حكايات_منار
حكاية ” بيك ولا عليك “
حسن :هنعمل ايه دلوقتى
جيداء :انت طلبت نتقابل وانت مش عارف هنعمل ايه
اومال طلبت نتقابل ليه
حسن :علشان مش عايز ابقى لوحدى دلوقتى
جيداء :ايه
حسن :مش عايز ابقى لوحدى
وحقيقى مش حاسس انه ينفع يكون معايا غيرك
مش عايز اكون مع اهلى
واصحابى فى منهم رايحين الخطوبة
واللى مش رايحين انا بحس وانا وسطهم انهم احسن منى علشان محصلهمش اللى حصلى
هما مبيعملوش حاجة تخلينى اقول كده
بس انا غصب عنى بفكر بالطريقة دى
انا مش عايز اكون لوحدى وملقتش حد غيرك ينفع يكون معايا النهاردة
جيداء :علشان حصلى اللى حصلك ومحدش فينا احسن من حد
حسن :وعلشان اللى حصل محصليش لوحدى حصلك معايا فكده انتى هتبقى فاهمة وحاسة باللى انا حاسس بيه
جيداء :اللى حصلك اسوء من اللى حصلى
انا حبيبى سابنى وخطب واحدة غيرى
انما انت صاحب عمرك خطب حبيبتك
خسارتك مضاعفة عنى احنا مش زى بعض
حسن :لو مش عايزة تشوفينى كان ممكن ترفضى ببساطة
مش فاهم كنت بفكر فى ايه لما قولت انك الشخص اللى انا محتاجه معايا دلوقتى
انا اسف لنفسى علشان كلمتك
واسف علشان ضيعت وقتك
جيداء :انا اللى اسفة
متزعلش من كلامى انا مش قصدى والله
انا بس فكرة انك محتاجنى معاك النهاردة دى موترانى
انا اول مرة اتحط فى الموقف ده وانا مبعرفش اتعامل مع مشاعرى انا نفسى
وعلشان كده مش عارفة اتعامل مع مشاعرك صح
انا اسفة بجد
بعد اذنك
حسن :انا قبلت اعتذارك متمشيش
جيداء :معتقدش انها فكرة كويسة
حسن :فكرة ايه
جيداء :انى اكون معاك دلوقتى
مش انا الشخص اللى انت محتاجه
انا منفعش اكون الشخص اللى انت محتاجه منفعش اكون الشخص اللى اى حد محتاجه
حسن :ليه
جيداء :علشان مش هبقى عارفة اعمل ايه او اقول ايه
حسن :اومال ليه وافقتى نتقابل
جيداء :علشان مكنتش عايزة ابقى لوحدى
نسيت انى مبعرفش اكون غير لوحدى
انا همشى
حسن :خليكى معايا
جيداء :وجودى مش هيفرق بالعكس هيضايقك اكتر ما انت متضايق
حسن :حتى لو خليكى
جيداء :ليه
حسن :علشان انا عايزك معايا
انتى قولتى انك مش عايزة تبقى لوحدك انا كمان مش عايز ابقى لوحدى
فخلينا سوا
جيداء :حاسة انى هخيب ظنك
حسن :مش مهم كده كده ظنى متساوى بالأسفلت مش بس خايب
فمفيش حاجة ممكن تحصل اسوء صدقينى
ها تحبى نعمل ايه انا جعان تيجى ناكل
جيداء :ماشى بس هنمشيها امريكانى
حسن :يعنى ايه عايزة تاكلى برجر او هوت دوج يعنى ولا ايه
جيداء :لا يعنى كل واحد يحاسب لنفسه
حسن :ده على اساس انك مش خارجة مع راجل
ولا على اساس انى معييش فلوس مثلا
انتى شايفانى ايه انا مش فاهم علشان تقولى اللى بتقوليه ده
جيداء :انا ان متعودتش حد معرفوش يدفعلى
انا عارفة انى عارفاك بس انا معرفكش
على الأقل معرفكش بالشكل اللى يخلينى اوافق تدفعلى
حسن :انا مش هوافق باللى بتقوليه ده مهما كانت مبرراتك
جيداء :ما خرجنا قبل كده ومكنتش بتدفعلى
حسن :كان زياد…كان معاكى اللى يدفعلك
ووقتها انتى كنتى بتبقى خارجة معاه مش معايا
دلوقتى الوضع مختلف ممكن متخلينيش اقول اسم الزفت ده ولا اتكلم عنه
جيداء :لو مش عايز تقول اسمه ولا تفتكره
يبقى انا بعمل ايه هنا انا اكتر حد هيفكرك بيه
حسن :لو منشفتيش دماغك وفهمتى انك خارجة مع راجل وسيبتينى ادفع مش هضطر اقول زفت اسمه
جيداء :خلاص مش عايزة
حسن :مش عايزة تفضلى معايا هتمشى
جيداء :لا مش عايزة اكل مش جعانة كل انت
حسن :وليه المعاناة دى
هو مش انا اللى طلبت نتقابل وانتى مشكورة وافقتى يبقى انا اللى عازمك طبيعى
جيداء :مش طبيعى بالنسبالى
حسن :انا حسن تمنية وعشرين سنة من القاهرة طولى ١٨٥ سنتى ووزنى بتاع ٩٥ كيلو بحب اللون الأسود وعندى حساسية من الفراولة وبشجع ريال مدريد
ها كده بقيتى عارفانى ينفع تسيبينى اتهبب اعزمك
جيداء :مش مرتاحة للفكرة لا
حسن بنفاذ صبر :يا رب هموت من كتر عندك
اعمل ايه طيب علشان تكونى مرتاحة غير انى اسيبك تدفعى لنفسك كأنك مش خارجة مع راجل او انى اقعدك جنبى تتفرجى عليا وانا باكل
طيب اقولك المرة دى عليا والمرة الجاية ان شاء الله عليكى
جيداء :انت بتكدب على فكرة
حسن :انا بكدب فعلا بس ليه بتقولى كده
جيداء :علشان انت بعد المرة دى مش هتطلب تخرج معايا تانى
حسن :متقاطعيش انتى بس…بهزر قصدى لا هطلب عادى بس مش هسيبك تدفعى لنفسك
جيداء :على فكرة انا معايا فلوس
حسن :كويس اول ما اتزنق فى فلوس هبقى استلف منك
انتى مفكرة ان الموضوع ليه علاقة بكونك معاكى فلوس او لا
الموضوع ليه علاقة بأنك خارجة معايا ولوحدنا فاكيد مش هتمدى ايدك فى شنطتك وتطلعى جنيه
جيداء :مش هكون مرتاحة كده
حسن :معلش انا هكون مرتاح كده
وحياة ابوكى كفاية مناهدة كان زمانا كلنا وهضمنا اللى كلناه وجوعنا تانى ومش فاهم ليه كل الفرهدة دى
يعنى انتى متعرفينيش فمش هتسيبينى ادفعلك بس عادى خارجة معايا وانتى متعرفينيش
جيداء :انا مش متناقضة قولت معرفكش كفاية
كمان انا وافقت نخرج تعاطفاً معاك
حسن :خلاص كملى تعاطفك للنهاية
انا بجد جعان ينفع تتعاطفى مع جوعى
جيداء :خلاص ماشى
حسن :مش هيجرا حاجة لو بطلتى عند ووافق…
جيداء قاطعته :ايه خلاص وافقت انا
حسن :بجد طيب كويس ها تاكلى ايه
جيداء :اختار انت مش انت اللى عازم
حسن :وهو يعنى علشان انا اللى عازم لازم ناكل على كيفى
لا عادى اختارى انتى
جيداء :ممكن ناكل لازانيا
حسن :ممكن ناكل لازانيا
بعد نص ساعة
حسن :هو احنا ليه ساكتين واحنا بناكل انتى بتحبى تاكلى فى هدوء
جيداء :لا بس عادة انا باكل لوحدى
حسن :ليه مش بتاكلى مع اهلك
جيداء :ماما وبابا الله يرحمهم
حسن :الله يرحمهم طيب واخواتك معندكيش اخوات
جيداء :لا عندى بس متجوزين كلهم
حسن :يعنى انتى عايشة لوحدك
جيداء :مش بالظبط
حسن :يعنى ايه مش بالظبط
جيداء :اخواتى متجوزين وعايشين فى شقق فى نفس العمارة اللى انا عايشة فيها
فانا يعتبر مش عايشة لوحدى
حسن :طيب وليه بتاكلى لوحدك
جيداء :مبحبش اكون تقيلة على اخواتى
حسن :هو الواحد ممكن يكون تقيل على اخواته
جيداء :اه لو كان انا
حسن :انتى علاقتك باخواتك وحشة
جيداء :مش وحشة بس مش حلوة
فرق السن بينا كبير فمش قريبين من بعض اوى
اكبر ولد من ولاد اخواتى انا اكبر منه باربع سنين بس
حسن :للدرجة دى
جيداء :واصغر واحدة فى اخواتى اكبر منى باربعتاشر سنة
حسن :يعنى انتى جيتى غلطة…احم احم قصدى يعنى مكانوش عاملين حسابهم عليكى يا دى النيلة قصدى يعنى…
جيداء قاطعته :مش محتاج تفكر فى صيغة الطف تقولها
انا جيت غلطة ومكانوش عاملين حسابهم عليا فعلا
كانو خلاص خلفو واخواتى كبرو ونسيو ازاى يربو طفلة وكمان الوقت اختلف عن وقت ما ربو اخواتى
فهما اتدبسو فيا او تقدر تقول لبسو
حسن :هو عادة الأهل بيجو على اخر واحد وبيكونو خلاص زهقو وبيسيبوه يربى نفسه بنفسه ويعتمد على نفسه
عندك سيف اخويا مشافش ريحة التربية معدتش من جنب باب اوضته حتى
جيداء وهى بتضحك :ربنا يخليهولكم
انت اكبر واحد فى اخواتك
حسن :لا عندى اخ واخت اكبر منى وبعدين انا وبعدين اخت بعدى وبعدين اخر العنقود سيف اللى واخد الدلع كله
جيداء :مش دايما اخر العنقود بياخد الدلع كله
انا اهلى مدلعونيش بالعكس علشان مكانوش عارفين يتعاملو معايا وعلشان كانو خايفين عليا من كل حاجة لأن وقتى غير وقت اخواتى
اهلى قفلو عليا وانا كمان كنت بطبيعة شخصيتى انطوائية وانعزالية فالنتيجة كانت انى مبتعاملش مع حد غير اهلى تقريبا
حسن :لحد ما كبرتى
جيداء :لحد دلوقتى انا حقيقى مبعرفش اتعامل مع الناس مبعرفش اقول ايه او اتصرف ازاى برتبك جدا من ابسط تعامل معاهم
حسن :وانا اللى كنت فاكرك متكبرة وشايفة نفسك علينا طلعتى انطوائية ومش عارفة تتعاملى معانا ازاى
ان بعض الظن إثم ظلمتك
جيداء :اقولك حاجة عمرى ما قولتها لحد ابدا
حسن :ده علشان ارتاحتيلى
جيداء :لا علشان عايزة اقولها ومعنديش غيرك يسمعنى
حسن :على فكرة مش لازم تكونى صريحة اوى كده
قولى حاجة ايه دى اللى عمرك ما قولتيها لحد
جيداء :انا بحس ان وجودى فى الدنيا دى غلط وانى مليش اى لازمة فيها
شيل جيداء كده من العالم
العالم مش هيخسر اى حاجة مش هيتأثر خالص
حسن :هو العالم مش هيخسر اى حاجة لو شيلنا منه اى حد
العالم فيه اكتر من تمنية مليار نسمة يا جيداء فالنسمة اللى هتروح فى تمنية مليار نسمة يعوضو مكانها
مش مطلوب منك تأثرى فى العالم كفاية تأثرى فى كام شخص من اللى حواليكى
محدش فى الدنيا ملوش لازمة حتى سيف اخويا اكيد ليه لازمة معرفش هى ايه بس مسيرنا نعرف يعنى
جيداء وهى بتضحك :انت ليه مضطهده كده
حسن :ولا مضطهده ولا حاجة وهو انا اقدر عليه ده ميقدرش عليه الا ربنا
جيداء :انت بتقول انى مش لازم أاثر فى العالم كفاية أاثر فى كام شخص من اللى حواليا
انا مفيش حد حواليا الناس كلها بعيدة عنى
حسن :يمكن انتى اللى باعدة نفسك عنهم ونافية نفسك فى عزلتك
جيداء :ما انا مبعرفش اقرب
بحس اى حد هيقرب منى هيمل منى انا نفسى بمل من نفسى
انت معايا بقالك ساعتين وزمانك مليت منى
حسن :لا بالعكس
انا اكتشفت انك غير ما كنت فاكرك خالص
جيداء :كنت فاكرنى مغرورة وشايفة نفسى وطلعت ايه غير انك عرفت انى انطوائية
حسن :طلعتى شفافة صادقة وصريحة بطريقة تضايق بس شفافة ومش بتقولى عكس اللى جواكى
طلعتى كمان طيبة وفى حاجة مريحة فى الكلام معاكى مش عارف ايه هى بس فى حاجة مخليانى مرتاح وانا بتكلم معاكى او بسمعك
وعنيدة شويتين تلاتة عشرة
انا اكتشفت انى مكنتش اعرفك خالص
جيداء :يعنى مش ندمان انك كلمتنى وطلبت منى نتقابل
حسن :لا بالعكس
جيداء :بالعكس ازاى بس وانا اللى اتكلمت اغلب الوقت واكيد انت كنت محتاج حد يسمعك
حسن :انا كنت محتاج مبقاش لوحدى بس
وبسببك انا محستش انى لوحدى
جيداء :انا كمان محستش انى لوحدى على غير العادة
حسن :طيب ايه رأيك نبقى اصحاب انا وانتى من غير اى وسايط او حلقات وصل بينا
لا نبقى اصحاب مننا لنفسنا كده
جيداء :مش عارفة مش حاسة انى هقدر اكون صديقة ليك انا اصلى عمرى ما كان عندى اصحاب خالص
فمش هبقى عارفة اعمل ايه اوى
حسن :مش مشكلة ضبشى
جيداء :يعنى ايه اضبش دى
حسن :يعنى عادى جربى وعكى الدنيا شوية لحد ما تعرفى تتعاملى صح
ايه المشكلة يعنى لو غلطتى اللى مبيغلطش مبيتعلمش
جيداء :متأكد
حسن وهو بيمدلها ايده :متأكد ها اصحاب
جيداء وهى بتحط ايديها فى ايديه :اصحاب
بعد شهرين
جيداء :خلاص خليت الكورسات اوفلاين مش اونلاين
حسن :لا مش فاهم عملتى ايه
جيداء :مش انا كنت باخد كورسات ايطالى وطبخ ورقص اونلاين
قررت انى مش هاخد اونلاين تانى وهروح احضر وسط ناس
حسن :كده افضل علشان تتعاملى مع ناس وعلشان تخرجى من البيت اصلا
مش فاهم ليه رافضة الشغل اوى كده
جيداء :جربت اشتغل قبل كده ومكنتش مرتاحة خالص مطيقتش لا
انا مش عايزة اشتغل
حسن وهو بيضحك :والله ولا انا
خلاص بلاها شغل وخليكى فى الكورسات الكتير دى المهم تعملى حاجة فى حياتك
جيداء :مشغولة بيهم ومبسوطة كمان
حسن :انا بس مش فاهم ليه بتاخدى كورسات ملهاش علاقة ببعض كده
جيداء :بص يا سيدى كورس الإيطالى ده لأنى عندى امل اسافر ايطاليا يوما ما ولانى فعلا حابة لغتهم
كورس الطبخ بقى قولت هجرب ولو معجبنيش مش هكمله بس الحقيقة عجبنى اوى
كورسات الرقص لأنى كنت عايزة حاجة اطلع فيها طاقتى جربت اتمرن كيك بوكسينج بس معجبتنيش انا مش حابة اتعلم رياضة عنيفة
ففكرت اطلع طاقتى فى الرقص
حسن :وعلى كده بتتعلمى رقص ايه صالصا ولا تانجو
جيداء :لا علشان دى هتحتاج حد يرقص معايا
باخد كلاسيز زومبا وبيلى دانس دول ينفع اشارك فيهم لوحدى وبطلع فيهم طاقة رهيبة بجد زيهم زى التمارين فى الجيم واحسن كمان
حسن :المهم تكونى مبسوطة باللى بتعمليه
جيداء :مبسوطة جدا
ويمكن الاقى فيهم حاجة احب اشتغل فيها بعد كده
بس انا قلقانة من فكرة انى هروح احضر وسط ناس دى
خدت القرار بنفسى بس حاسة انى مش قده لا
بس هضبش وزى ما تيجى تيجى بقى
حسن :ضبشى براحتك كله هيبقى كويس متقلقيش
بعد شهر
حسن :انتى فين
جيداء :فى البيت
حسن :بتهزرى يا جيداء انتى لسه عندك
جيداء :يا حسن مامتك عاملة عزومة علشان تحتفل بنتيجة سيف فى الثانوية يعنى حاجة عائلية هعمل ايه انا وسطكم وجودى هيبقى غريب
حسن :ولا غريب ولا حاجة
سيف عزم صحابه وبسنت اختى عزمت اتنين من اصحابها
وقرايبنا كمان هيجو
انا عايز اعرفك على عيلتى يا جيداء بقالى يومين بتحايل عليكى وانتى برضه مش عايزة تيجى
جيداء :وحياة ربنا لا انا عايزة اجى انا حتى جيبت هدية لسيف
انا بس حاسة انى هبقى غريبة ووجودى ملوش داعى فى مناسبة عائلية زى دى
حسن :وجودك مهم بالنسبالى ممكن تيجى بقى ولا اجى اخدك
جيداء :لا خلاص خليك مع اهلك
وانا هاجى لوحدى مسافة الطريق واكون عندك
حسن :انا بعتلك لوكيشن صح
جيداء :اه
حسن:احنا شقة تسعة عمارة تلاتة وعشرين
جيداء :عارفة انتى بعتلى اللوكيشن ورقم العمارة ورقم الشقة
سلام لحد ما اجى
حسن :ماشى مستنيينك
بعد ساعة ونص
جيداء بابتسامة :الف مبروك اتفضل
سيف :الله يبارك فيكى انتى جايبالى هدية تصدقى انتى الوحيدة اللى عملتيها محدش فيهم عبرنى بكيس مولتو حتى
جايبالى ايه بقى هفتح واشوف…ايه ده
جيداء بخوف :ايه معجبتكش
سيف بانبهار :معجبتنيش ايه دى خطيرة دى احلى واغلى هدية جاتلى فى حياتى كلها
ممكن ايدك ثانية
جيداء وهى بتمدله ايديها باستغراب :ليه
سيف وهو بيمسك ايديها يبوسها :شكرا سيدتى الجميلة
جيداء :العفو ايها الشاب الصغير
انا كده قولتها صح ولا غلط
سيف :انتى تقولى اللى انتى عايزاه
سيف :ماما شوفى جيداء جابتلى ايه
نبيلة :ليه يا حبيبتى تعبتى نفسك احنا جايبنله بلايستيشن
سيف :اللى انتم جايبنهالى بالنسبة للى فى ايدى دى اتارى مش بلايستيشن
حمزة سليم مالك يلا علشان هنلعب بالبلايستيشن الجديدة وهكسحكم هيتحط عليكم جامد بجد
حسن :سيف تعالى ثانية
سيف :ما تخليها بعد ما اغلبهم يا حسن
حسن :مش هاخدك منهم كتير يا اخويا
قولى بس البلايستيشن اللى جيداء جايبهالك دى سعرها فى حدود قد ايه
سيف :دى بلايستيشن 4 خمسمية جيجا يعنى مش بأقل من سبعتلاف جنيه
حسن :يا خبر ابيض كام
جيداء انتى مشوفتيش المنظر من بلكونتنا صح
جيداء :لا طنط نبيلة وريتهولى
حسن :معلش تعالى معايا اوريهولك تانى
ايه اللى انتى عملتيه ده
جيداء :عملت ايه انا كنت حاسة انى هبوظ الدنيا وقولتلك بلاش اجى انت اللى اصريت
حسن :جايبة لسيف بلايستيشن بسبعتلاف جنيه يا جيداء انتى بتهزرى
جيداء :انا مكنتش عارفة اجيبله ايه بحثت على النت على الهدايا اللى بيحبها الولاد فى سنه
لقيتها حاجات مش هعرف اعملها
مكتوب يطلع رحلة او نجيله تذاكر لحفلة وانا معرفش هو بيحب يسمع مين اساسا ولا عارفة هيحب يروح فين ومع مين
فلقيت ان البلايستيشن احسن حاجة ممكن اجيبهاله واختارتله احدث حاجة على اساس انها هتكون مودرن وهتعجبه وكده
حسن :هى عجبته انتى مش شايفة طاير من الفرحة وبيلعب بيها مع اصحابه ازاى
بصى قبل ما يلعب متصور بيها ومنزلها حالة
جيداء :كاتب احلى واغلى هدية جاتلى فى حياتى كلها
باى باى للثانوية العامية
I’m ready for a new chapter in my life
الله انا مبسوطة انها عجبته اوى كده
حسن :انتى عايزة تشلينى يا جيداء اعمل ايه دلوقتى سيف فرحان بيها وفرج كل البيت وكل الدنيا عليها
اخدها منه ازاى بس
جيداء :وتاخدها منه ليه بس
حسن :علشان مينفعش تجيبيله هدية غالية اوى كده
جيداء :مش غالية ولا حاجة المهم انه فرحان بيها
كمان دى هدية نجاحه فى الثانوية العامة
حسن :وهو كان من اوائل الجمهورية علشان تجيبيله هدية غالية كده
ده جايب اربعة وستين فى المية يا جيداء
جيداء :ومامتك عاملة احتفال
حسن :ايوه طبعا علشان نجح من غير ما يسقط فى ولا مادة وعلشان نجح اصلا احنا كنا متوقعين يعيد السنة بس هو خلف توقعاتنا
جيداء :طيب يعنى يستاهل هدية تفرحه زى ما فرحكم
حسن :تصدقى بالله مفيش فايدة لا فيه ولا فيكى
جيداء :متكبرش الموضوع يا حسن بقى
حسن :انتى اللى كبرتى الموضوع جايبة هدية غالية جدا
ودخلتى سألتى جوجل علشان تعرفى تجيبيله ايه
كنتى زرفتيه ميتين جنيه فى ايده وخلاص
جيداء :يعنى ايه زرفته دى
حسن :اسألى جوجل
علشان انا مش طايقك دلوقتى
جيداء :متزعلش بقى متوقعتش اللى عملته هيضايقك
والهدية من قيمة اللى ريحاله
حسن :وسيف قيمته هدية بسبعتلاف جنيه
بسنت وهى داخلة البلكونة وبتضحك :ولا بسبعين جنيه حتى بس نقول ايه محظوظ
ماما بتقولكم يلا علشان نتغدى
حسن :ماشى جايين وراكى
جيداء :خلاص بقى يا حسن متزعلش منى
حسن :انا زعلان علشان صرفتى كل فلوسك على هدية لسيف علشان يلعب بيها
جيداء :دى مش كل فلوسى انا معايا فلوس تانية
انت محدش جابلك هدية لما نجحت فى ثانوى حاسة فى حقد ناحية سيف
حسن :ماما جابتلى ساعة هدية وبابا جابلى موبايل
وهو مش حقد ولا حاجة يا جيداء الفكرة ان الهدية فعلا غالية اوى وان سيف مش ناقص دلع وبوظان بجد ماما وبابا قايمين بالواجب وزيادة
جيداء :حرام عليك هو لطيف وطيب وذوق اوى
حسن :مقولتش انه مش طيب بس مدلع ومش شايل مسئولية ولا هيعرف يشيلها لو فضلو مدلعينه كده دى بسنت البنت مش مدلعينها كده وهى اخر بنت فى البيت زى ما هو اخر ولد
نبيلة بصوت عالى :حسسسسسن يا جيداء يلا علشان الغدا
حسن بصوت عالى :حاضر يا ماما
يلا نروح ناكل
جيداء :انا مكنش قصدى بعد كده هبقى اسألك قبل ما اعمل اى حاجة تخصك او تخص حد من اهلك او اقولك مش هعمل اصلا علشان انا كل ما احاول اعمل حاجة حلوة بتبوظ منى وتطلع حاجة غلط وزفت فى الأخر
حسن :لا يا جيداء انتى نيتك حلوة واللى عملتيه فعلا فرح سيف
خلاص فكك من اللى قولته شكرا على احلى واغلى هدية جاتله فى حياته ومعتقدش حد غيرك فى حياته هيعبره بهدية غالية اوى كده
هديتك فعلا حلوة سيف بيحب البلايستيشن جدا
فانتى احسنتى الإختيار فى الهدية
جيداء :بجد
حسن :بجد
يلا علشان ناكل ماما المرة الجاية مش هتنده وهتيجى تحدفنا من البلكونة
بعد شهر
جيداء :خلصت كورس الطبخ وهاخد مكانه دورة تدريبية فى تنسيق الأزهار
حسن :ودى هتعملى فيها ايه
جيداء :هتعلم ازاى انسق الورد فى بوكيهات شكلها حلو وهعرف معلومات عن الورود وانواعها
متحمسة اوى وما صدقت الاقى مكان اخد فيه الدورة اغلب الدورات بتكون اونلاين
حسن بابتسامة :مبسوط انك بقيتى تدورى على حاجات تخليكى تتعاملى مع الناس اكتر بعد ما كنتى بتهربى من التعامل معاهم
جيداء بسعادة :دى حاجة حلوة صح
حسن :حاجة حلوة جدا
بس انا عايز افهم مصروف ايه اللى بتدفعى منه فلوس الكورسات دى كلها
جيداء :انا مباخدش مصروف اصلا
حسن :اومال
جيداء :انا ورثت من بابا وماما فلوس دى مع معتصم وبدر اخواتى بيشغلوها
وفى عمارتنا اللى عايشين فيها دى بتاعتنا عايشين فى اربع شقق انا واخواتى والباقى مأجرينهم
انا ليا تلت شقق متأجرين فايجارهم كل شهر بيتحطلى فى البنك فبصرف منه غير نصيبى إيجار المحلات اللى تحت العمارة وغير نصيبى فى ارباح الفلوس اللى بدر ومعتصم بيشغلوهالى
حسن :واو انتى طلعتى غنية
جيداء :مفكرتش فيها قبل كده بس اه انا غنية او مش عارفة بس انا عندى اللى يكفينى وزيادة يعنى
حسن :طيب وليه معندكيش عربية
جيداء :مبعرفش اسوق وكنت خايفة اتعلم زمان
حسن :ودلوقتى
جيداء :مبقتش خايفة بس مجاش فى بالى اتعلم عادى باخد اوبر وخلاص السواقة فى الشوارع هنا هتبقى رخمة لأن الطريق دايما زحمة
حسن :ميبانش عليكى انك غنية كده
انتى كمان مبتقوليش
جيداء :واقول ليه انا مش شايفة ان دى حاجة محتاجة امشى اقولها لكل الناس يعنى
حسن :انتى عارفة ان زياد كان بيقولى انك مادية وانك بتقلبيه فى فلوس كتير
علشان كده كنت مستغرب اوى لما خرجنا اول مرة اصرارك انك تدفعى لنفسك علشان ده كان عكس كلامه عنك
وبعد كده لقيت ان كل كلامه عنك كان كدب مش بس فى حكاية الفلوس دى
جيداء :مكنتش اعرف انه بيقول عنى كده
بس مش مستغربة لأنه كان بيقول عنك وعن كل اصحابه كلام كتير وحش
حتى تالين اللى راح خطبها دى كان بيقولى عنها انها متكبرة ومش حلوة وعادية خالص ودمها تقيل وباردة
هو مكنش بيشكر غير فى نفسه
انا كمان اكتشفت انك عكس ما كان بيحكيلى عنك خالص وان كتير من العيوب اللى كان بيقول انها فيك موجودة فيه هو اصلا
مش عايزة اشوه صورته فى عينيك بص خلاص غير الموضوع احسن
حسن :صورته فى عينيا هو ولع فيها مش بس شوهها يا جيداء
بس معاكى حق نغير الموضوع احسن
انتى مين سماكى جيداء
جيداء :ماما الله يرحمها
انا بابا وماما كانو شغالين فى الكويت طول عمرهم معتصم وبدر وخديجة اخواتى كلهم اتولدو فى الكويت انا الوحيدة اللى اتولدت فى مصر
ماما بقى بعد ما رجعو واستقرو فى مصر كانت بتحب تتفرج على مسلسلات خليجى علشان بتفكرها بذكرياتها هناك
لما اتولدت هى كانت متابعة مسلسل البطلة بتاعته اسمها جيداء فسمتنى على اسمها بس كده
بعد اسبوعين
حسن :شوفتى اعلان توم كروز اللى بعتهولك
عظمة حتى فى الإعلان اللى عامله عن ازازة برفان
عظمة وملوش حل ممثل لم ولن يتكرر
بيصور فيلم جديد هينزل قريب فى السينمات فى امريكا
حاسس انى مش هقدر استنى لما ينزل هنا وهروح امريكا اشوفه هناك وبالمرة اشترى البرفان اللى كان عامله الإعلان لأنه مش موجود فى مصر
جيداء وهى بتضحك :انت لو توم كروز طلع عطس فى اعلان ولا فيلم هتقول الله ما هذه العظمة هذا ما لم نسمع به من قبل
حسن وهو بيضحك :ده حقيقى
والله حتى لو معطسش برضه بيعمل عظمة
انتى عرفتى ان فرح حنين واحمد الأسبوع الجاى
جيداء :عرفت اه حنين عندى فى الأصدقاء وبتنزل بوستس وحالات كتير عن فرحها اللى قرب شكلها فرحانة اوى
حسن :احمد كمان فرحان بقالهم عشر سنين بيحبو بعض واخيرا هيبقو سوا لأخر العمر
احمد عزمنى على الفرح احنا اصحاب من زمان انتى عارفة وحنين كمان عزمتنى
جيداء :عارفة طبعا انت رايح طبعا
حسن :مينفعش مروحش الإتنين هيزعلو منى لو مروحتش
جيداء :انت مش عايز تروح ليه
حسن :لا انا عايز اروح انا بس عايزك تيجى معايا ينفع
جيداء :ينفع طبعا
حسن :هو بس…زياد وتالين احتمال يبقو هناك…هو مش احتمال هو اكيد علشان احمد عزمهم
انا مش عايزك تتصدمى لما تشوفيهم ولا تفكرى انى عايزك معايا علشان اضايقه او اضايقها مثلا او انى بستغل وجودك بأى شكل من الأشكال
انا عايزك معايا علشان انا وجودك معايا بيريحنى يا جيداء
جيداء :عارفة على فكرة ومش محتاج تقولى انت بتفكر ازاى يا حسن
ها بقى قولتلى الفرح امتى
بعد اسبوع
حسن :لا واضح ان كورسات الرقص اللى بتاخديها فلوسها حلال جايبة نتيجة مبهرة
جيداء وهى بتضحك :انا مباخدش كلاسيز فى الرقص السلو
حسن :عارف مخدناش حاجة من الكلاسيز بتاعتك دى لحد دلوقتى ومش عارف بتتعلمى فيها ايه
بس انا بتكلم عن الثقة بترقصى بثقة كده ولا هامك الناس ولا اى حاجة
جيداء وهى بتضحك :مبقتش بخاف اغلط قدامهم بضبش براحتى زى ما علمتنى
حسن وهو بيضحك :كورس التضبيش المجانى مع الدكتور حسن زين الدين
الرقصة خلصت تعالى نرجع ترابيزتنا
جيداء وهى بتضحك وبترقص :لا استنى اوريك بتعلم ايه فى الكلاسيز اللى باخدها
بعد خمس دقايق
حسن وهو بيمسك ايديها وبيمشى بيها بعيد :يا نهار ابيض يخربيتك ايه اللى عملتيه ده
جيداء وهى بتضحك :ايه كنت بوريك بتعلم ايه فى الكلاسيز
حسن :هو ده اللى بتتعلميه هناك
جيداء :ايوه مش قولتلك انى باخد كلاسيز بيلى دانس
حسن :بيلى دانس ايه ده رقص بلدى
جيداء :اسمه رقص شرقى يا جاهل واه الرقص الشرقى هو البيلى دانس
حسن :تمام جدا البيلى دانس ده ميترقصش قدام الناس تانى
ارقصيه فى الكورس براحتك فى اوضتك ماشى انما مش قدام امة لا اله الا الله كده
انتى معاكى فى الكورس رجالة
جيداء :انت متخيل راجل بياخد كلاسيز رقص شرقى اكيد لا يعنى يا حسن
حسن :طيب قدر ولطف
جيداء :بس هو انا كان رقصى وحش ولا ايه
حسن :الصراحة لا بالعكس
جيداء :اومال اتضايقت ليه
حسن :علشان فى وسط ما انا مبهور وانا بتفرج عليكى لقيت فى بتاع خمستاشر عشرين شاب من خيرة شباب البلد بيتفرجو ومبهورين برضه
جيداء :ودى حاجة تخليك تضايق يعنى
حسن :دى حاجة تخلينى اغير يا جيداء
جيداء :يعنى انت غيران
حسن :اه اكدب يعنى انا غيران
تعالى نسلم على حنين واحمد ونمشى علشان زهقت من الفرح ده
جيداء :لا روح سلم عليهم انت وانا هستناك هنا
حسن :ماشى هرجعلك بسرعة
زياد :واضح ان مش تسريحة شعرك ولونه بس اللى اتغيرو دى شخصيتك كمان اتغيرت
انا فاكر انك مكنتيش بترضى ترقصى معايا سلو خالص
دلوقتى بترقصى كل انواع الرقص مع حسن
جيداء :اديك قولتها بنفسك مع حسن
انت هتقارن نفسك بحسن ولا ايه
زياد :انتى عارفة انه يينتقم منى فيكى وبيحاول يردلى اللى عملته يعنى انتى مجرد كوبرى وسيلة بيستغلها مش اكتر
جيداء :مشكلتك انك فاكر كل الناس زيك
لا الحمد لله الدنيا فيها رجالة بجد زى حسن كده مش كلهم زيك
كمان هيردلك اللى عملته بيا ليه انا اساسا مخصكش
ولا انت فارقلى او فارقله
انت ولا حاجة بالنسبالنا والهوا ليه لازمة عنك
عارف مين الكوبرى والوسيلة اللى بتُستغل بجد
تالين اللى خطبتها لمجرد انك تحس انك خدت من حسن حاجة معاه
الوسيلة الغبية اللى باعت الغالى واشترت الرخيص
خلى بالك الوسيلة بتبص علينا وعينيها بتطق شرار روحلها بقى بسرعة بدل ما تزعقلك
زياد :تزعق لمين انتى مش شيفانى راجل ولا ايه
حسن وهو جاى عليهم :طبعا مش شايفاك راجل ولو ممشتش حالا هتضرب قدامها علقة زى اللى ادتهالك اخر مرة لو نسيتها انا مستعد افكرك
زياد :احم احم انا مش هرد عليك بس علشان مبوظش فرح صحابى
حسن :لا وانت الشهادة لله جدع اوى مع اصحابك
طيب روح اجرى يا جدع ادخل فرح صحابك على رجلك بدل ما هخرجك منه على نقالة
ووالله انا نفسى اعملها حقيقى بتبسط وانا بنفخك
جيداء وهى بتضحك :خليها مرة تانية
انا جعانة دلوقتى هتعشينى فين
حسن وهو بيمشى :مكان ما تحبى
عايزة تتعشى لازانيا كالعادة
جيداء وهى بتمشى جنبه :طبعا
بس مقولتيليش على حكاية انك ضربته دى
حسن :نسيت احكيلك ضربته اه ساعة ما عرفت
هو كان بيقولك ايه
جيداء :كلام اهبل وتافه زيه
قال ايه انت بتنتقم منه فيا
حسن :انتى متخصيهوش علشان انتقم منه فيكى
غير انى لما بعوز انتقم بنتقم من الشخص نفسه وباخد حقى بايدى
هو الواطى ده لسه فاكر انك تخصيه ولا ايه
جيداء :انا قولتله انى مخصوش وانك مش زيه
بس لما انا مخصوش اومال انا اخص مين يا حسن
حسن :يعنى انتى مش عارفة انتى تخصى مين يا جيداء
جيداء :انت قولتلى هنتعشا فين
بعد شهر
جيداء بصوت نايم :صباح الخير يا حسن
حسن :صباح الفل
معاكى نص ساعة تجهزى وتنزليلى
جيداء :ليه هنروح فين الساعة سبعة الصبح
حسن :هنروح اسكندرية
جيداء :ايه ليه
حسن :علشان انا قررت عندك اعتراض ولا حاجة
جيداء :معنديش لا
حسن :طيب النص ساعة فات منها خمس دقايق وانتى لسه مقومتيش من السرير
جيداء :لا خلاص قومت اهو اقفل طيب وسيبنى اجهز
بعد ست ساعات
حسن :عارفة دايما مكنتش برضى اجى مع اصحابى اسكندرية يوم صد رد ده
كنت بشوف انى مش هتبسط على الأقل اجى يومين تلاتة علشان اتبسط واحس انى جيت
بس النهاردة قولت هاجى معاكى وكنت متأكد انى هتبسط لأنك معايا كفاية انك معايا
النهاردة عيد ميلادى وقررت ان وجودك معايا هيكون هديتى لنفسى يوم عيد ميلادى
جيداء بابتسامة :والهدية اللى اختارتها لنفسك عارفة ان النهاردة عيد ميلادك وجابتلك هدية
كل سنة وانت طيب
حسن وهو بياخد منها الهدية :لا متقوليش ده هو…هو صح البرفان اللى توم كروز عمل عنه اعلان
قوليلى انها نسخة تقليد منها
جيداء وهى بتضحك :اكدب يعنى
اكيد لا معقول هجيبلك نسخة تقليد يوم عيد ميلادك
طبعا طبعا طبعا جيبتلك الأوريجنال
حسن :عملتيها ازاى ده مش موجود فى مصر اصلا سافرتى جيبتيه ولا ايه
جيداء :لا طلبته اونلاين من شهر ووصلى من حوالى اسبوع
حسن :انتى عارفة يوم عيد ميلادى من شهر
جيداء :انا عارفة يوم عيد ميلادك من ساعة ما قولتهولى لما سألتك انت برج ايه
حسن :انتى عارفة انك ملكيش حل ولا لا
جيداء :وانت عارف انك احسن واجدع راجل فى الدنيا كلها ولا لا
حسن :انتى بس اللى شايفانى كده
جيداء :اى حد هيعرفك بجد هيشوفك كده
وبعدين كويس انى لوحدى اللى شايفاك كده
الصراحة هغير لو واحدة غيرى شافتك كده
حسن :بجد هتغيرى
جيداء :بجد هغير اوى
انت عارف انك بوظتلى خططى للنهاردة
حسن :ليه يعنى
جيداء :اصلى فكرتك هتروح شغلك النهاردة قولت بعد شغلك
نخرج سوا نتغدا وندخل سينما لأن فيلم توم كروز اللى هتموت وتشوفه نزل فى السينمات بقاله يومين
وبعد ما ندخل بربع ساعة مثلا كنت هطلع الهدية وانا باصة على الفيلم وهحطها فى ايدك وهقولك
كل سنة وانت طيب يا حسن
غيرتلى الخطة كلها
بس الصراحة خطتك احلى
كل سنة وانت طيب يا حسن
كل سنة وانت فى حياتى
كل سنة وانا معاك وبقولك كل سنة وانت طيب
حسن :احنا هنجيب تورتة ونطفى شمع واتمنى امنية وكده
جيداء :لو عايز طبعا نعمل كده انت تؤمر
حسن :انا مش عايز الشمع ولا عايز التورتة انا عايز الأمنية بس ينفع
جيداء :ينفع طبعا بس امنية غير البرفان بتاع توم كروز وغير الفيلم بتاعه اللى ممكن ندخله بكرة فى القاهرة او حتى ندخله هنا فى اسكندرية لو بيتعرض فى سينما هنا
حسن :امنية اهم من كل ده امنية اهم من توم كروز نفسه
جيداء :اهم من ممثلك المفضل من وانت مراهق
دى امنية ايه دى
حسن :عايزك معايا دايما يا جيداء
جيداء :بس كده غالى والطلب رخيص
انا هفضل معاك دايما انا عايزة افضل معاك دايما
حسن :لا الطلب غالى اوى
اغلى طلب هطلبه فى حياتى
بس انا عايزه ومستعد ادفع اى حاجة واعمل اى حاجة مقابل ليه
بس ربنا يقرب البعيد
جيداء :انا مش بعيدة عنك يا حسن
انا مفيش اقربلى منك انت احلى واحسن حاجة حصلتلى فى حياتى
يمكن تفكرنى مجنونة بس انا ممتنة لزياد وتالين على اللى عملوه علشان بسبب اللى عملوه انت بقيت فى حياتى
حاسة انى عايزة اشكرهم من قلبى
اكيد مكنتش اتمنى مشاعرك تتأذى بسببهم
بس انا حقيقى مبسوطة انك فى حياتى
انت غيرتنى وغيرت حياتى للأحسن
مش غيرتها لا انت خليتها موجودة اصلا قبلك انا مكنش ليا وجود ولا كان عندى حياة
حسن :انا اللى حياتى بقت احلى بوجودك فيها
انا بحبك يا جيداء انا بحبك اوى بقالى كتير عايز اقولهالك وخايف
جيداء :خايف منى
حسن :خايف اخسرك خايف معرفش اخليكى ليا
انا عايز اتجوزك عايزك معايا على طول
جيداء :طيب ده كويس جدا
اتجوزنى وخلينى معاك على طول
حسن :اخواتك هيوافقو ولا هيفكرونى طمعان فيكى
جيداء :طمعان فى مين يا حسن
ده انت من ساعة ما عرفتك وانت مبتخلينيش اجيب لنفسى على حسابى ازازة مياه حتى
جيبت لسيف هدية ردتهالى بعد كده فى هدايا جيبتهملى وخروجات كتير بتمن الهدية واكتر
جيبتلك دلوقتى هدية متأكدة انك بتفكر هتردهالى ازاى
وانا موافقة ردهالى واشتريلى فستان فرح نتجوز بيه موافق
حسن وهو بيضحك بدموع فى عينيه :موافق الا موافق
موافق طبعا موافق جدا
بس اخواتك يا جيداء هيوافقو هيصدقو انى مش فارق معايا اللى عندك
جيداء :انت ليه محسسنى انك فقير ومش لاقى تاكل انت بتشتغل شغل كويس وعندك عربية وعندك شقة ومن عيلة مرتاحة ماديا حتى لو احنا اغنى شوية منكم مش مهم
وعندك حاجة متترفضش بسببها
حسن :حاجة ايه دى
جيداء :عندك قلب كبير يا حسن قلب حبنى وشاف فيا حاجات حلوة انا مكنتش شايفاها فى نفسى
قلب من يوم ما عرفته وانا مبقتش لوحدى ومبقتش خايفة من الناس
اخواتى هيوافقو يا حسن وهيصدقوك
ولو مصدقوكش مش مهم كفاية انا مصدقاك كفاية انا بحبك
حسن :خلاص يلا بينا نرجع القاهرة واتقدملك
جيداء :لا احنا دلوقتى نشوف سينما نتفرج فيها على فيلم توم كروز
وبعدها نتغدى ونروح
وبكرة تفاتح اهلك فى انك عايز تتقدملى وانا هبلغ اخواتى انك عايز تجيب اهلك وتيجى تتقدملى
حسن :مينفعش نعمل الحاجات دى وبعد كده نتفرج على الفيلم
جيداء وهى بتضحك :لا للأسف مينفعش
بعد تمن شهور
جيداء :انت كل شوية هتنطلى هنا مينفعش كده ده محل اكل عيش
حسن :انتى بقيتى بتقعدى مع سيف كتير وكلامك بقى بيئة على فكرة
جيداء :انا بيئة عاجبك ولا مش عاجبك
حسن :عاجبنى طبعا
بس ايه المشكلة لما اجى لخطيبتى اللى وحشتنى محل الورد بتاعها علشان اشوفها علشان هى وحشتنى
وعلشان اقولها انها احلى وردة فى وسط كل الورد اللى هى موجودة فى وسطه ده
جيداء بابتسامة :مفيش مشكلة طبعا لو جاى علشان تقول كده
حسن :والصراحة جاى علشان حاجة تانية
جيداء :انا قولت ان وراك حوار مش جاى تتملى فى جمالى اكيد
حسن وهو بيضحك :لا والله جاى علشان اتملى فى جمالك واقولك انك وحشتينى واتكلم معاكى فى موضوع
جيداء :موضوع ايه مش مطمنالك
حسن :ايه رأيك فى شهر العسل نروح ايطاليا
جيداء :سبحان الله اطمنتلك فجأة
موافقة طبعا
حسن :يعنى عادى عندك نعمل بس كتب كتاب وسط اهلنا والمقربين من اصحابنا
وبدل الفرح نسافر ايطاليا
جيداء وهى بتفكر :ماشى بس هلبس فستان فرح فى كتب الكتاب ونعمل سيشن
حسن :موافق طبعا
جيداء :بس ليه مش عايز نعمل فرح
حسن :علشان اسفرك ايطاليا مش طول عمرك نفسك تروحيها
جيداء :حسن
حسن :بصراحة مش علشان كده بس كمان علشان مش عايزك ترقصى قدام الناس كلها فى القاعة
جيداء وهى بتضحك :انت البيلى دانس معقدك فى حياتك
بس ماشى انا موافقة سفرية ايطاليا احلى واهم
حسن :انا عندى سؤال بس هموت واعرف اجابته
جيداء :بعد الشر عليك يا حبيبى
سؤال ايه ده
حسن :انتى كنتى بتلبسى ايه فى كورس الرقص ده
جيداء :بلبس لبس عادى
حسن :لبس عادى زى ايه
جيداء :لبس عادى زى اللبس اللى بلبسه وانا بتمرن فى الجيم او وانا باخد كلاسيز الزومبا
حسن :يعنى مكنش ليه لبس مخصوص
جيداء :لبس مخصوص ايه هنبلس بدل رقص مثلا
حسن :مثلا
جيداء :ايه الهبل ده اكيد لا
انا عمرى ما لبست بدلة رقص فى حياتى اصلا
حسن :لحد دلوقتى
ده قريب هيتغير
جيداء :يعنى ايه
حسن وهو بيضحك :هتعرفى بعد ما نتجوز
زياد مكنش صدمة عمرى ولا اكبر وجع مريت بيه فى حياتى
هو اه فعلا خانى وسابنى وراح خطب تالين اللى كانت وقتها حبيبة حسن اللى وقتها كان صاحبه
بس انا قلبى متكسرش من اللى زياد عمله
لأنى مكنتش بحبه انا بس كنت لوحدى وما صدقت واحد جه يقولى انا معجب بيكى وعايز نرتبط
وافقت علشان مبقاش لوحدى علشان كان نفسى احب واتحب
انما مش علشان زياد لو اى حد غيره كان طلب منى نرتبط كنت هوافق برضه
انا محبتهوش وعلشان كده متوجعتش عليه لما خانى وخطب غيرى
حسن مساعدنيش اتعافى من اللى زياد عمله فيا
حسن ساعدنى اتعافى من اللى انا عملته فى نفسى
انا خليتنى وحيدة ومليش حد ومعرفش حد ومبعملش اى حاجة فى حياتى
طول الوقت خايفة من كل الناس وطول الوقت لوحدى حتى لو كنت بين الناس
حسن خلانى اتجرأ واعمل حاجات كتير ومخافش اغلط وايه يعنى لو غلطت ما اللى مبيغلطش مبيتعلمش
انا اكتشفت ان اللى مبيغلطش مش بس مبيتعلمش لا اللى مبيغلطش مبيعش اصلا
عمره ما بيحس انه عايش لأنه اكيد مبيعملش حاجة فى حياته
لأن اى حد بيعمل حاجة فى حياته اكيد بيغلط علشان احنا بشر وطبيعى نغلط
حسن تعافى بيا وبوجودى فى حياته من صدمته ووجعه من اللى تالين وزياد عملوه فيه
انما اتعافيت بيه من اللى انا عملته فى نفسى
احنا الاتنين اتعافينا ببعض مش اتعافينا على بعض
محدش فينا كان بيستغل التانى محدش فينا كان انانى مع التانى
بالعكس احنا الاتنين حبينا بعض وحبينا حياتنا مع بعض
لازم تركز فى علاقاتك وتفرق بين اللى بيتعافى بيك وبين اللى بيتعافى عليك
وتفرق بين اللى بيستقوى بيك وبين اللى بيستقوى عليك
لأن الفرق كبير اوى بين بيك وبين عليك فخلى بالك واعرف مين بيعمل الحاجة بيك ومين بيعملها عليك
