رسمت حياتي بالألوان
*****************
رسمت حياتى بالالوان
لقيتها بجد بتنور
رسمت الضحكه والفستان
لواحدة عليا بتحور
وباعتنى وبالمجان
ولسه عليها انا بدور
يا اول بنت حبيتها
وأول ضحكه كات ليها
يا صورة لعمرى خبيتها
وكنت زمان مداريها
بتقفل ليا باب بيتها
بقيت عايش ف ماضيها
ولسه الحزن جوايا
بيطفى فيا كل الفرح
وعايش ضل ويايا
بيجرح الف جرح وجرح
وعمرى ضاع بلا نهايه
قولولى منين الاقى الشرح
ولسه الدمعه ف عيونى
بتنزل ليها ف الكتابات
وليه يا حبايبي تلومونى
عشان بحكى كتير حكايات
سيبونى اعيش بقا شجونى
دة عمره ما يبقى ماضى وفات
ولسه فاكر المواعيد
كأنها فعلا أمبارح
وحتى الدمع والتنهيد
وكل كلامها كان جارح
وروحى تروح معاها بعيد
عايش ف الكون لكن سارح
ولسه شايف التفاصيل
معديه هنا قصادى
وحاسس بيا انى عليل
وعايش لسه ف الماضى
وضاع من عمرى كل جميل
وشايف كل شئ عادى
وهعمل ايه ف دى القصه
بقيت عايش سنين محتار
بصبر روحى اقول لسه
نفسي لو اخد قرار
هييجى يوم اكيد هنسي
ما مش معقوله كله مرار
كل شئ قسمه ونصيب
دى اخر كلمه قالتها
اصبحت شخص بدون حبيب
مشاعرى خلاص قتالتها
بجد انا محتاج طبيب
يداوي فيا حكايتها
ولسه بغنى غنوتها
ولسه انا حافظ الالحان
ولسه بدوب ف رقتها
جمالها وهى بالفستان
بشم كتير انا ريحتها
وانا عايش ليالى زمان
ولسه بشوف ف احلامى
جميع الكون دة ويايا
وبتخيلها قدامى
كأنى شايفها ف مرايا
بفوق وبلاقى ايامى
مرار وعذاب بلا نهايه
انا جايلكو من تانى
بعد ما عدى وقت طويل
ولسه قلبى وحدانى
ولسه حاسس انى عليل
ولسه بردو وحشانى
ومهما اقول عليها قليل
صحيح قولت ان انا نسيتها
نسيت صوتها وملامحها
دى اول بنت حبيتها
وعمرى ما كنت جارحها
صورتها ف عقلى خبيتها
وفعلا مش مسامحها
ومهما اقول عليها هقول
ما عشت معاها ٦ سنين
ولو حتى الكلام هيطول
ف انا جوايا شوق وحنين
بصبر روحى اقول معقول
هعيش عمرى معاها سجين؟
ولو قولت محبتهاش
قولولى انى اكيد كداب
دة عمرى معاها راح ومجاش
وساكن جوة منى عذاب
وعيشت حياتى دى ببلاش
ومش مستنى منها عتاب
كتبت الشعر علشانها
وكنت بموت ف معاليها
وأبيع الكل قدامها
تدوب روحى وأعيش ليها
وكنت بزور ف احلامها
وكنت اتمنى أموت فيها
حكايتى بجد دى حكايه
تحسها وحي م الاساطير
دموع وعذاب ودى بدايه
وجرح جوة منى خطير
بفوق وبلاقى دى نهايه
جراحى جوة منى كتير
ومهما وصفت أحزانى
ومهما قولت انا زعلان
ولو قولت دى وحشانى
بحس بجد بالحرمان
ف بتخيلها قدامى
وبسترجع ليالى زمان
بسافر فيها وف كونها
واطير وياها ف الملكوت
ف ببدء أعيش ف مكنونها
وببدء أئن من غير صوت
وعيشت حياتى مجنونها
لحد ما جانى منها الموت
وعيشت حياتى متغرب
بدور ع اللى راح منى
وجايز كنت بتهرب
وجايز لو نسيت سنى
ف محتاج أنى اتقرب
لشخص يكون فاهم إنى
نسيت الكل إياها
وكل العمر ليها راح
ما عشت حياتى وياها
وسابت جوة منى جراح
ونفسي بجد أنساها
ونفسي بجد أعيش مرتاح
ولسه حقيقي بتأثر
وفاكر كل مواعيدها
وعايش عمرى بتحسر
ما انا ميتم ف يوم عيدها
وروحى أزاز بتتكسر
مازال قلبى هنا ف ايدها
عبد الرحمن عفيفي