يامفارق
سرقت النبض من قلبي إللى كان يهواك وكان عاشق
سحبت الضحكة من عمرى إللى كان في هواك بيتعايق
يا كل الناس
ياحب اساس
في بحرك كنت انا غارق
هجرت الدرب وقت الحرب وسايبنى
أخوض وحدى
ماليش غيرك انا طيرك يا اعز واغلى ما عندى
اعيش ازاى وعمرى الجاى في بعدك منى بيفارق
يامفارق
وهبتك حبي وغرامى.
كتبتك حربي وسلامى
بقيتك كلى من مدة
وقطر العمر كان ماشي
وبيكمل مايهداشي
لكن قدام عنيك هدا
قدرت ازاى تكون جبار
مشاعر قايدة زى النار
تحولها غيوم باردة
وترسم بالهوا جرحى
وتهدم بالبعاد صرحى ونتفارق
يامفارق
ياليل متغطى بعد نهار شهد حبي بنور كذاب
غرست في قلبي اوجاعك
نهيت القصة بخداعك
وجيت لك بالأمل طاير تكملنى قفلت الباب
يااكبر وهم خلانى
الملم روحى من تانى
طلعت سراب
تعيش القصة بظروفها
يا شمس عمتني بكسوفها
يا ريتك كنت يوم صادق
يامفارق
جمعنا الحب والعشرة لقيتك من ذهب
قشرة بتضوى بريق
فى وقت الجرح مستنيك تطبطب
عالجرح بايديك
تكون اهلى سند وشقيق
لقيتك وقت احزانى
بتظهر وشك التانى
بتتقن دورك الجانى
وترمينى في بحر غريق
ياريتنى ماكنت محتاج لك
ياريتنى ماكنت بشتاقلك ولا فارق
يامفارق
خلاص مابقتش هندهلك باحساسي حبيب الروح
ومهما تعيش هوا غيرى هتخسر فيا قلب وروح
عوض ربك في وقت الجرح هيجيلى
لا هترجاك ولا استناك ولا اكتب فيك مواويلى
وعمرى الجاى يهنالى وابدل توبك البالى
بلبس جديد وفرحة وعيد ولا هزعل ولا أتضايق
هعيش عمرى بلاك رايق
يا عايش كذبك الحالى وخاين عهدك السابق
امان الله يصون بعدك
وتحلا دنيتى بعدك
وافراح عمرى تتسابق
يامفارق
نبيل عبد الرحمن