ايثار :مش هتتعشى
احمد :لا انا هنام
ايثار :من غير ما تاكل
احمد :اه مش جعان
ايثار :طيب كل حاجة بسيطة
احمد :مش عايز
ايثار :خلاص زى ما تحب
احمد :ما اكيد زى ما احب اومال زى ما مين غيرى يحب يعنى…انتى بتعملى ايه
ايثار :بقرء شوية قبل ما انام
احمد :لا انا عايز انام اطفى النور
ايثار باستغراب :ما انت بتنام فى النور عادى
احمد :لا خلاص مبقتش بعرف انام فى النور
ايثار :خلاص هطلع بره اقرء تصبح على خير
بعد خمس دقايق
احمد بانفعال :على فكرة مينفعش كده
ايثار :هو ايه بس اللى مينفعش يا حبيبى
احمد :متقوليليش يا حبيبى دى كأنك بتحبينى
ايثار :طيب ما انا بحبك يا احمد
احمد :لا انتى مش بتحبينى
ايثار :احمد انت خدت ادويتك النهاردة ولا لا
احمد :انا هتجوز عليكى
ايثار :ماشى يا حبيبى براحتك جاوبنى بس خدت ادويتك ولا لا
احمد :هتجوز عليكى اتنين
ايثار :حبيبى الشرع حللك اربعة يعنى انت كده فاضلك تلاتة ممكن تتجوزهم لو عايز
جاوبنى بس خدت ادويتك النهاردة
احمد بانفعال :ادوية ادوية ادوية ده كل اللى هامك الأدوية
انما انا ولا فارق معاكى وعادى عندك اتجوز تلاتة عليكى طبعا ما علشان مبتحبينيش
انا عارف انك بطلتى تحبينى
ايثار :مقدرش ابطل احبك
عارف يا احمد انا ممكن ابطل احب نفسى انما مقدرش ابطل احبك ولا اقدر اعيش من غيرك
احمد :بجد يا ايثار لسه بتحبينى زى الأول
ايثار بابتسامة :بحبك اكتر من الأول يا حبيبى
احمد :اومال مكلمتينيش النهاردة ولا مرة واحدة حتى ليه
ايثار :الباقة بتاعتى خلصت بكرة بإذن الله هجددها
هو ده اللى مزعلك
احمد :ايوه
كمان انتى خرجتى بره وسيبتينى فى اوضتنا لوحدى
ايثار :انا عملت كده علشان انت مكنتش عايز النور
احمد :ما علشان انتى قاعدة تقرى ومش معبرانى خالص يعنى مش كفاية طول اليوم مكلمتينيش
لا كمان بعد ما رجعت مش معبرانى وقاعدة تقرى واولع انا مش مهم زعلى
وفى الأخر سيبانى لوحدى فى الأوضة مع انك عارفة انى مبعرفش انام غير وانتى جمبى حتى لو مش نايمة
ايثار :انا كمان مبعرفش انام غير وانت جنبى
حتى متعشتش مع انى جعانة علشان انت مرضيتش تتعشا علشان مبعرفش اكل من غيرك
احمد :انتى جعانة
ايثار :اه يا حبيبى جعانة
احمد :خلاص حضرى العشا هاكل معاكى
ايثار :ماشى وبعد ما نتعشى تاخد ادويتك علشان واضح انك مخدتهاش النهاردة
احمد بزهق :مش عايز اخدهم يا ايثار
ايثار :علشان خاطرى يا احمد لو بتحبنى
خدهم وانا هعمل فشار واصب حاجة ساقعة ونقعد نتفرج على فيلم من افلام جاكى شان اللى انت بتحبها
احمد بحماس :خلاص موافق ونقزقز لب كمان فى لب فى البيت
ايثار :لا مفيش
احمد :خلاص هنزل اجيب لب وتسالى من المقلة على ما انتى تحضرى العشا اهو كده السهرة تحلو
ايثار :متنساش تجيب درة اسبانى
احمد :مش هنسى عارف انك بتحبيه عايزة حاجة تانية من بره
ايثار :لا…بس سبحان الله نازل تجيب تسالى وتسهر معايا تتفرج على فيلم مش كنت عايز تنام من شوية ومكنتش جعان
احمد بحرج :لا الصراحة مكنتش عايز انام ولا حاجة
انا من امتى بنام بدرى كده
وصراحة انا جعان
وبعدين ايه مش عاجبك ادخل انام يعنى
ايثار :لا طبعا يا حبيبى عاجبنى وانا اطول اسهر مع احمد حبيبى اللى مليش غيره فى الدنيا
احمد :انتى عارفة انى بحبك اكتر من حياتى صح
ايثار :عارفة يا حبيبى وانا كمان بحبك اوى
احمد :وعارفة انى مش ممكن اتجوز واحدة غيرك ابدا صح
ايثار :عارفة يا حبيبى
احمد :يعنى انتى مش زعلانة منى انا كنت بقول كده وخلاص
ايثار :لا مش زعلانة انا مبعرفش ازعل منك اصلا
احمد :ماشى انا هنزل اجيب الحاجات بسرعة وارجع
ايثار :ماشى يا حبيبى مستنياك
تانى يوم
ايثار :صباح الفل يا حبيبى
احمد :صباح الورد
الرصيد وصلك
ايثار :اه وجددت الباقة وفضل رصيد كمان انت باعت كتير اوى
احمد :مش كتير عليكى يا حبيبتى
بعد كده تعرفينى قبل ما الباقة تخلص بكام يوم علشان اشحنلك من قبلها
ايثار :حاضر ربنا ميحرمنيش منك
احمد :ولا يحرمنى منك يا حبيبتى
فى البلكونة
سلمى :مش مصدقة نفسى ولاء هتتجوز اخيرا حاسة اكنه جبل واتشال من على قلبى
انتى مش متخيلة انا كنت ببقى هموت ازاى وانا عارفة انها معجبة بجمال وبتحاول تلفت نظره
ايثار :هى قالتلك انها معجبة بيه
سلمى :لا بس انا حسيت كان باين عليها
فضلت كتير تحاول تلفت انتباهه لحد ما زهقت منه والحمد لله رمت طوبته
ايثار :ليه هو البعيد اعمى مبيشوفش ولا هو مبيحسش شكله
سلمى :ايثار متغلطيش فى جمال
ايثار :خلاص يا اختى مش هغلط فى حبيب القلب هدخل اعمل لنفسى لنسكافيه يروق دمى اللى ابن خالتك حارقه ده وارجعلك
سلمى :ماشى اعمليه بسرعة وتعالى
ايثار :بقولك ايه ما تجيلى واعملك معايا ونقعد عندى ونشغل المروحة الجو حر فى البلكونة
سلمى :خلاص هقول لماما واجيلك
بعد خمس دقايق
سلمى :متحطيش تانى انا بشربه معلقتين سكر
ايثار :بس لا انا بشربه باربع معالق
سلمى :كتير اربعة
ايثار :كتير ايه ده احمد بيشربه بخمس معالق سكر وساعات ستة
سلمى وهى بتضحك :ده كده مش نسكافيه ده كده شربات تعملو صينية بسبوسة وتسقوها بيه
بس كويس دى حاجة مشتركة بينكم
ايثار :احنا فى بينا حاجات كتير مشتركة
احمد ده نصى الحلو بزيادة
سلمى وهى بتضحك :كلامك عنه وفرحتك بسببه بتخلينى ابغى الزواج وانا ما ابغاه
ايثار وهى بتضحك :اطلعى من دول هى مين دى اللى ما تبغى الزواج
وحياة جمال ابن خالتك
سلمى وهى بتضحك :خلاص خلاص انتى هتسيحيلى
ايوه ما هو انا ابغى اتجوز جمال وبس
انا بحبه اوى يا ايثار اوى
ايثار :طيب جربتى تقوليله
سلمى :اقوله ازاى يعنى يا ايثار انتى عبيطة لا طبعا هو اللى يقول الأول
يقولها بس وانا هقولها وراه على طول بس هو يقولها
انا نفسى يقولها اوى
ايثار :مش قصدى تقوليهاله مباشرة كده يا سلمى
بس يعنى تجيبيها من بعيد تلمحيله يعنى تبينيله انه عندك مش زى اى حد
سلمى :بصى هو انا بلمحله كتير وبحاول احسسه انه مهم عندى
ايثار :حلو ده بتعملى ايه بقى
سلمى :بقوله اذيك يا جمال كل ما اشوفه حتى لو شوفته خمس مرات فى اليوم بقولهاله خمس مرات فى اليوم
ايثار :بتقوليله اذيك كل ما تشوفيه لا كتر خيرك والله
سلمى :ما انا بقوله اذيك يا جمال وبتك على جمال وانا بقولها
وببتسم كمان وانا بقولها كل مرة ببتسم
ايثار :وكده هو المفروض يعرف انك بتحبيه
سلمى :ما هو مش المفروض يعرف انى بحبه يا ايثار
ايثار :كده يعنى هيعرف انه مهم عندك
طيب ما انا بقول لعم سيد بتاع الخضار اذيك يا عم سيد وببتسم فى وشه لما بروح اشترى منه الخضار كده ابقى بحبه يعنى ونفسى اتجوزه
سلمى :معرفش يا ايثار بس انا مينفعش اعمل اكتر من كده
حيائى هيمنعنى انا متربتش على كده
لو عملت غير كده هنزل من نظر نفسى ومن نظر جمال نفسه
انتى عايزاه يقول عليا واقعة
ايثار :وهو انتى يعنى مش واقعة
سلمى :لا انا واقعة بس هو مش لازم يعرف انى واقعة
يقع هو فيا الأول وبعد كده ابقى اقوله ان انا كمان واقعة فيه
ايثار :شخصيتك قوية لا عجبتينى
سلمى :لا انا جامدة اوى وشخصية اوى اوى وبحبه اوى اوى اوى بقى
ايثار وهى بتضحك :طيب كملى جامدة للأخر كنت قربت اصدقك
سلمى :اعمل ايه يعنى اكدب ما انا بحبه هنكر ليه
بحبه بس مينفعش اقوله لازم هو يقولى الأول
هو انتى اللى قولتى لأستاذ احمد انك بتحبيه الأول ولا هو اللى قالك
ايثار بابتسامة :لا هو اللى قالى الأول
سلمى :الله انا بحب الحاجات دى اوى قالهالك ازاى
ايثار :احنا كنا فى مجموعة دعم نفسى كان عندنا جلسة وبعد ما خلصناها هو طلب منى نروح سوا نشرب حاجة فى اى حتة
دى كانت اول مرة يطلب منى انه يخرج معايا
احنا اتعرفنا فى عيادة الدكتور النفسى اللى احنا الاتنين بنروحله ومع الجلسات الجماعية قربنا من بعض شوية وبقينا بنتكلم فى الموبايل كتير بس عمرنا ما اتقابلنا بره عيادة الدكتور
سلمى :وانتى حسيتى بإيه لما طلب منك تخرجو سوا فرحتى
ايثار :فرحت اه
سلمى :كنتى حاسة انه طلب تخرجو علشان يقولك انه بيحبك
ايثار :لا توقعت اننا هنقعد سوا نتكلم فى اى حاجة عادى زى ما بنتكلم فى الموبايل
بالكتير يلمحلى انه معجب بيا
انما يقولى انه بيحبنى مرة واحدة لا متوقعتهاش
بس هو احمد كده مش متوقع
سلمى :هو قالهالك ازاى
احمد :ايثار هو انتى شايفانى ازاى ايه رأيك فيا يعنى
ايثار :انت انسان طيب وحنين وجدع وراجل وقد كلمتك عصبى شوية بس قلبك ابيض وبتيجى من قريب
احمد :يعنى انا انسان كويس صح
انتى شايفانى انسان كويس
ايثار :انا شايفاك انسان كويس جدا
احمد :هو انا لو قولتلك بحبك تزعلى
ايثار بصدمة :قولت ايه
احمد :بسألك لو انا قولتلك انى بحبك تزعلى منى
ايثار :لا مش هزعل منك
احمد :طيب انا بحبك يا ايثار بحبك اكتر من حياتى
بحب حياتى لأنك فيها
ايثار بسعادة :طيب دى حاجة حلوة
احمد :يعنى انتى مش مضايقة ولا زعلانة منى علشان بحبك
ايثار :لا واضايق او ازعل ليه
احمد :علشان يعنى انا مريض نفسى وبروح لدكتور علشان اتعالج
اى بنت بيبقى نفسها يحبها واحد طبيعى
ايثار :ومين قال انك مش طبيعى
وبعدين وهو انا يعنى بروح للدكتور علشان اغيرله ديكور العيادة ما انا كمان بتعالج يا احمد
احمد :لا يا ايثار انتى حالتك ابسط من حالتى بكتير وان شاء الله قريب متبقيش محتاجة للدكتور
ايثار :ممكن مبقاش محتاجة للدكتور بعدين
بس الأكيد انى محتاجالك فى حياتى دايما
على فكرة انا مبسوطة انك قولتلى انك بتحبنى
احمد بسعادة :بجد والله مبسوطة
ايثار بابتسامة :بجد والله مبسوطة
سلمى بابتسامة :الله بقى يا بختك
عقبال ما جمال يقولهالى يا رب
وحصل ايه بعد كده
ايثار :فضلنا بنتكلم فى الموبايل تقريبا كل يوم بعدها
وبعد اسبوعين او عشر ايام طلب منى نخرج
بس ماما رفضت قالتلى مينفعش اخرج معاه
قولتله اللى ماما قالته قالى هو انا لو اتقدمتلك توافقى عليا
قولتله مينفعش يتقدملى علشان ماما رفضت نخرج سوا
سلمى :ليه يا بنتى كده بس هو حد طايل طيب يا رب جمال يتقدملى لأى سبب وانا هوافق عادى
وهو قالك ايه ساعتها
ايثار بابتسامة :قالى انا اصلا بتلكك وما صدقت
انا كنت عايز اطلب منك انى اتقدملك لما قولتلك انى بحبك بس خوفت اكون كده بضغط عليكى بحاجات كتير
فقولت استنى شوية
بس لو انتى شايفة انه لسه بدرى ومحتاجة شوية وقت مش مشكلة انا هستناكى شوية
هستناكى عمرى كله
سلمى :انا محتاجة اعرف جمال على استاذ احمد علشان يتعلم منه الرومانسية
انتى رديتى عليه قولتيله اوعى تكونى قولتيله انك مش موافقة
ايثار :قولتله انا بحبك انا موافقة وبحبك
سلمى وهى بتصفر :اهى دى الردود ولا بلاش
عقبال ما اقول لجمال انا موافقة وبحبك
دى كانت اول مرة تقوليله انا بحبك فيها
ايثار :اه ومن يومها لحد النهاردة مبطلتش اقولها
احمد ده مش مجرد راجل حبيته واتجوزته
احمد ده امانى ده اللى طمن كل المخاوف اللى كانت عندى
طول عمرى كنت خايفة ملاقيش حد يتحمل اهتمامى الأوفر بيه
انا لما بحب حد بهتم بيه جامد بغرقه حب واهتمام كده باخد بالى منه جامد
مبعرفش بقى اتقل وارسم نفسى والحاجات دى
قبل احمد انا كنت مخطوبة والخطوبة اتفسخت علشان هو زهق قال انى خنقاه
وقتها ماما قالتلى ان الرجالة مبتحبش الست اللى تهتم بيهم جامد بيتخنقو
بيحبو الست اللى اهتمامها يكون محسوب بالقطارة اللى تخليهم يلفو حوالين نفسهم علشان تهتم بيهم وتبين حبها ليهم
حاولت اعمل كده ومعرفتش دى مش طريقتى فى الحب
انا كده مع اهلى واصحابى واى حد بحبه
لازم اخد بالى منهم واقف جنبهم لو معملتش كده اومال ابقى بحبهم ازاى
وشايفة انى مينفعش اعمل كده مع حبيبى او جوزى
ليه اتقل عليه والففه حوالين نفسه علشان اهتم بيه واركز معاه شوية
انا بحبه ليه معبرش عن حبى ده بكلامى وافعالى واهتمامى
كنت خايفة ملاقيش اللى يحبنى ويتحمل طريقتى فى الحب
بس احمد مش بس متحمل طريقتى احمد بيحب طريقتى فى الحب
وبيحبنى بنفس الطريقة بيعبر عن حبه بكلامه وافعاله واهتمامه يمكن انا بعمل ده اكتر لأن انا الست واحنا بطبيعتنا رومانسيين اكتر منهم وعاطفيين بزيادة عنهم
بس الحمد لله هو عمره ما كرهنى فى نفسى ولا خلانى اتضايق من طريقتى فى الحب
كمان لما بدأت اروح لدكتور نفسى واحدة صاحبتى قالتلى انتى كده مش هتلاقى حد يتجوزك
مين هيتجوز واحدة بتروح لدكتور نفسى
سلمى :ما هو استاذ احمد نفسه راح لدكتور نفسى
ايثار :عادى فى رجالة ممكن تقولك انا متجوزش واحدة راحت لدكتور نفسى حتى لو كان هو نفسه راح
زى الرجالة اللى بتقولك متجوزش واحدة حبت ولو مرة واحدة قبلى مع انه ممكن يكون حب عشر مرات وصاحب سبع مرات واتجوز مرتين عرفى
انما لما يجى يتجوز لازم يتجوز واحدة مشافتش ولا عرفت فى حياتها راجل غيره
احمد عمره ما حسسنى ان فى مشكلة انى روحت لدكتور نفسى بالعكس هو مقدر انى كنت محتاجاه وعلشان كده روحت ودى حاجة متقللش منى فى حاجة
انا عمرى ما شوفت نفسى قليلة فى عيون احمد
دايما بشوفنى حاجة كبيرة اوى فى عيونه
عمره ما حاول يقلل منى او يهنى
وعلشان كده انا بحبه وبحب حياتى معاه اوى
سلمى :هيييييح بقى اوعدنا يا رب
ايثار :هو انتى مبتشوفيش نفسك حاجة كبيرة فى عيون جمال
سلمى :انا مبشوفش نفسى فى عيون جمال اصلا
لا بشوفنى حاجة كبيرة ولا حاجة صغيرة بحس انه مش شايفنى من اساسه
ايثار :مش معقول يكون مش شايفك انتم عايشين فى بيت واحد وهو مش اعمى يعنى
سلمى :مش يشوفنى اللى هى يبصلى يا ايثار
انا قصدى ياخد باله منى احس انى حاجة مهمة كده عنده
ايثار :يمكن انتى فهماه غلط
سلمى :معتقدش انى فهماه غلط لا
ايثار :خلاص نتأكد
سلمى :نتأكد ازاى يعنى
ايثار :بالتجربة العملى
انتى هتلبسى ايه النهاردة فى الفرح
سلمى :بنطلون اسود وبلوزة شيفون رمادى
ايثار :انتى بتهزرى صح
سلمى :مش حلو الرمادى
خلاص انا عندى واحدة دانتيل بمبى فى كحلى فى ابيض وعندى كمان واحدة ستان لونها احمر اظن الأحمر حلو وسواريه جدا اهيه
ايثار :ليه بنطلون وبلوزة من اصله يا سلمى حتى لو سواريه
البسى فستان احسن
سلمى :انا معنديش فستان ينفع انا معنديش فساتين اصلا
ايثار :ليه يا حبيبتى هو انتى مش بنوتة وزى القمر اهوه معندكيش فساتين ليه
سلمى :مبحسش انى بليق فيهم يا ايثار
ايثار :مفيش وقت ننزل نشتريلك فستان ولا حتى نأجرلك
سلمى :ملوش لزوم هلبس فستان ليه هو انا العروسة
ايثار :وهى العروسة بس اللى بتلبس فستان
بعد الفرح هننزل نعمل شوبينج سوا وهنشتريلك فساتين سوارية وفساتين عادية
ودلوقتى تعالى معايا هشوفلك فستان من عندى تلبسيه النهاردة
سلمى :صدقينى مش مستاهلة
ايثار :سلمى من غير مناهدة قومى معايا يلا
بعد عشر دقايق
ايثار :انا وانتى جسمنا مش واحد فللأسف فساتين كتير من عندى مش لايقين عليكى بس استنى…ايه رأيك فى ده
سلمى :هو حلو لونه جميل
ايثار :واستايله يليق عليكى وعليا
خلصانه انتى هتلبسى الفستان ده فى الفرح النهاردة
سلمى :مش اوفر انى اروح الفرح بفستان خطوبتك
ايثار :لا مش اوفر الفستان مش مبهرج هو سيمبل وحتى مش منفوش اوى نفشته بسيطة خالص
كمان انا كنت لابسة تاج فوق الطرحة انتى مش هتلبسى تاج
فهيكون مقبول متقلقيش
سلمى :مش عارفة بس…
ايثار قاطعتها :مفيش بس انا قررت هتلبسيه يعنى هتلبسيه
وبالليل تيجيلى علشان اعملك شعرك واحطلك ميكب
سلمى :يا ايثار ملوش لزوم انا مش عايزة اتعبك كمان انا مبحبش الميكب
ايثار :مفيش تعب ولا حاجة
كمان ميكب ايه اللى مش بتحبيه معلش مش لازم تحبيه المهم تيجيلى علشان اظبطك ولا اقولك تعالى البسى هنا واعملك شعرك واحطلك الميكب بعدها متقلقيش احمد مش هيجى النهاردة قبل الساعة تسعة
سلمى :خلاص ماشى
بالليل
سلمى :ها شكلى حلو
ايثار :حلو اوى يا بنت الايه كنتى مخبية الجمال ده كله فين
وقال ايه بتقولى الفساتين مبتليقش عليكى ده الفستان عليكى احلى من ما كان عليا
سلمى :ده بس علشان انتى كنتى لابسة عليه حجاب انما انا بشعرى
ايثار :لا مش علشان كده الفستان نفسه احلى عليكى مظبوط عليكى اكتر
انا قررت اديهولك خلاص
سلمى :لا تديهولى ليه انا مش هلبسه تانى هى المرة دى وبس
ايثار :هنشوف الموضوع ده بعدين
سلمى :ماما بترن عليا واضح انهم لبسو خلاص انا هروحلهم بقى
ايثار :ماشى يا حبيبتى وبكرة تيجيلى علشان تحكيلى اللى حصل بالتفصيل
اما نشوف هتوقعى كام عريس النهاردة وانتى زى القمر كده
سلمى :انا مش عايزة اوقع غير واحد بس يا رب يقع بقى ويخلصنى
ماما بترن تانى انا همشى سلام
سلمى :معلش لو اتأخرت عليكم يا ماما
اسماء :متأخرتيش ولا حاجة يا حبيبتى ده شريف وجمال لسه بيلبسوا انا بس قولت انبهك اننا قربنا نخلص
بس ايه الجمال ده ربنا يحميكى يا حبيبتى ويكفيكى شر العين
سلمى :شكرا يا ماما
محمد :شكلك حلو اوى بالفستان ده يا سلمى
سلمى :بجد يا بابا
محمد :بجد طبعا ده انتى ولا عشر عرسان هيطلبوكى منى النهاردة كده
سلمى وهى بتضحك :ايثار برضه قالتلى كده
اسماء :عندها حق
شريف وهو خارج من الاوضة وبيصفر :اوبا احنا عندنا ضيوف ولا ايه…لا ده انتى سلمى ايه يا سلمى الجمال ده انتى رايحة تقطعى على العروسة ولا ايه
سلمى :مش للدرجة دى يا شريف
شريف :لا كده وابو كده كمان
جمال وهو خارج من الاوضة :يلا بينا يا جماعة علشان…ايه ده يا سلمى ايه اللى انتى لابساه ده
سلمى :فستان
جمال :ما انا شايف انه فستان لابساه ليه وايه اللى عاملاه فى شعرك ووشك ده
اسماء :ايه يا جمال عادى حاطة مكياج وعاملة شعرها ولابسة فستان مش رايحة فرح
جمال :بس هى لسه صغيرة يا ماما على الحاجات دى
اسماء :لا مش صغيرة اللى قدها بيعملو كده واكتر من كده كمان
محمد :يلا بينا طيب علشان منتأخرش على الفرح
تانى يوم
سلمى :خدى الفستان بتاعك
ايثار :مش قولت انه هدية ليكى
سلمى :لا مش عايزاه ومش عايزة البس فساتين تانى اصلا ولا حتى فستان فرحى
انا اصلا مش عايزة اتجوز خلاص
ايثار :اهدى طيب
سلمى :مش ههدى وشيلى الفستان ده من قدامى يا ايثار لو سمحتى
ايثار :خلاص هدخله واصبلنا عصير واجى
ايثار :اشربى العصير واحكيلى فى ايه الفستان معجبهمش عليكى
سلمى وهى بتشرب العصير :الفستان عجب كل الناس كل اللى فى الفرح قالولى حلو فستانك يا سلمى ايه الجمال ده يا سلمى ايه الحلاوة دى يا سلمى حتى ولاء العروسة لما قولتلها ان فستانها حلو اوى قالتلى انتى كمان فستانك حلو وشكلك زى القمر النهاردة
تخيلى العروسة قالتلى كده وهو لا
كل الناس عجبهم الفستان وعجبهم شكلى ما عدا الإنسان الوحيد اللى كان نفسى شكلى يعجبه
ايثار :جمال مقالكيش ان شكلك حلو
سلمى :جمال قالى ايه اللى انتى لابساه ده وايه اللى عملاه فى شعرك ووشك ده ان مينفعش كده انتى لسه صغيرة على الحاجات دى
شايفنى عيلة فى تالتة اعدادى باين
تصدقى بالله روان اخت ولاء كانت لابسة فستان وحاطة مكياج وهى فى تانية اعدادى
فهو كده غالبا شايفنى فى ابتدائى ومحصلتش اعدادى حتى
ولا هو مش شايفنى بنت من اصله
ايثار :لو هو مش شايفك بنت نخليه احنا يشوفك بنت
سلمى :لا يا ايثار مينفعش هو يا يشوفنى من نفسه ويحبنى لوحده
يا عنه ما شافنى ولا حبنى
وانا خلاص هبطل احبه ده قرار نهائى
ايثار :قرار نهائى طيب عينى فى عينك كده
سلمى :يا ستى بكدب ومش هعرف اتنيل ابطل احبه
بس برضه مش هعمل حاجة تخليه يشوفنى بنت دى
مينفعش اتغير علشان يحبنى هو المفروض يحبنى زى ما انا
وبعدين هو لو حبنى بعد ما اتغير كده يبقى محبنيش انا محبش سلمى
وسلمى تستاهل انه يحبها يا ايثار
ولا متستاهلش ولا ايه
ايثار :لا يا حبيبتى سلمى تستاهل ان احسن راجل فى الدنيا يحبها
سلمى :انا مش عايزة حد غيره يحبنى
انا عايزة جمال اللى يحبنى لأنه فى عيونى احسن راجل فى الدنيا كلها
انا بحبه زى ما هو وعايزاه يحبنى زى ما انا لأنه لو محبنيش زى ما انا يبقى مبيحبنيش يا ايثار
ايثار :معاكى حق
طيب بعيدا عن ده كله انتى كنتى شايفة الفستان حلو عليكى امبارح صح
سلمى :بصراحة اه
كنت حاسة وانا لابساه انى زى سندريلا
بس سندريلا من غير امير
بس الفستان كان عاجبنى ومحسسنى انى زى الفراشة كده
حبيته بجد
ايثار :طيب ما تقبليه منى هدية بقى
سلمى :لا مينفعش ده فستان خطوبتى
يعنى ليه ذكرى مهمة وحلوة عندك مينفعش اخده
بس ممكن اشترى زيه
ايثار :ماشى نجبلك زيه ونجبلك كمان كام فستان كده
مش علشان حد علشانك انتى نفسك
سلمى :ماشى انا كنت فاكرة كل الفساتين مش هتبقى حلوة عليا بس واضح ان فى استايلات بتليق عليا فهشترى الاستايلات اللى تليق عليا دى
ايثار :تمام يا حبيبتى اتفقنا
بس ابن خالتك ده بجد مبيفهمش فستان ايه ده اللى مش عاجبه عليكى ده انتى كنتى قمر امبارح
سلمى بسخرية :مقالش شكلى وحش قال انى صغيرة على الكلام ده
هو انتى خلتينى البس كده ليه امبارح اصلا
ايثار :كنت عايزة اشوفه هياخد باله من شكلك ولا لا واشوف هيقول ايه
سلمى :هو خد باله اه واديكى عرفتى اللى قاله
بس طبيعى ياخد باله يا ايثار كل اللى شافونى امبارح خدو بالهم انى مختلفة عن العادى بتاعى
كلهم قالولى كلام حلو ما عدا هو حارق دمى من امبارح لازم اخد موقف معاه
ايثار :حلو ده هتعملى ايه
سلمى :هبطل ابتسم فى وشه لما اشوفه واقوله اذيك يا جمال
ايثار وهى بتضحك :عقاب قاسى اوى ده يا سلمى
شوفى حاجة حنينة عن كده يعنى مثلا قوليله اذيك يا جمال بس متبتسميش فى وشه
سلمى :معاكى حق خلاص انا هعمل كده فعلا
احمد :ايه رأيك النهاردة بعد ما اخلص السيشن مع دكتور عادل اجى اخدك ونروح نتغدى بره وندخل سينما ولا نروح نقعد على الكورنيش ولا نروح نتمشى فى وسط البلد بقالنا كتير مخرجناش
ايثار :موافقة طبعا بس مترجعش على البيت علشان منضيعش الوقت نتقابل بره احسن
احمد :خلاص ماشى
احمد :حبيبتى خمس دقايق بس هسحب فلوس اللى معايا مش كتير
ايثار :خلاص يا حبيبى انا هقف استناك
احمد :ما تقعدى فى اى كافيه وانا هسحب واجيلك
ايثار :مش مستاهلة يا احمد اسحب وانا هستناك هنا ونتحرك سوا
احمد :خلاص ماشى
بعد عشر دقايق
ايثار :طولت ليه الماكنة كانت مهنجة ولا الفيزا فيها مشكلة
احمد :لا الماكنة كانت مهنجة
هو مين اللى كان واقف معاكى ده
ايثار :واحد معرفوش يا احمد
احمد :ولما انتى متعرفيهوش واقفة معاه ليه
ايثار :انا مكنتش واقفة معاه هو كان بيسألنى السينما هنا فى انهى دور
احمد :وهو ساب المول كله وجاى يسألك انتى ليه
ايثار :وانا اعرف منين واحد سألني سؤال وجاوبته وخلاص مكبر الموضوع ليه
كمان انت مخدتش بالك انه كان معاه بنت مش معقول يعنى هيكون بيعاكسنى وهى معاه
ولا انا هسمحله ولا هسمح لأى حد انه يتخطى حدوده معايا اظن ان انت المفروض انك عارفنى كويس وعارف اخلاقى
روحنى يا احمد
احمد :ليه بس مش قولنا بعد الفيلم هنروح نتمشى فى وسط البلد ونتعشى هناك وبعدين نرجع البيت
ايثار :لا خلاص كفاية اتغدينا بره ودخلنا السينما
انا تعبانة وعايزة اروح
احمد :انتى زعلانة منى صح
ايثار :لا انا مش زعلانة منك
احمد :لا زعلانة وعلشان كده عايزانا نروح
انا عارف انى قارفك معايا بالأفكار الغلط والوساوس اللى عندى دى
ايثار :انا مش قرفانه معاك ولا حاجة
وبعدين مش انا وضحتلك اهو ان تفكيرك غلط فى الموقف ده
احمد :ولحد امتى هتتحملى وتوضحيلى بالعقل وتناقشينى فى افكارى علشان تعرفينى انها غلط
انا تاعبك معايا يا ايثار وانتى اكيد زهقتى منى
ايثار :انا عمرى ما ازهق منك يا احمد وتعبك راحة
احمد :لا يا ايثار تعبى مش راحة تعبى صعب انا عارف انك مستحملة علشان بتحبينى
وان اللى بعمله ده هيفضل ياخد من حبى فى قلبك لحد ما تبطلى تحبينى ومتبقيش قادرة تكملى معايا
بس غصب عنى والله غصب عنى
انا بتابع مع الدكتور وبحضر سيشنز وباخد الدوا وبقاوم نفسى وافكارى
بس ده كله مش كفاية
ايثار :مين قال انه مش كفاية بس
ده اكتر من كفاية كمان انت بتقاوم نفسك علشانى بتحارب نفسى علشان خاطرى
ده يا بختى بيك والله
احمد :يا بختى انا بيكى يا ايثار انا بحبك اكتر من حياتى
عارف انى تاعبك ومش عارف اعمل ايه اكتر من اللى بعمله ومش قادر اقولك كملى حياتك مع حد غيرى
انا مقدرش اعيش من غيرك يمكن دى انانية
بس انا عايزك معايا دايما ومضايق من اللى بعمله فيكى غصب عنى ومش عارف اعمل ايه
ايثار :متعملش حاجة يا احمد انت عامل اللى عليك وزيادة
انا مش هنكر ان اللى بتعمله مش سهل هو صعب
بس انت بتعوضنى عنه بتعمل حاجات حلوة تعوضنى بيها وتدينى طاقة مش بس طاقة اكمل بيها معاك
لا طاقة اكمل بيها حياتى اصلا
وجودك فى حياتى محليها يا احمد مخليها حياة من اصله
لو فاكر ان وجودك فى حياتى مخليها صعبة اعرف ان غيابك عن حياتى هيخليها اصعب بكتير اوى
انا مليش غيرك ومش عايزة يكونلى غيرك
وحتى لو انت فكرت تسيبنى انا عمرى ما هسيبك
لأخر عمرى هفضل معاك وهفضل على اسمك
احمد بدموع فى عيونه :انتى عارفة انى بحبك اكتر من حياتى صح
ايثار وهى بتمسك ايده :عارفة يا حبيبى وانا كمان بحبك اوى
يلا بينا على وسط البلد
احمد بابتسامة :يلا بينا يا حبيبتى
بعد خمس شهور
ايثار بصدمة :خالتك عملت ايه سمعينى تانى كده
سلمى :جاتلى اوضتى وقالتلى ان بابا محمد رفض العريس اللى متقدملى زى ما انا كنت عايزة
وقالتلى ان ده سابع عريس نرفضه ونقول علشان لسه بتدرس بس خلاص كلها كام شهر واتخرج ومش هيبقالنا حجة
وبصراحة هى مش عايزانى اطلع بره فاختار انا عايزة مين شريف ولا جمال
ايثار :ولو افترضنا انك مش عايزة واحد من الاتنين
سلمى :قالتلى انهم مش هيغصبونى على حاجة
كل الحكاية انها بتحبنى ومش عايزة تقلق عليا لو اتجوزت حد غريب
وعارفة انها مش هتلاقى لشريف ولا لجمال عروسة احسن منى
بس القرار قرارى ومهما حصل انا هفضل بنتها وهى ماما
ايثار :وانتى قولتيلها ايه
سلمى :سألتها شريف وجمال عارفين بكلامها ده
ايثار :وقالتلك ايه
سلمى :قالتلى لا ولا حتى بابا محمد يعرف دى حاجة بينها وبينى علشان متضغطش عليا وعلشان بابا محمد ميزعلش لو انا رفضت برضه
قالتلى انى لو اختارت حد هى هتكلمه وتشوف لو هو عايزنى
بس مش هتقوله طبعا انها قالتلى وانى اختارته
لا هى هتقوله انها عايزانى ليه وتشوف هو ايه رأيه
ايثار :هى كده صح علشان لو افترضنا ان هو رفض ميبقاش شكلك وحش قدامه
انتى رديتى عليها بإيه طيب
سلمى :انا قولتلها انها فجأتنى قالتلى فكرى براحتك يا حبيبتى
بس وانا بفكر معاكى اهو
اقولها ايه
ايثار :انتى عايزة جمال
سلمى :ايوه طبعا بس اكيد مش هقولها انى عايزة جمال
هتحرج منها وافرضى رفض يبقى شكلى ايه قدامها
ايثار :خلاص انتى ممكن تقوليلها انك بتعتبرى شريف زى اخوكى الكبير خصوصا ان فرق السن بينكم عشر سنين وده فرق كبير بالنسبالك وكمان هو عايش معاكم من لما جيتى تعيشى هنا
انما جمال فرق السن بينكم خمس سنين بس وكمان هو كان قاعد فى السكن الجامعة لما كان فى الكلية وعلشان كده انتى مش شايفاه اخوكى زى شريف
وانك مش موافقة بس يعنى ممكن تفكرى فى جمال انما شريف مستحيل تعرفى تفكرى فيه لأنه بالنسبالك اخوكى الكبير
وتأكدى عليها انها زى ما قالت تكلم جمال ومتجبش سيرتك خالص بالعكس تقوله انها لسه هتفاتحك فى الموضوع
وكمان تقوليلها انك بعدها هتتكلمى مع جمال وتشوفى اذا كان مناسب ليكى وممكن توافقى عليه ولا لا
وانها زى ما قالت انتم زى ما انتم مهما حصل
وقوليلها برضه انه لو جمال مثلا موافقش عادى وده حقه وانتم زى ما انتم
وانها متعرفوش انك تعرفى اصلا انها كلمته عنك
سلمى :خلاص ماشى انا هعمل كده
بس تفتكرى هو هيوافق ولا هيرفض انا مرعوبة ليرفض
مش هعرف ابص فى عيونه وانا عارفة انه رفضنى
مش هعرف اتعامل معاه وانا عارفة انه قال لا مش عايز سلمى
لو رفضنى مش هقدر افضل عايشة معاهم يا ايثار هروح اعيش مع اى حد فى اعمامى
انا زمان اختارت اعيش مع خالتى علشان هى الوحيدة اللى كنت متعودة ابات عندها علشان العب مع ايناس وماما كانت بتبقى مطمنة عليا هنا
لما بابا وماما ماتو انا اختارت اعيش مع خالتى علشان كنت بحس وانا فى بيتها انى فى بيتى
لو جمال رفضنى مش هقدر اعيش معاه فى نفس البيت مش هعرف
ايثار :ان شاء الله مش هيرفض ولا حاجة هو يطول اصلا
ده انتى قمر هيلاقى زيك فين
سلمى وهى بتعيط :الدنيا مليانة بنات حلوة واحلى منى كمان
بس مش هيلاقى فيهم واحدة تحبه قدى مهما دور
ايثار وهى بتحضنها :ربنا يجعله من نصيبك يا حبيبتى
سلمى :يا رب يا حبيبتى
عارفة انا مهونش عليا فراق ايناس بعد ما اتجوزت غير وجودك
لو مكنتيش جيتى انتى واستاذ احمد سكنتو فى الشقة اللى جنبنا انا معرفش كان هيحصلى ايه من غيرك
ايثار :انا كمان وجودك معايا هنا هون عليا كتير وفرق معايا جدا ربنا يعلم انا بحبك قد ايه يا سلمى
المهم انا عايزاكى تهدى كده وتروحى تقولى لخالتك اللى قولتهولك ده
وخير بإذن الله انا متفائلة وحاسة ان فى فرحة كبيرة جاية
سلمى :يا رب يا ايثار يا رب
بعد تلت ايام
سلمى :لما قالتلى انه جمال وافق على طول مجرد ما فاتحته فى الموضوع فرحت يا ايثار فرحت اوى
بس قبل ما اتكلم واقولها ان انا كمان موافقة لقتنى بفكر هو جمال وافق على طول فعلا ولا هى اتحايلت عليه
وحتى لو وافق يا ترى وافق علشانى علشان عايزنى
ولا علشان يفرح ماما اسماء وبابا محمد لأنه عارف ان جوازنا هيفرحهم لأنهم بيحبونى
بس انا مش عايزة كده انا عايزاه هو اللى بيحبنى وهو اللى عايزنى وفرحان بيا
من حقى اتجوز واحد بيحبنى وعايزنى وفرحان بيا
ايثار بخوف :انتى قولتى لخالتك ايه اوعى تكونى قولتيلها لا يا سلمى
سلمى :فكرت اقولها لا بس لسانى مطاوعنيش
مقدرتش اقول مش عايزاه وانا عارفة ان قلبى مش عايز غيره
قولتلها انى كلها شهرين واكون امتحنت وخلصت اخر سنة ليا فى الجامعة
هفكر بعدها واقولها قرارى لأنى دلوقتى مركزة فى دراستى ومتوترة وخايفة من الإمتحانات علشان الترم ده صعب اوى ومش عايزة خوفى وتوترى يأثرو على قرارى
ايثار :كويس وبعد ما تخلصى هتقوليلها ايه هتوافقى ولا هترفضى
سلمى :انا بحبه وده مخلينى عايزة اوافق
بس هو مبيحبنيش وده مخلينى عايزة ارفض
محتارة اوى يا ايثار
كنت مفكرة انه مجرد ما يوافق هوافق وانا طايرة من الفرحة بس لقتنى بفكر هو ليه موافق
اصلها تفرق يا ايثار هو موافق ليه تفرق مش كده
ايثار :تفرق يا حبييتى طبعا
ربنا يريح قلبك يا رب ويسعدك
بعد شهر
سلمى وهى بتعيط :انا مش عارفة اركز فى المذاكرة مش عارفة افكر فى حاجة غيره يا ايثار انا ضعيفة اوى
ايثار :لا يا سلمى انتى مش ضعيفة انتى قوية وقوية جدا كمان
عارفة انا احتاجت اروح لدكتور نفسى واحضر جلسات دعم نفسى وعلاج جماعى علشان بابا مات ومكنتش قادرة اتقبل فكرة موته دى لوحدى
كنت حزينة ومكتئبة وحاسة انى مش عايزة اعيش بعده
وبدل ما انتحر واموت كافرة قررت اروح لدكتور نفسى يساعدنى اتقبل موت بابا وابطل اقول ليه يا رب اشمعنا ابويا انا ما كل البنات ابهاتهم معاهم كنت محتاجة لدكتور يعلمنى ازاى اصبر وارضى بقضاء ربنا مع ان بابا مات وانا عندى تلاتة وعشرين سنة يعنى كبيرة مش صغيرة
وانتى مع انك خسرتى باباكى ومامتك مع بعض ووقتها كان عندك اربعتاشر سنة بس
الا انك صبرتى ورضيتى بقضاء ربنا انتى اقوى منى انتى اقوى مما تتخيلى مينفعش تقولى على نفسك ضعيفة لأنك مش كده
سلمى وهى بتعيط اكتر :انا نمت صحيت لقيتهم ماتو ولقتنى بقيت يتيمة ولوحدى من غيرهم
علشان انا كنت بايتة عند ماما اسماء علشان ايناس مسكت فيا ابات معاها فماما اسماء قالت لماما جيلان ابات معاهم وهى هتخلى شريف يرجعنى تانى يوم
ويشاء ربنا انه تحصل حريقة فى الشقة اللى جنب شقتنا وتولع معاها شقتنا وبابا وماما يموتو
تخيلى انا نمت عندى عيلة صحيت لقيت انهم راحو وانى مبقاش عندى عيلة خلاص
وبيتنا اتحرق سيبته علشان ابات بره يوم وارجع
مرجعتش من تمن سنين
وخلاص مبقاش فى حاجة ارجعلها ولا فى بابا عبدالله ولا فى ماما جيلان ولا فى بيتنا
لو مكنتش ايناس مسكت فيا كنت مت معاهم
وقتها انا كنت بفكر انى كان المفروض اموت معاهم
بس ماما اسماء قالتلى ان ده عمرهم وانهم فى الجنة كفاية اللى شافوه قبل ما يموتو ربنا يرحمهم
وانا لسه عمرى فيه بقية ربنا لسه كاتبلى اعيش وكاتب لماما اسماء انه يهون على قلبها بيا لانى معوضاها شوية عن ماما جيلان لأنى حتة منها
لولاهم انا مكنتش اعرف هيجرالى ايه يا ايثار هما بقو اهلى بعد اهلى الله يرحمهم انا بحبهم ومقدرش اعيش من غيرهم
وبسبب حبى لجمال ممكن اسيبهم يا ريتنى ما حبيته
ايثار :اهدى بس يا حبيبتى يا عالم بكرة هيحصل ايه ربنا يحلها من عنده
ركزى انتى بس فى مذاكرتك وامتحاناتك خلاص دى اخر امتحانات ليكى وبعدها تفرحى وتفرحينا بتخرجك
سلمى :حاسة انى مش هفرح فى حياتى تانى خلاص
ايثار :يا بت متقوليش كده والله هتفرحى وربنا هيجبر بخاطرك
وبكرة تقولى ايثار قالت
سلمى :على فكرة انا مش اقوى منك ولا حاجة
بالعكس يمكن انتى اقوى منى
انتى خسرتى باباكى وانتى كبيرة عارفة ومدركة كويس انتى خسرتى ايه
انما انا كنت عيلة كل اللى اعرف انه بابا وماما ماتو وانى مش هشوفهم تانى
ولقيت ماما اسماء وبابا محمد وشريف وجمال وايناس جنبى ومعايا وبيعاملونى على انى واحدة منهم
ملحقتش احس بالوحدة ولا اليتم
انا طبعا كنت اتمنى اعيش عمرى كله مع بابا عبدالله وماما جيلان
بس مقدرش انكر انهم عوضونى عنهم لأنهم عمرهم ما فرقو بينى وبين ولادهم
ولأن شريف وجمال وايناس نفسهم كان بيعاملونى على انى فعلا اختهم
انا مكنتش مدركة لحجم خسارتى وملحقتش احس بيها لأن ربنا عوضنى بيهم
فاهمة اللى عايزة اوصلهولك
انتى قوية اقوى منى واقوى من اى حد
ايثار :فاهمة يا حبيبتى
انتى كمان قوية بدليل انك رغم حبك لجمال بتقاومى حبك ده وبتفكرى فى حقك فى انه يكون عايزك مش مستسلمة لحبك وخلاص
على رأى احمد كل واحد بيحاول وبيقاوم يبقى قوى الضعيف بس هو اللى بيبطل يقاوم ويحاول
سلمى :هو انا ينفع اعرف استاذ احمد بيروح للدكتور النفسى ليه
لو مينفعش مش مشكلة مش هزعل
ايثار :ومينفعش ليه عادى ده مرض زيه زى اى مرض هو لو بعد الشر عليه عنده الضغط ولا السكر هتكسف اقولك
المرض النفسى مش حاجة تكسف انا اصلا استغربت انك ولا مرة سألتينى عن احمد كان بيروح للدكتور ليه
سلمى :خوفت اكون بتعدى حدودى او اضايقك بسؤالى
ايثار : مش مضايقة من سؤالك ولا حاجة
احمد عنده ” اضطراب الشخصية الارتيابية “
ده مرض نفسى بيخليه غصب عنه عنده قلق وانعدام ثقة وشك دايم فى اللى حواليه
طوا الوقت متخيل انهم بيكدبو عليه وبيخدعوه
سلمى :الله يكون فى عونه دى حاجة صعبة اوى ويكون فى عونك انتى كمان ازاى تعرفى تعيشى مع واحد طول الوقت شاكك فيكى
ايثار :المرض ده بيخلى صاحبه يصاب بنوبات غضب كبيرة وكتيرة بناءا على افكاره اللى هو تخيلها
وعلشان كده مبيعرفش يعمل علاقات اجتماعية لأنه طبعه بيكون صعب اوى وتقريبا مستحيل يلاقى حد يتحمله
لما عرفت احمد كان بقاله كتير بيروح للدكتور النفسى وقطع شوط كبير فى العلاج
فعلشان كده حالته كانت كويسة اعراض المرض عنده مش قوية اوى لدرجة إنها متخلينيش قادرة اتعامل معاه
كمان احمد انسان قوى كتير كان بيقول لنفسه ده مش حقيقى اللى فى دماغى ده غلط
مش سايب نفسه لدماغه وافكاره تسوحه
لا بيقاومها وبيحاربها
احمد انسان قوى بيحارب نفسه طول الوقت وعلشان كده الادوية والجلسات مع الدكتور جابو نتيجة كويسة جدا معاه
سلمى :هو العلاج فى الحالة دى بيكون ايه
ايثار :الأدوية بتكون مضادات اكتئاب ومحسنات مزاج ومضادات ذهان ومضادات قلق
العلاج بقى اللى الدكتور بيتبعه معاه ” علاج نفسى ديناميكى” بيخليه يستوعب ان خوفه وقلقه دول جايين من جواه من افكاره هو انما هما مش حقيقين ولا حاجة فبكده يحس انه قوى وقادر بتحكم فى نفسه لما يتحكم فى افكاره ويسيطر عليها وميسيبهاش تسيطر عليه
وفى كمان ” علاج سلوكى معرفى “
وده بيركز على ارتباط الأفكار بالمشاعر والتصرفات
فهو بيساعده يفهم افكاره ويتحكم فيها ويعدل فيها بحيث يقلل من المشاعر السلبية ويقلل من تأثيرها عليه
وفى ” علاج سلوكى جدلى “
وده بيخليه يزود مهاراته الاجتماعية وبيزود فهمه لنفسه ولطبيعة مشاعره بحيث يقدر يتحكم فى افكاره ومخاوفه الغلط اللى مش حقيقية
وفى كمان ” اختبار الواقع “
وده بيبين بيها الدكتور أثناء الجلسة بأدلة قوية ان مخاوفه وشكوكه دى مش حقيقية وملهاش اى اساس من الصحة طبعا بيعمل كده باستراتيجة معينة هو عارفها ودارسها لأنه دكتور وده شغله
بس كده
سلمى بانبهار :واو انتى عارفة كل حاجة
انا مفهمتش حاجة من اللى قولتيه بس انتى بتشرحى بثقة رهيبة ولا اكنك دكتورة نفسية
ايثار :بقرء كتير عن ” اضطراب الشخصية الارتيابية “
علشان اعرف اتعامل مع احمد صح
وبقيت بقرء كتير فى علم النفس والامراض النفسية عموما
سلمى :طيب علشان افهم انتى بتعملى معاه ايه
ايثار :لما بيقول حاجة وانا عارفة انها غلط بالعقل بوضحله انها غلط
سلمى :يعنى لو فكر انك كدبتى عليه فى حاجة معينة
بتثبتيله انك مبتكدبيش عليه
ايثار :بالظبط كده
سلمى :بس دى حاجة صعبة وهو بيشك فيكى كده طول الوقت
ايثار :مش طول الوقت لأنه زى ما قولتلك بيقاوم نفسه وبياخد الأدوية ومتابع مع الدكتور جلسات العلاج
الموضوع قليل وما مادا بيقل اكتر
وبعدين احمد زى ما بيقول حاجات تضايقنى بيقول حاجات كتير اوى تفرحنى
دى بتعوض دى فهمتى
سلمى :فهمت
طيب وبتعملى ايه غير انك تتناقشى معاه بالعقل وتوضحيله انه تفكيره غلط
ايثار :بسمعه بعرفه انى دايما معاه وجنبه وعايزة اسمعه وعمرى ما همل من كلامه
وبدعمه مبحكمش على كلامه ولا بخليه مضطر يبرر اللى جواه بخليه يعرف انى متقبلة مشاعره ومقدراها مهما كانت ومقداره دايما
وبعرفه انى بحبه دايما مهما عمل ومهما حصل انا بحبه
وبعرفه ان اهميته عندى زى ما هى ومكانته عندى زى ما هى
بطمنه يا سلمى اى حد سواء تعبان نفسيا او لا كل اللى هيبقى عايزه حد يحبه ويسمعه
ويطمنه انه يقدر يقول كل اللى فى قلبه وكل اللى فى عقله من غير ما يحكم عليه ولا ينزل من نظره ولا حبه ليه يقل
هو عارف انى بحبه وعمرى ما هبطل احبه فبيتكلم معايا وهو مطمن كأنه بيتكلم مع نفسه
سلمى :يا بخته بيكى
ايثار :يا بختى انا بيه
احمد عمل علشانى ولسه بيعمل علشانى حاجات كتير حلوة
استحمل علشانى حاجات كتير
من اول يوم قالى فيه انه بيحبنى لحد النهاردة لما بيجى يقولى انه بيحبنى دايما بيقولى انا بحبك اكتر من حياتى
ودايما بيتصرف على اساسها كتير بيفضلنى على نفسه وبيسامحنى على غلطى وتقصيرى فى حقه لو قصرت
احمد بيتعب علشانى وانا بتعب علشانه
بس كفاية انى عارفة انى بتعب علشان واحد مقدر تعبى ويستاهل تعبى وبيتعب هو كمان علشانى
مش بتعب على الفاضى علشان واحد ميستاهلش تعبى ولا يستاهل حبى
احمد قدوتى فى الحياة لأنه انسان قوى
بيروح لدكتور نفسى وماشى على ادوية علشان يبقى احسن
بيحارب افكاره ومشاعره
تخيلى واحد كل يوم بيحارب نفسه بيقاوم كل يوم مية فكرة غلط ومية شعور مش حقيقى
وبيتعلم ازاى يبدل الأفكار الغلط بافكار صح وازاى يحول المشاعر اللى مش حقيقية لمشاعر حقيقية
فى ناس مبتعرفش تعترف بغلطها ولو مرة واحدة فى حياتها
احمد بيعترف لنفسه قبل ما يعترف لحد انه غلط
انه عنده افكار غلط ومشاعر غلط
احمد اقوى واحسن راجل فى الدنيا انا فخورة بيه وفخورة بنفسى علشان هو بيحبنى انا واختارنى انا
سلمى :ربنا يخليكم لبعض يا حبيبتى
بس انتى بجد عندك خبرة رهيبة فى الأمراض النفسية
ايثار :كنت بروح لدكتور نفسى وبحضر جلسات علاج جماعى غير اللى قرءته كل ده ادالى خبرة
المهم انا عايزاكى تركزى فى مذاكرتك يا سلمى عايزاكى تفرحى وتفرحى خالتك وجوزها بنجاحك وتفرحى باباكى ومامتك الله يرحمهم كمان
ده اخر المشوار الطويل اللى مشيتيه متضيعيش تعب السنين اللى فاتت
سلمى :حاضر يا حبيبتى هحاول
بعد شهر
احمد بسعادة :حامل انتى بجد حامل يعنى انا هبقى اب وانتى هتبقى ام لابنى او بنتى خلاص عيلتى انا وانتى هتبقى تلاتة بعد ما كانت انا وانتى بس
الحمد لله هبقى اب انا…هبقى…اب
ايثار :ايه يا حبيبى مالك سكت ليه
قولى يا احمد بتفكر فى ايه دلوقتى قولى والله مش هزعل من افكارك مهما كانت هناقشك فيها
صدقنى مش هزعل من افكارك مهما كانت
احمد :هو انا هعرف اكون اب كويس يا ايثار
هعرف اربى ابنى او بنتى صح هيحبونى ويبقو فخورين بيا هعرف احافظ عليهم
ولا ممكن ائذيهم او اغلط فى حقهم
انا خايف معرفش اكون اب كويس
ايثار :بس انا متأكدة انك هتكون احسن اب فى الدنيا
زى ما كنت ليا اجمل واحسن زوج فى الدنيا
هتكون اجمل واحسن اب لولادنا
حتى لو غلطت فى حقهم هتصلح غلطك
وهما هيحبوك انا متأكدة لأنهم عمرهم ما هيلاقو اب احن ولا احسن منك فى الدنيا
احمد :طيب مش ممكن يعنى يورثو البارانويا منى المرض النفسى ساعات بيكون بالوراثة
ايثار :وساعات لا ما انت جالك مع لا لا والدك ولا والدتك عندهم اى مرض نفسى ولا عيلتكم ليها تاريخ مع المرض النفسى
مفيش قاعدة يا حبيبى هو اللى ربنا كاتبه هيكون
ولو ده حصل مش هيكون غلطك ولا ذنبك
متشيلش نفسك فوق طاقتها يا احمد
دى حاجات فى ايد ربنا وبس انت ملكش فيها حاجة
احمد :ونعم بالله
طيب مش ممكن مرضى يأثر على تعاملى معاهم
ايثار :حبيبى مرضك ده انت خلاص قربت تخف منه نهائى وده كلام الدكتور مش كلامى ولا نسيت هو قالك انه خلال فترة قصيرة مش هتكون محتاجله
يعنى على ما اولد والبيبى يكبر شوية هتبقى انت بإذن الله اتعافيت منه نهائى
احمد :هو انا بجد خلاص قربت اخف
مش حاسس بكده
ايثار :علشان مش شايف نفسك كويس
انما انا شايفاك يا حبيبى فى تطور كبير حصل
طريق طويل مشيته خلاص اهو قرب يخلص
احمد :لولاكى الطريق كان هيكون اطول واصعب
وجودك معايا سهل عليا الطريق سهل عليا حياتى كلها وخلاها احلى
انا بحبك اكتر من حياتى يا ايثار
ايثار :انا كمان بحبك اوى
بحس انى انانية فى حبك عارف انا ساعات بخاف
احمد :كملى سكتى ليه بتخافى مخفش صح
ايثار :لا بخاف تخف خالص وتبطل تحب اسلوب حبى واهتمامى بيك وتعتبرهم خنقة وتمل منى ومن اسلوبى
احمد :مش ممكن ده يحصل انا بحبك كده زى ما انتى
وعمرى ما همل منك ولا من حبك اللى بيحسسنى بقيمتى ده وبيعرفنى قد ايه انا مهم عندك
انا دايما محتاج لحبك واهتمامك يا ايثار
ايثار وهى بتعيط :انا بحبك اكتر من حياتى يا احمد
احمد وهو بيضحك :انا كمان بحبك اكتر من حياتى
بس ليه العياط هى هرمونات الحمل بدءت بدرى كده
ايثار وهى بتضحك وبتمسح دموعها :باين كده
بعد اسبوع
ايثار :رفضتيه قولتى لخالتك انك مش شايفاه غير اخوكى يا سلمى ليه كده بس
سلمى وهى بتعيط :علشان مبيحبنيش يا ايثار من بعد ما ماما اسماء اتكلمت معاه وانا قولت هفكر وارد بعد امتحاناتى
انا مقولتش كده علشان اعرف افكر بس واشوف هسمع كلام قلبى واقول اه ولا اسمع كلامى عقلى وكرامتى واقول لا
انا كمان كنت عايزة اشوف هو هيعمل ايه
كان نفسى يحاول يخلينى اميله ويقرب منى ويقربنى منه
معاملته زى ما هى يا ايثار متغيرتش
انا مش فارقاله هيتجوزنى علشان يفرح ماما اسماء وبابا محمد
ويمكن كمان علشان بنت خالته اليتيمة ميتجوزهاش واحد غريب ويا عالم يعاملها ازاى
فيكسب فيها ثواب ويتجوزها هو احسن
ويمكن علشان متربية قدام عينه وضامنى وضامن اخلاقى
هيتجوزنى علشان اسباب كتير مفيهمش السبب الوحيد اللى انا نفسى فيه وهو انه يكون عايزنى علشان هو عايزنى علشان هو بيحبنى
مقدرتش اقول موافقة يا ايثار والله ما قدرت
ايثار :طيب خلاص حقك عليا انا مش قصدى الومك والله انا بس كان نفسى تفضلى معايا
سلمى وهى بتعيط اكتر :وانا كان نفسى يحبنى يا ايثار او على الأقل يبقى معجب بيا وعايز يتجوزنى كان نفسى احس انه شايفنى
بس ده محصلش للأسف ده محصلش
وانا مش قادرة اتحمل وجع قلبى اللى لازم غصب عنى اداريه عنهم وانا عايشة فى وسطهم
بعد اسبوع ولا عشر ايام هقولهم انى عايزة اروح اعيش مع حد من اعمامى
ايثار :وهتقولى عايزة تروحى تعيشى مع حد منهم ليه
لو قولتى علشان رفضك لجمال هيقولولك محدش يعرف غير انتى وخالتك وجمال بقية البيت ميعرفوش وحتى ايناس متعرفش فملوش داعى تمشى
ايثار :هقول لقيت شغل قريب من حد فى اعمامى
هتصرف يا ايثار هتصرف وامشى مش هقدر افضل هنا
انا بموت قلبى بيتحرق ومش هقدر امثل قدامهم انى كويسة كتير
