ماجد والله كتر خيرك انك بتحبينى شاكر افضالك الصراحة
ميادة :انا قولت كده لماجد علشان ميزعلش ده اخويا وميهنش عليا زعله
اسلام :وانا اهون عليكى عادى ومش مهم احساسى ايه لما اسمعك بتقوليله كده
ميادة :مكنش قصدى تسمعنى
اسلام :وانا برضه مكنش قصدى اسمعك انا كنت قايم اشرب مياة علشان اللى فى اوضتنا خلصت
وسمعتك يا ميادة سمعتك وانتى بتقوليله انك مش ممكن تحبى اى راجل فى الدنيا اكتر منه ولا حتى انا
ميادة بدموع فى عينيها :والله ما كان قصدى انا عمرى ما كنت اقول كده قدامك
اسلام بانفعال :بس تقوليله كده من ورايا عادى بس يكون ده احساسك عادى
ميادة وهى بتعيط :ده مش احساسى يا اسلام انا بحبك بطريقة وبحب ماجد بطريقة مفيش مقارنة بينكم وانا مستغناش عن واحد فيكم
اسلام بصوت عالى :انتى بتعيطى ليه دلوقتى يعنى انتى اللى غلطانة وكمان بتعيطى
ميادة وهى بتعيط اكتر :مش انت زعلان منى عايزنى اعمل ايه يعنى
اسلام :خلاص بطلى عياط..قولت بطلى عياط علشان نعرف نتكلم
ميادة وهى بتمسح دموعها :حاضر..انا اسفة مكنش قصدى ازعلك منى
ماجد والله طيب وبيحب كل الناس
اسلام :بيحب كل الناس ما عدا انا
ميادة :انا وماجد من صغرنا ملناش الا بعض طبيعة شغل بابا كانت بتخلينا نتنقل كتير كل ما نروح مكان ونستقر فيه ونعمل صحاب بابا ياخدنا ونروح مكان جديد ونخسر صحابنا اللى صاحبناهم ونبدء نصاحب ناس جديدة علشان كده علاقتنا لحد ما دخلنا الجامعة كانت عادية بكل الناس مكنلناش صحاب اوى
مكنش عندنا صحاب غير بعض
ولما اخيرا استقرينا فى القاهرة بعد ما دخلنا الجامعة انا مبقاش عندى صحاب غير مروة وماجد برضه مكونش صداقات كتير تقدر تقول مكناش محتاجين غير بعض
انا بالنسبة لماجد مش بس اخته التؤام او اخته الوحيدة انا صاحبة عمره وكاتمة اسراره انا كل حاجة ليه فى الدنيا يمكن يكون متعلق بيا بزيادة بس ده بحكم اننا كنا طول حياتنا سوا تتغير مدارسنا والمكان الى عايشين فيه يتغير مدرسينا وصحابنا وحتى جيرانا انما انا وهو مبنتغيرش ودايما مع بعض
اسلام :انا بغير منه يا ميادة انسجامكم سوا انا بغير منه انتو ممكن تفضلو سنة قاعدين تتكلمو مع بعض والكلام بينكم ميخلصش
ميادة :ده طبيعى احنا طول عمرنا سوا كل لحظاتنا الحلوة والوحشة اتشاركناها
اسلام :ما هو حتى ده انا بغير منه
هو دايما كان معاكى
سنين طويلة من عمرك انا مكنتش معاكى فيها وهو كان معاكى
ميادة بابتسامة :مش مهم اللى فات المهم انك معايا دلوقتى والمهم انك هتكون معايا فى اللى جاى كله
انا اسفة على اللى انت سمعته واوعدك مش هتسمعه تانى انا هتكلم مع ماجد وهخليه يتقبل جوازى منك بشكل اكبر من كده
وانت كمان بطل تستفزه وتلزقلى وهو موجود
اسلام وهو بيضحك :فى واحدة تقول لجوزها بطل تلزقلى
ميادة وهى بتضحك :اه انا..مبهزرش يا اسلام هو عارف انك بتعمل كده علشان تستفزه
اسلام وهو بيضحك :ما انا عارف انه عارف وعلشان كده بعمل كده
ميادة وهى بتضحك :ده انا ربنا يكون فى عونى اخويا وجوزى اجن من بعض
بعد اسبوعين
ماجد :لا مش عايز اخرج معاكى انتى وجوزك انا نخرج لوحدنا ماشى واخرجى معاه لوحدك
ميادة :ماجد اسلام جوزى جوز اختك الوحيدة علاقتك بيه لازم تكون اقوى من كده
ماجد :انا مبحبوش
ميادة :عارفة وعايزاك تحبه علشان خاطرى حبه يا ماجد لانه جوزى لانى بحبه
ماجد :بتحبيه يا ميادة
ميادة :بحبه وبحبك ومش محتاجة اختار بينكم انت اخويا الوحيد وهو جوزى انا مستغناش عنكم وبحب كل واحد فيكم بطريقة مختلفة عن التانى زى ما انت لما تحب وتتجوز هتحب مراتك بطريقة مختلفة عن الطريقة اللى بتحبنى بيها
يرضيك ابقى مبحبش مراتك ومبطيقهاش ومبتكلمش معاها كلمتين على بعض
ماجد :الصراحة لا بس والله غصب عنى اعمل ايه
ميادة :علشان خاطرى حاول تحبه اتكلم معاه اكتر متفضلش تستفزه بيا
ماجد :ما هو كمان ييستفزنى بيكى
ميادة :طلبت منه يبطل يعمل كده بطل انت كمان عايزاكم تبقو اصحاب
مش معقول ابنى ولا بنتى يجو يلاقو خالهم مبيحبش ابوهم
ماجد :خالهم..انتى حامل يا ميادة
ميادة :اه لسه عارفين انا واسلام امبارح وقولتلك قبل ما اقول لبابا وماما علشان تعرف غلاوتك عندى
ماجد :يعنى انا هبقى خال وهشيل ولادك على ايدى
ميادة :على ايدك وعلى كتفك كمان يا حبيبى
ماجد :خلاص علشان خاطرك انتى والبيبى اللى جاى ده هحاول ابلع جوزك ولو انه حقيقى واقفلى فى زورى بالعرض بس علشان خاطركم هحاول اطيقه
ميادة :تحبه يا ميجو عايزاك تحبه
ماجد :كفاية انتى بتحبيه
قوليلى انتى حامل فى قد ايه والبيبى ولد ولا بنت
ميادة :حامل فى شهر ولسه بدرى اوى على ما نعرف نوع البيبى
ماجد :طيب بتتوحمى على حاجة اطلبى اى حاجة وانا اجبها حالا واجيلك
ميادة :بتوحم على بيتزا هنخرج انا وانت واسلام ناكلها بكرة
ماجد :لازم اسلام يعنى
ميادة :علشان خاطرى بقى يا ماجد
ماجد :خلاص نخرج احنا التلاتة علشان خاطرك انتى والبيبى يا ميدا
ميادة :تسلملى يا قلب ميدا
برغم كل محاولاتى انى اخلى اسلام وماجد صحاب الا انى معرفتش فضلو بيغيرو من بعض وبيستفزو بعض بيا ميحلالهمش يحضنونى ويمسكو ايدى ويبوسو راسى ويقولو عنى كلام حلو الا قصاد بعض
كانو هيبقو صحاب جامدين والله فيهم من بعض كتير ده كفاية غيرتهم القاتلة دى
بس غيرتهم مع الوقت هديت بمرور السنين انا خلفت ولد وبنتين وانشغلت بيهم
وماجد حب واتجوز وخلف اربع ولاد وانشغل بمراته وولاده وبيته عنى انا واسلام
غيرتهم قلت بس مختفتش اصل اللى فى طبع مبيغيروش
مش متخيلة مثلا اننا فى المستقبل ممكن نجوز حد من ولادنا لبعض الوضع هيبقى نار يا حبييى نار بين اسلام وماجد هيطلعو عينين بعض وعينين العيال واكيد هيبوظو الجوازة وهيطلقو العيال من قبل ما يتجوزو اصلا
يلا ربنا يستر وده ميحصلش فى المستقبل انا حرفيا ملصماهم ومنعاهم بالعافية ان واحد فيهم يقتل التانى
مروة اتجوزت برضه بس مش عادل طبعا لان خلاص حكايتها معاه هى بايديها كتبت كلمة النهاية فيها لما جابت اخره لما حولت حبه ليها لكره باهمالها
بس هى اتعلمت الدرس ولما اتخطبت تانى مبقتش بتسمع نصايح بنات عمها مبقتش ودنية ومبقتش بتلغى شخصيتها غلطت ودفعت تمن غلطها واتعلمت منه ومكررتوش تانى الحمد لله
الاهتمام قادر يخليك تعشق حد كنت بتكرهه والاهمال قادر يخليك تكره حد كنت بتموت فيه
التوسط حلو فى كل حاجة فى الاهتمام فى الحب واكيييييييد فى الغيرة
خلو غيرتكم متوسطة ومعتدلة ومتبقاش غيرتكم قاتلة زى ماجد واسلام اكتر اتنين بحبهم فى الدنيا ربنا يباركلى فيهم ويا رب تحصل المعجزة ويحبو بعض وينسو الغيرة
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر