حكاية ” حسبة غلط “
مصطفى :لو سمحتى…من فضلك
فيفيان وهى بتثبت الأغانى اللى بتسمعها :نعم
مصطفى :ممكن تغيرى الأغنية اللى بتسمعيها
فيفيان :افندم
مصطفى :الأغنية الحزينة الكئيبة اللى بقالك نص ساعة بتسمعيها دى ممكن تغيريها
فيفيان :ليه ان شاء الله
مصطفى :علشان الأغنية دى بتنكد على اللى خلفونى
وانتى سمعتيها يجى تسع مرات ورا بعض لما خلتينى بفكر انزل من الميكروباص وارمى نفسى قدام اى عربية نقل تقيل وانتحر واخلص
فيفيان :على فكرة الأغنية حلوة
مصطفى :يا ستى بتقلب عليا المواجع
وانتى فرمتى احساسى من كتر ما شغلتيها انا ماسك الدمعة بالعافية
من فضلك غيريها
فيفيان :انا اسفة خلاص انا هغيرها وهوطى الصوت
انا مخدتش بالى ان الصوت بيطلع بره السماعات
مصطفى :هو عالى بس مش مشكلة الأغانى اللى بتسمعيها حلوة
فيفيان :حلوة ايه بس ما انت قولت ان الاغنية قلبت عليك المواجع اهو يعنى وحشة
مصطفى :لا هى مش وحشة بالعكس هى حلوة علشان كلماتها قوية ولحنها جميل
انا بس اللى من فترة كنت بسمعها كتير
فيفيان :ليه
مصطفى :نوع من انواع جلد الذات
بهزر اول ما نزلت كنت بحب اسمعها عادى
بس بقت بتعبر عن حالتى فى وقت معين فكنت تقريبا مبسمعش غيرها وقتها
فيفيان :وعلشان كده دلوقتى بتكرهها
مصطفى :مش بكرهها بس مبحبش اسمعها كتير
وانتى عاملة معايا واجب ومشغلاها تسع مرات ورا بعض
فخلتينى افكر فى الوقت اللى كنت بسمعها فيه
وقاعد استرجع الذكريات بقى
فيفيان :اسفة مكنش قصدى
مصطفى :بتتأسفى ليه انا اللى متطفل وبسمع الأغانى اللى انتى بتسمعيها
لا ومش عجبانى وبقولك تغيريها كمان
يعنى انا اللى المفروض اتأسف
بس هو انتى بتسمعيها كتير ليه كده
فيفيان :لسه منزلاها امبارح
مصطفى :امبارح بس دى اغنية قديمة دى نازلة من سنتين تلاتة
فيفيان :كده بقت قديمة يعنى
انا عادى مبيفرقش معايا ايه نزل جديد بسمع اللى يجى قدامى وخلاص
سمعتها امبارح ونزلتها علشان عجبتنى
وانا لما بتعجبنى اغنية بسمعها كتير
مصطفى :لحد ما تحفظيها
فيفيان :لا لحد ما ازهق منها وابقى عايزة اسمع حاجة غيرها
مصطفى وهو بيضحك :حلاوة البدايات يعنى ولهفتها
وبعد كده تقلبيها وتشوفى غيرها
فيفيان :تقريبا اه مفكرتش فيها كده قبل كده
بس لا استنى انا مببطلش اسمعها لما بزهق منها بفضل اسمعها بس من غير تكرار بسمعها مرة وبس
انا مش غدارة لا
مصطفى وهو بيضحك :يعنى مبتاخديش الاغنية لحم وترميها عضم
فيفيان وهى بتضحك :لا انا بنت اصول مبغدرش بالأغانى اللى بحبها
عمرو :استهدى بالله يا جيهان
خطوبة ايه اللى عايزة تفسخيها
انا بحبك وانتى بتحبينى
احنا بقالنا اربع سنين سوا
تهون عليكى السنين دى كلها ويهون عليكى حبنا
جيهان :يهونو اه زى ما انا بهون عليك
انا مش هقدر اتحمل تانى يا عمرو انك تحكى كل حاجة بتحصل بينا لأهلك واصحابنا
ووقت ما تكون متضايق منى تسب وتلعن فيا
عمرو :انا مبحكيش لحد غريب
وبعدين انا بفضفض عادى مش بحكى كل حاجة يعنى
جيهان :لا يا عمرو بتحكى كل حاجة
لا وكمان بتزود حاجات من عندك علشان ابان انا الوحشة اللى مطلعة عينك
وانت الطيب اللى متحمل
انت طول عمرك كده معايا يا عمرو تزعل منى تقول عنى اسوء كلام
عمرو :بس لما بنتصالح برجع اشكر فيكى واقول عنك كلام حلو
جيهان :بعد ايه بعد ما تكون شوهت صورتى قدامهم
وتضمن منين انهم يصدقو الحلو اللى بتقوله ده
وميقولوش مراية الحب عامية
انت عارف انك نجحت فعلا فى ده
كتير اوى منهم شايفين ان انت الطيب الجميل الملاك اللى متحملنى
وانا الشريرة اللى معذباك معايا
وده مش بس بسبب اللى بتحكيه عنى وبتقوله عليا
بسبب كمان انى مبحكيش عنك غير الحلو بس
ومبقولش كلمة وحشة عنك قدام حد
ده طبعى وقولت انك مع الوقت هتعمل زيى وهتبطل تحكى اللى بيحصل بينا وهتبطل تقول عنى كلام وحش وانت مضايق منى
بس لا انت طبعك زى ما هو
وانا مش عارفة اعمل زيك علشان طبعك ده غلط
كنت عايزة اخليك زيى خلتنى انت اضايق من نفسى وافكر ابقى زيك
عمرو :هو ايه اللى زيى وانا عندى جرب ولا ايه
ما تتعدلى يا جيهان انا قاعد بسمعك وسايبك تطلعى اللى جواكى علشان ترتاحى انما متسوقيش فيها
انا صبرى له اخر
جيهان :انا كمان صبرى له اخر وطاقتى كمان ليها اخر
وانت جيبت اخر صبرى واخر طاقتى
انا مش هقدر اكمل معاك
عمرو :طيب حيث كده فانا عايز شبكتى والهدايا اللى جيبتهالك من يوم ما عرفتك وكل مليم صرفته عليكى
ما هو مش هيبقى موت وخراب ديار
جيهان :المفروض اتصدم من كلامك صح بس انا مش مصدومة
اتعودت على كلامك خلاص ومبقتش بتصدم من اى حاجة بتقولها
ماشى يا عمرو شبكتك وهداياك هيوصلولك
بالنسبة للفلوس اللى صرفتها
فانا عملتلك مرتين عيد ميلاد وكنت حاجزة كافيه وجايبة كل اصحابنا
غير انك فى خطوبتنا مدفعتش ولا مليم فستانى والميكب وحتى الاكل كانو علينا غير اللى كنا بنغرمه لما بنعزمك عندنا انت واهلك
اظن ده يعوض ده واكتر كمان
واقولك حاجة انا مش عايزة الهدايا اللى جيبتهالك
عمرو :مش هديهالك اهى تعوض جزء من خسارتى
جيهان :اسكت يا عمرو ارجوك اسكت متنزلش من نظرى اكتر من كده
هتنزل اكتر من كده ايه
عمرو :جيهان احترمى نفسك
اللى بطلبه ده حقى انتى اللى سايبة يعنى الشبكة حقى
جيهان :يا سيدى حقك الشبكة والهدايا اللى جيبتهالى والهدايا اللى انا جيبتهالك خدها
تحب اديك الفلوس اللى معايا دلوقتى علشان ترتاح وتبقى مرضى
مصطفى بصدمة :وخد منها الفلوس اللى معاها فعلا
فيفيان :لا كتر خيره مخدهاش
صداع من كتر الرجولة
عمرو ده انا عمرى ما حبيته ولا ارتاحتله بس مكنتش اتخيل يطلع معفن اوى كده
ده مرجعش الهدايا اللى جبتهاله فعلا
هى كده كده مكنتش عايزاهم علشان ميفكروهاش بيه
بس هو شايف انهم حقه ويعوضو جزء من خسارته
خسارة ايه ده كان بيجلنا كل اسبوع غير عزوماتنا الكتيرة لاهله
وهما معزموناش غير مرة واحدة
كان حقنا حسبنا ده كله كلفنا كام وحاسبناه المعفن
مصطفى :كلامه مستفز اوى بصراحة
فيفيان :هو كله على بعضه مستفز انا مش عارفة جيهان كانت بتحب فيه ايه واستحملته اربع سنين ازاى
ده انا متحملوش اربع ساعات على بعض
يلا اهو الحمد لله كرهها فيه وخلاها تسيبه
ربنا نجاها والله
مصطفى :معاكى حق
طيب واهلك متضايقين علشان اللى حصل ده
فيفيان :لا بابا شايف ان فسخ عشر خطوبات ارحم من طلاق وجوازة فاشلة
وماما مكنش عاجبها عمرو واهله من الأول
هو مكنش عاجب حد فينا اساسا بس هى قالت بحبه وعايزاه ومقدرش اعيش من غيره وشوحت بايديها كده
يلا اهو غار فى ستين داهية
مصطفى :طيب وهى عاملة ايه زعلانة
فيفيان :زعلانة بس مش عليه زعلانة على نفسها
زعلانة على اربع سنين ضاعو من عمرها معاه على مشاعر هو مكنش يستاهلها
زعلانة من نفسها علشان حبت واحد زيه
هى بطلت تحبه وبقت بتكرهه خصوصا بعد كلامه لما قالتله انها عايزة تفسخ الخطوبة
مصطفى :ليها حق تكرهه ده انا كرهته وانتى بتحكيلى
بس هما كانو مرتبطين قبل ما يتخطبو صح
فيفيان :فى الأول كانو اصحاب وهما فى الجامعة وبعدها حبو بعض وارتبطو ومن تمن شهور اتخطبو
مصطفى :طبيعى ده يحصل مفيش حاجة اسمها صداقة بين راجل وست
فيفيان :ليه يعنى
مصطفى :علشان مادام عرفو يبقو اصحاب هيعرفو يبقو اى حاجة تانية
فى مرحلة ما هيحبو بعض او على الأقل واحد فيهم هيحب التانى
فيفيان :انت كل اللى ارتبطت بيهم كنتم اصحاب فى الأول
مصطفى :لا بداية علاقتنا كانت ارتباط على طول
فيفيان :طيب اديك حبيت بنات مكانوش صحابك اهو
يعنى الصداقة ملهاش علاقة
مصطفى :علشان مكناش اصحاب انا وهما مكملناش يا فيفيان
فيفيان :مش كل الصحاب بيحبو بعض يا مصطفى لا
ما انا وانت اصحاب اهو
مصطفى :احنا مش اصحاب
فيفيان :اومال احنا ايه
مصطفى :اكتر واقوى من اصحاب
فيفيان :قصدك اخوات يعنى
يا باشا شرف ليا والله
مصطفى :انا شللى هيبقى على ايدك اه والله
لو اتشليت فى يوم هيبقى بسببك
فيفيان :بعد الشر عليك
يعنى ابقى انا بقولك اننا اصحاب واكتر من الأخوات وانت تقولى هشلك
لما اقولك كلام حلو رد عليا بكلام حلو متبقاش جلنف
مصطفى :انا برضه اللى جلنف
فيفيان :ايوه جلنف وانا علشان صاحبة جدعة ومفيش منى اتنين فى مصر هتحملك وامرى لله
ربنا يصبرنى
مصطفى :يا شيخة ربنا ياخدنى ده انا منى لله والله
فيفيان وهى بتضحك :متدعيش على نفسك انا مسامحاك
مصطفى :شاكر لافضالك مش عارف اودى جمايلك فين الحقيقة
فيفيان :خلاص بقى هتغر
مصطفى :لا اتغرى اى حد فى مستوى ذكائك ده لازم يتغر
فيفيان :انا عارفة انى ذكية
مصطفى :انتى عبقرية مش ذكية ذكاء طبيعى لا
صبرنى يا رب
نجوان :تحب احطلك الغدا
مراد :انتى مش هتاكلى معايا ولا ايه
نجوان :لا انا هستنا تقى
مراد :هى فين
نجوان :فى مراجعة كيمياء
مراد :خلاص هستناها تيجى وناكل كلنا سوا
نجوان :براحتك
مراد :انتى لسه زعلانة منى
نجوان :انا مش زعلانة يا مراد انا عايزة اتطلق ممكن تطلقنى
مراد :لا مش ممكن
نجوان :ليه
مراد :علشان انا بحبك يا نجوان
نجوان :كفاية كدب بقى
مراد :انا مبكدبش
نجوان :وانا مش مصدقاك يا مراد
عارف انا عمرى ما صدقت كلمة بحبك اللى بتقولهالى
عمرى ما اقتنعت بيها
هتحبنى ليه وعلى ايه فيا ايه بتحبه
تحبنى ازاى اذا كنت انا نفسى مبحبش نفسى
كنت حاسة بالذنب وانا مش مصدقاك
اتارى احساسى كان صح انت مبتحبنيش
انت مش غلطان انا عارفة انى متحبش
ممكن بقى تطلقنى
مراد :انا بحبك يا نجوان عمرى ما قولتلهالك وانا بكدب فيها
كل مرة كنت بقولها كنت صادق فيها وبقولها من قلبى
انتى ليه مش مصدقانى
نجوان :علشان انت مبتقوليش الحقيقة يا مراد
الحقيقة اللى سمعتها بالصدفة من مامتك وخالتك
وهما بيتحسرو عليك وعلى حظك
اللى خلاك تحب وتخطب واحدة حلوة تعقدك
فتقرر انك بعدها هتخطب وتتجوز واحدة وحشة
وطبعا ملقتش واحدة اوحش منى علشان تتجوزها
مراد :ده مش حقيقى انا اتجوزتك علشان بحبك يا نجوان
نجوان :بطل كدب
مراد :انا مبكدبش انتى اللى بتكدبى
انا عارف انك بتحبينى زى ما بحبك
لو مبتحبينيش اومال خليتى تقى تيجى تقعد معانا ليه فترة امتحاناتها
نجوان :انا خليت تقى تيجى تقعد معانا فترة امتحاناتها
لأنى عارفة ان والدك ضاغطها وموترها
زى ما ماما كانت ضغطانى وموترانى وانا فى ثانوى
وقتها كنت اتمنى حد يبعدنى عنها وعن تعب الأعصاب اللى هى مسببهولى
فانا عملت مع تقى اللى اتمنيت ان حد يعملهولى
عملت كده علشان بحبها وبعتبرها اختى الصغيرة زى جيهان وفيفيان
مش علشانك يا مراد
مراد :وانا بحبك وبحب قلبك الأبيض اللى بيحب كل الناس وبيهتم بكل الناس ده
محبكيش ازاى بس يا نجوان ده انا ابقى مجنون لو محبتكيش
نجوان :انا اللى ابقى مجنونة لو صدقتك
مراد :اعمل ايه علشان تصدقينى قوليلى اعمل ايه وانا هعمله
نجوان :انا مش عايزاك تعمل حاجة انا عايزاك تطلقنى بس
تقى بترن الجرس انا هفتحلها واحط الغدا
فكر فى كلامى يا مراد لو سمحت
مراد :ابوس ايدك فكرى انتى فى كلامى يا نجوان
فيفيان :عارف ساعات كده ببقى مش حاسة بأى حاجة
لا فرحانة ولا متضايقة
مش حاسة بحاجة ولا عايزة حاجة غير انى اقعد ساكتة
وانا حاطة ايدى على خدى وبس
مصطفى :وانا كمان
فيفيان :انت كمان عايز تحط ايدك على خدك وتقعد ساكت
مصطفى :لا عايز احط ايدى على خدك انتى
فيفيان :انت بتهزر يا مصطفى
انا بجد زهقانة فمش وقت خفة دمك راعى مشاعرى مش كده
مصطفى :راعى انتى مشاعرى علشان خاطر ربنا
فيفيان :وانت ايه اللى مزعلك اتخانقت تانى مع باباك شكلك
يا مصطفى عدى وطنش مينفعش تشد معاه على كل حاجة كده
خلى بالك طويل خليك رويح يا ابا رشدى
مصطفى وهو بيضحك :حاضر هخلينى رويح
طيب انتى ايه اللى مزهقك اوى كده
فيفيان :حاسة ان مفيش اى جديد بيحصل فى حياتى
بروح الجامعة علشان احضر نفس المحاضرات لنفس الدكاترة وبشوف نفس الوشوش
ايامى كلها شبه بعض
مصطفى :طيب ما تعملى حاجة جديدة
فيفيان :حاجة جديدة زى ايه اشتغل مثلا
بابا مستحيل يوافق اشتغل وانا بدرس
مصطفى :ممكن تشتركى فى نشاطات عندك فى الجامعة
اعملى حاجات مش متعودة عليها اقرى مثلا لو ملكيش فى القراية
اكتبى جربى اكلات مجربتيهاش قبل كده
روحى اماكن مروحتيهاش
اتعرفى على ناس جديدة اعملى اصحاب يا فيفيان
فيفيان :انت علشان بتحب القراية عايزنى احبها زيك لا يا سيدى مش عايزة
بس ممكن اجرب بقية الحاجات اللى قولت عليها دى
بالنسبة للصحاب كفاية عليا جيهان ونجوان اخواتى وانت
انا مش عايزة اصحاب غيركم
مصطفى :علشان ملكيش اصحاب فى الجامعة زهقانة منها
لو ليكى اصحاب فيها مش هتزهقى منها بالعكس
حاولى تقربى من دفعتك
فيفيان :انت مش قولتلى مفيش صداقة بين راجل وست
مصطفى :انا قصدى قربى من بنات دفعتك يا حاجة متزيطيش
فيفيان :ليه يعنى ما انا وانت اصحاب اشمعنى انت
انت بتكيل بمكيالين على فكرة
مصطفى وهو بيضحك :لا انتى اللى حمارة
مراد :خدى دول
نجوان :ليه
مراد :علشان خطوبة جيهان اشترى فستان جديد تحضرى بيه
نجوان :عندى فساتين كتير متلبستش وحلوة على فكرة
مراد :عارف واساسا انتى اى حاجة بتبقى حلوة عليكى
بس انا عايزك تجيبى فستان مخصوص علشان كل ما حد يقولك ايه الحلاوة دى
تقولى مراد جوزى اللى بيحبنى ها واخدة بالك من بيحبنى دى
هو اللى جابهولى علشان احضر بيه خطوبة جيهان
نجوان :ملوش لزوم انا عندى فساتين كتير هتكون مناسبة
مش هنرمى الفلوس على الأرض
مراد :يا ستى انا عايز ارميها على الأرض هى فلوسى ولا فلوسك
واقولك حاجة انا هنزل معاكى نشتريه سوا واهو كمان ندخل سينما ونتغدى بره وبعدها نجيبه
واقضى احلى يوم مع مراتى اللى بحبها
نجوان :مراد ممكن من فضلك تبطل اللى بتعمله ده
مراد :لا مش هبطل
يا نجوان من فضلك انسى اللى سمعتيه انا بحبك والله بحبك
اخلى ماما تيجى تفهمك طيب ان مكنش قصدها اللى فهمتيه
نجوان :لا طبعا
مامتك تقول عليا ايه بتصنت عليهم
انا والله ساعتها مكنش قصدى اسمعها بس لما لقيت الكلام عنى مقدرتش ابعد غصب عنى
انما انا مكنش قصدى اتصنت عليهم والله
ومامتك حرة تكلم اختها فى اللى هى عايزاه ده حقها
وحقها كمان تشوف ابنها متجوز ومبسوط مع واحدة حلوة زيه او احلى منه كمان
مش واحدة وحشة هو احلى منها
انا من الأول كنت حاسة انها مش فرحانة بيا اللى سمعته اكدلى احساسى بس
مراد :انا اللى من حقى احب واتجوز اللى بحبها وده اللى انا عملته
انتى ليه بتفكرى فى ماما ومبتفكريش فيا يا نجوان
المفروض تفكرى فيا انا
انا جوزك اللى بيحبك
ليه سمعتى كلام ماما وصدقتيه ومش مصدقة كلامى انا
نجوان :علشان انت مبتقولش الحقيقة يا مراد
مراد :والله ما بكدب عليكى
انا تعبت اعمل ايه علشان تصدقينى
انا تعبت ومفيش حاجة بعملها معاكى بتنفع
نجوان :خلاص انا موافقة هشترى فستان جديد وهقول ان انت اللى اشترتهولى
كويس كده
مراد :لا هنخرج نتفسح وبعدين سوا هنشترى الفستان
نجوان :بس انا مش…
مراد قاطعها :اظن انى جوزك وانتى لازم تسمعى كلامى
نجوان :انا مش عايزة اخرج
مراد :نجوان انا قولت هنخرج كفاياكى مناهدة انا تعبت
نجوان :خلاص ماشى
فيفيان :جيهان فرحانة اوى بخطيبها وهو كمان فرحان بيها
بتقول ان ربنا عوضها بيه وانها كانت بتفكر غلط مكنتش عايزة تتخطب غير عن حب ورافضة الصالونات
واهو طلع الصالونات احسن مليون مرة
مصطفى :بصى هو كله نصيب فى الأول وفى الأخر
لا كل الصالونات حلو ولا كل اللى عن حب حلو
انتى بقى صحيح عايزة ايه عن حب ولا صالونات
فيفيان :مش عارفة مفكرتش فى الموضوع ده قبل كده
مصطفى :وهو انتى بتفكرى اصلا يا فيفيان انتى بتشلينى بس
فيفيان :لا بجد مفكرتش فى الموضوع قبل كده
مصطفى :وعهد الله مصدقك
فيفيان :طيب وانت عايز تخطب عن حب ولا صالونات
مصطفى :لا عن حب وعن صداقة واخدالى بالك انتى
لازم نكون اصحاب واكون بحبها
فيفيان :انت تستاهل كل خير يا مصطفى ربنا يرزقك بيها قريب يا رب
مصطفى :ربنا ياخدك يا فيفيان او ياخدنى ويريحنى من غبائك ده
فيفيان :الله ليه الغلط بس الحق عليا انى بدعيلك
مصطفى :لا ادعيلى يا فيفيان ادعيلى ان البقرة اللى بحبها تفهم وتحس بيا قبل ما تموتنى ناقص عمر بغبائها
مراد :ايه رأيك نروح نكشف بقالنا سنة وتلت شهور متجوزين ومحصلش حمل
نجوان :وليه يحصل حمل اذا كنا هنطلق يا مراد
نخلف طفل علشان يتعذب بينا
مراد :قولتلك انى مش هطلقك
نجوان انتى بتاخدى موانع للحمل من ورايا
نجوان :لا يا مراد علشان انا عارفة ان ده حرام ومينفعش
لو عملته من وراك
وممكن نروح نكشف وتتأكد بنفسك انى مبكدبش عليك
انا عمرى ما كدبت عليك يا مراد وكنت اتمنى انت كمان تكون صادق معايا زى ما انا صادقة معاك
عارف لو كنت من الأول قولتلى انك اختارتنى علشان انا وحشة
كان ممكن اوافق لأنى عارفة انى وحشة
وحتى لو موافقتش على الأقل كنت هحترم صراحتك وهقدرها
انما ليه تخدعنى وتقول اختارتك علشان بحبك
وانت اختارتنى علشان حبيت واحدة حلوة وخطبتها
ولقيت ناس كتير حاطين عيونهم عليها وباصينلك فيها
فانت زهقت وسيبتها
وقررت تريح دماغك وتتجوز واحدة وحشة محدش يبصلها غيرك
مراد :ده اللى فهمتيه من كلام ماما وخالتى صح
بس ده مش حقيقى
عايزة تعرفى الحقيقة يا نجوان
نجوان :اه قولها انا هتحمل اسمع الحقيقة مهما كانت
مراد :انا اللى مش هتحمل اقولها
مش كل الحقايق تتقال يا نجوان
انا مختارتكيش علشان هى احلى منك
هى مش احسن منك يا نجوان
نجوان :متكدبش عليا يا مراد انا شوفتها
اتحايلت على تقى لحد ما رضيت وورتنى الانستجرام بتاعها
هى حلوة لا الحقيقة هى حلوة اوى موزة ولا صاروخ زى ما بيقولو
حد يسيب القمر دى علشان الناس شايفينها حلوة وباصينله فيها
مراد :انا مسيبتهاش علشان حلوة والناس باصينلى فيها يا نجوان
انا سيبتها علشان خانتنى
الموزة الصاروخ القمر اللى بتتكلمى عنها دى مريضة نفسية بتحب تسمع كلام الرجالة الحلو عنها وتغزلهم فى جمالها اللى مفيش منه
مخطوبين وبتكلم غيرى كتير
ده اللى اكتشفته وعلشان كده سيبتها
اهلى فكرو انى سيبتها علشان تعبت من انها حلوة وملفتة وكل الناس باصينلى فيها
وانا مصصحتش فهمهم الغلط ده
مقدرتش اقول انها كانت بتخونى كرامتى مسمحتليش
نجوان :وعلشان كرامتك متتجرحش تانى اختارتنى انا واتجوزتنى
مراد :فى الأول قربت منك علشان فكرت كده
كنت عايز واحدة متخونيش وميبقاش كل الرجالة عيونهم عليها
بس والله العظيم بعدها حبيتك انتى خلتينى احبك
وعلشان كده خطبتك واتجوزتك
انا اتجوزتك علشان انتى احسن منها يا نجوان انتى محترمة ومتربية وعارفة ربنا ومستحيل تخونينى
نجوان :هخونك مع مين وانا مين هيبصلى غيرك اصلا علشان تقلق منه
مراد :كتير يتمنو زوجة زيك يا نجوان
انا بخاف حد غيرى يقرب منك ويعرفك ليحبك زى ما انا حبيتك
انا بغير عليكى من كل رجالة الدنيا انا بغير عليكى حتى من أحمد وعلى اخواتى
لما بفكر اننا ممكن نطلق وتتجوزى واحد غيرى بحس انى مش عارف اخد نفسى وهموت من الغيرة
انا مش هكدب عليكى فى الأول تفكيرى كان غلط
بس انتى باخلاقك وطيبتك وحنيتك غيرتى تفكيرى
الخيانة مش سببها الجمال يا نجوان الخيانة سببها الأخلاق
ببساطة فى بنات محترمة اهلها عرفو يربوها وبنات لا
انتى علمتينى الدرس ده
انا بحبك ومفيش ست احلى منك فى عيونى
نجوان :انت بتقول كده بس علشان منطلقش
مراد بانفعال :حرام عليكى بقى انا تعبت
انتى مفكرتيش انا ليه متمسك بيكى اوى كده
ورافض اننا نطلق ما علشان بحبك
طالع عين اهلى معاكى علشان اقنعك انى بحبك
واخليكى تغيرى اللى فى دماغك ده علشان بحبك يا نجوان
قولتلك اللى مقولتوش لحد فى الدنيا علشان بحبك
قولت يمكن لما تعرفى الحقيقة كلها تصدقينى
بس تعرفى انا اكتشفت حاجة مهمة
المشكلة اصلا مش فيا المشكلة فيكى انتى يا نجوان
المشكلة ان نجوان مبتحبش نفسها وعلشان كده مش مصدقة انى بحبها
وعلشان كده تاعبانى وتاعبة نفسك
مصطفى :فيفيان انا بحبك وعايز اتقدملك
فيفيان بصدمة :قولت ايه
مصطفى :ايه مسمعتيش بقولك انا بحبك وعايز اتقدملك
فيفيان :ايه يا مصطفى ده
حد يقول لبنت مرة واحدة كده انا بحبك وعايز اتقدملك
مش تمهد الأول وتلمح
الحاجات دى مبتتقالش خبط لزق كده
مصطفى بانفعال :خبط لزق ايه خبط لزق ايه يا شيخة
انا بقالى شهور بمهدلك
لمحت بالأدب مفهمتيش لمحت بقلة الأدب محستيش بيا
لا رومانسية نافعة معاكى ولا صياعة بتأثر فيكى
عديت مرحلة انى لمح ودخلت فى مرحلة انى القح وانتى ولا انتى هنا
وانا خلاص يأست مش هلمح تانى
من الأخر وعلى بلاطة انا بحبك وعايز اتقدملك
فيفيان :يا مصطفى اهدى بس وتعالى نتكلم بالعقل
انت ممكن تكون فاهم مشاعرك غلط
مصطفى :فاهم مشاعرى غلط ازاى يعنى
فاهم فرحتى بكلامى معاكى غلط
ده انا مبعديش يوم من غير ما اتكلم معاكى
ولا فاهم لهفتى انى اشوفك غلط
ده انا ما بصدق نتقابل من كتر ما بتكونى وحشانى
ده انا ببقى حاسس انك وحشانى حتى وانتى معايا وشايفك قصاد عينى
انتى فاكرة الأغنية اللى كانت سبب اننا اتكلمنا
مخدتيش بالك انى عاملها رنة لموبايلى من كتر ما بقيت بحبها بسبب انها السبب اننا اتكلمنا
بقيت بحبها وبحب الذكريات الوحشة اللى ليا معاها علشان بسببهم اتكلمت معاكى يومها
انا مش مضايق ولا ندمان على كل تجاربى الفاشلة قبلك علشان كانو السبب انى اعرفك واحبك
واعرف انى بحبك
انا بالى مش طويل يا فيفيان قصص حبى كانت بتفشل علشان مكنتش بتعب فيهم نفسى كان قصير مع اول مشكلة الموضوع بينتهى
انما معاكى انا نفسى طويل شهور بحاول المحلك بس انى بحبك
حاولت وبحاول ولسه عندى استعداد احاول اكتر علشانك
وده عكس طبيعتى ودى اكتر حاجة معرفانى انى بحبك
علشان معاكى وعلشانك بكون مصطفى تانى غير اللى انا اعرفه ومتعود عليه
لو ده كله معناه انى فاهم مشاعرى غلط وانه مش حب
يبقى انا معرفش ايه الحب لو مش اللى انا حاسه ناحيتك يا فيفيان
فيفيان :يا مصطفى افهمنى انا مبفكرش فيك كده
خلينا اصحاب زى ما احنا
انا مبسوطة ومرتاحة واحنا اصحاب
مصطفى :انتى مبتفكريش اصلا
علشان انتى لو بتفكرى كنتى هتعرفى انى مش هقدر اتحمل نكمل كده مش هعرف
احنا مش اصحاب وبس انا مش شايفك كده
فيفيان :وبالعقل يعنى انا مش مجبورة اشوفك غير كده
مصطفى :صح انتى مش مجبورة ولا انا مجبور
كل واحد فينا حر فى نفسه
فيفيان :خلينا نتكلم بس واكيد هنوصل لنقطة تفاهم
مصطفى :مش هيحصل يا فيفيان
علشان انتى بتتكلمى بالعقل وانا بتكلم بالقلب وبالمشاعر
عمرنا ما هنوصل لنقطة تفاهم مش هنوصل غير لحيطة سد زى اللى وصلنالها دلوقتى دى
هى خلصت كده مفيش كلام تانى يتقال صدقينى
خلى بالك من نفسك
فيفيان :مصطفى…يا مصطفى
نجوان بلهفة :اخيرا رجعت انت فين من امبارح يا مراد
موتنى من الخوف عليك وبعدين مكنتش بترد على تليفوناتى ليه
حتى لو متخانقين ده ميمنعش انك ترد وتطمنى عليك
مراد :البسى احلى فستان عندك والبسى حجاب كمان
نجوان باستغراب :ليه احنا رايحين فين
مراد :احنا مش رايحين فى حتة بس اهلى واهلك جايلنا
انا كلمتهم
نجوان بخوف :كلمتهم ليه انت ناوى تطلقنى النهاردة ولا ايه
انا من امبارح وانا بفكر فى كلامك
وشايفة اننا ممكن نتكلم تانى يعنى بلاش نتسرع ونتطلق دلوقتى
مراد :ليه مش ده اللى كنتى عايزاه
نجوان :مش لازم دلوقتى نخليها بعدين ايوه الأفضل نخليها بعدين
مراد :ايه فايدة التأخير مادام كده كده النتيجة واحدة
تعب قلب وخلاص
فيفيان :خلاص انا غيرت رأيى مش عايزة اتطلق انا مصدقة انك بتحبنى وانك متجوزتنيش علشان شكلى وحش
ومسامحاك على انك فى الأول فكرت كده
مطلقنيش يا مراد انا مش عايزة اتطلق
مراد وهو بيمسح دموعها :ومين قالك انى هطلقك
فيفيان :اومال جايب اهلى واهلك ليه هتشتكيلهم منى حقك عليا انا اسفة علشان تعبتك معايا
بلاش ندخل حد بينا يا مراد اى مشاكل بينا احنا نقدر نحلها سوا
مراد :انا عازمهم على الغدا مش جايبهم علشان اشتكى منك متخافيش ويلا بقى غيرى هدومك زمانهم على وصول
الجرس بيرن هروح افتح
فيفيان :انا معملتش اكل يا مراد طيب مش كنت تعرفنى
مراد وهو رايح ناحية الباب :ده الدليفرى وصل انا طلبت اكل من بره
غيرى انتى بس بسرعة علشان هما على وصول خلاص
مراد :منورينا يا جماعة
مبسوط اوى انكم معانا النهاردة
عزومة النهاردة دى مخصوص علشان نجوان
من سنتين فى نفس الشهر ده انا قابلت نجوان وبسرعة جدا حبيتها وعرفت انها الإنسانة اللى هتشاركنى حياتى
وعلشان كده من غير تردد خطبتها بسرعة علشان كنت خايف حد يسبقنى ويخطفها منى
خدت بالى انى مبقولش كلام حلو عن نجوان كتير قدامكم وعلشان كده متعرفوش انا قد ايه بحبها وقد ايه سعيد علشان هى معايا
فقررت اننا نتجمع النهاردة علشان اتكلم معاكم عنها
ولو ان مفيش كلام يوصفها
جيهان :جميل كلامك يا مراد
انت شجعتنى انا كمان اتكلم عن نجوان لأن أنا كمان مبتكلمش عنها كتير مع انى بحبها اوى
نجوان اطيب واحدة فى الدنيا دايما لما كنا بنتخانق هى اللى كانت بتيجى تصالحنى بحسها امى التانية مش اختى الكبيرة
الفرق بينا سنتين بس انا من كتر حنيتها عليا بحسها امى والله
هى اول صاحبة ليا فى الدنيا واعز اصحابى كمان
فيفيان :انا كمان بحس نجوان امى التانية علشان هى كانت بتاخد بالها منى ومبتسيبش حد يضايقنى ابدا
بتعمل اى حاجة علشان تفرحنى وعلشان تفرحنا كلنا
انا من كتر ما بحبها هى وجيهان عمرى ما احتاجت اصحاب غيرهم هما اخواتى واصحابى وحبايبى انا مليش غيرهم
سعاد :نجوان بنتى البكرية اول فرحة ليا
زى ما اخواتها قالو مفيش اطيب منها
عمرها ما قالتلى لا على حاجة طول عمرها بتسمع الكلام
ومتعبتنيش فى حاجة خالص
حتى بعد ما اتجوزت اهى رافعة راسنا ومفرحانا بكلامك عنها يا مراد
ربنا يهدى سركم يا حبيبى ونفرح بعوضكم قريب يا رب
شاكر :مش عارف اقول ايه غير انى فرحان ومطمن ان بنتى مع واحد بيحبها ومقدرها وعارف قيمة الجوهرة اللى معاه
ربنا يسعدكم يا رب
تقى :ايه هو محدش هيتكلم غير عيلتك يا نوجا ولا ايه
انا كمان عايزة اقول انى بحب نجوان اوى وان مفيش فى طيبتها ولا حنيتها
وقت امتحاناتى هى خلتنى اجى اقعد معاهم هنا علشان ابعد عن التوتر والخوف
مكنتش بتخلينى اساعدها فى حاجة كانت بتعملى كل حاجة حتى كانت بتجبلى كل يوم شيكولاتة علشان الشيكولاتة بتحسن المزاج وبتحسس الواحد بسعادة زى نجوان بالظبط
لولاها مكنتش هعرف اجيب مجموع هندسة واحقق حلمى مش بس علشان الهدوء اللى كانت موفرهولى علشان اذاكر
لا كمان علشان تشجيعها ليا وثقتها فيا زودت ثقتى فى نفسى
مهما قولت مش هعرف اشكرك يا نوجا انا بحبك اوى
عبدالهادى :انت عرفت تنقى يا مراد مراتك ربنا يحميها مفيش فى ادبها واخلاقها ولا ايه يا فاطمة
فاطمة :معاك حق طبعا نجوان مفيش منها وبعد اللى عملته مع تقى يعلم ربنا انى بقيت بحبها وغلاوتها عندى بقت من غلاوة ولادى
احمد :نجوان فعلا انسانة كويسة جدا ربنا يباركلك فيها يا حبيبى
ويرزقنا بزوجة صالحة كده زيها
على :ربنا يسعدكم
شوف انت اخويا بقالك كام سنة بس مكنتش اعرف انك ليك فى الرومانسية يا مراد انا منبهر بيك النهاردة
والحقيقة انا منبهر كمان بالأكل ريحته حلوة اوى وتجوع
انت هتأكلنا ولا جايبنا نتفرج على الأكل بس
مراد وهو بيضحك :انت على طول كده همك على بطنك
متقلقش هأكلك اتفضلو يا جماعة على السفرة
نجوان بدموع فى عيونها :ثانية بس معلش
انا كنت عايز اقول انك احلى حاجة حصلتلى فى حياتى وانى بحبك يا مراد…وبحبكم كلكم طبعا ربنا ميحرمنيش منكم ابدا
على :يا رب
ها هناكل ولا فى حد عايز يقول حاجة تانى…مفيش يبقى ناكل بقى
مصطفى :اخبارك ايه يا فيفيان
فيفيان :انا بخير الحمد لله انت عامل ايه
مصطفى :كويس الحمد لله
فيفيان :كنت خايفة مترضاش تقابلنى
مصطفى :وانا امتى رفضتلك طلب قصدى يعنى انى كان عندى فضول اعرف عايزانى فى ايه
فيفيان :من كام يوم مراد جوز نجوان اختى عزمنا وعزم اهله عندهم فى البيت علشان يتكلم معانا عن نجوان
عن قد ايه هو بيحبها ومبسوط معاها
حركة حلوة اوى مشوفتهاش ولا حتى فى الأفلام
نجوان كان شكلها فرحان
واضح انه عمل كده علشان يفرحها واللى عمله فعلا فرحها وفرحنا كلنا علشانها
بعد ما رجعت البيت فكرت انا لما اتجوز ممكن جوزى يعمل كده علشانى
لقيت انه ممكن اه لو كان انت
لما جيت اتخيل بيت بتاعى عايشة فيه انا وجوزى
تخيلتك يا مصطفى
بص انت عندك حق انا مبفكرش انا اسفة وغبية ومبفكرش لأنى لو فكرت كنت عرفت انك بتحبنى
وانى مقدرش اعيش من غيرك مش عارفة ده معناه انى بحبك ولا لا
بس انا عايزاك فى حياتى وعايزاك بتحبنى وبتحس بكل اللى قولتهولى ده تجاهى
وعايزة اكون فى حياتك يا مصطفى ولو هشارك راجل حياته عايزاك تكون الراجل ده
هات موبايلك…افتحه معلش…اسمع رنتى انا كمان عملت الأغنية الكئيبة الحزينة رنة لموبايلى علشان كل ما اسمعها بفكر فيك وبفتكر انى عرفتك بسببها
مصطفى :عايزة تقولى حاجة تانية
فيفيان :لا ولا استنى اه عايزة اقولك انى كنت مضايقة اوى علشان مكناش بنتكلم وانك كنت واحشنى اوى
وانى مبسوطة انى شايفاك دلوقتى
وانى اسفة انا قولتلك انى اسفة صح
مصطفى :قولتى اه
فيفيان :طيب وانت سامحتنى ولا اقولها تانى ولا اعمل ايه
مصطفى :لا خلاص
فيفيان بخضة :يا لهوى خلاص ايه
مصطفى :اهدى فى ايه خلاص سامحتك
فيفيان :يعنى هنرجع اصحاب تانى
مصطفى :يا سواد الحلل عليا وعلى سنينى البيضا
لا يا فيفيان مش هنرجع اصحاب قولتلك انا بحبك وعايز اتقدملك
موافقة ولا هتشلينى الأول وبعدين توافقى واقعد جمبك فى الكوشة على كرسى بعجل
فيفيان وهى بتضحك :لا موافقة متبقاش حمقى الله
ايه معرفش اتقل عليك شوية
مصطفى وهو بيضحك :بعد ما نتخطب ولا خليها بعد ما نتجوز اتقلى براحتك
انما دلوقتى لا انسى…رنى عليا كده…سامعة لسه مخليها رنة موبايلى معرفتش اغيرها زى ما معرفتش ابطل تفكير فيكى طول الفترة اللى فاتت
مبسوط انى مش مضطر احاول انساكى واتجاوزك وكل الكلام الأهبل ده
فيفيان بابتسامة :وانا كمان مبسوطة انك مش مضطر تنسانى ولا تتجاوزنى وكل الكلام الأهبل ده
