بعد شهرين

مصطفى :اخيرا عارف اكلمك مكالمة عدلة زى الناس

قمر الليالى :واحنا قبل كده مكناش بنتكلم مكالمات عدلة زى الناس

مصطفى :لا طبعا

انتى كنتى مشغولة فى شغلك وفى تجهيزات فرح احمد وسلمى

فمكناش بنعرف نتكلم

ولو اتكلمنا بتكروتينى اللى هو ايوه يا مصطفى

انا لسه عايشة انت كمان لسه عايش طيب كويس هقفل بقى معلش

علشان مشغولة او تعبانة وعايزة ارتاح

قمر الليالى وهى بتضحك :الله ما انا فعلا الفترة اللى فاتت يا كنت مشغولة يا تعبانة

انت مش متخيل الضغط اللى كنت فيه ده ولا كأنى انا اللى بتجوز

مصطفى :الحمد لله انك مبقتيش مشغولة اوى كده

طمنينى عليكى عاملة ايه

قمر الليالى :كويسة الحمد لله

فرحانة اوى لاحمد وسلمى اخيرا هيتجوزو

مصطفى :ربنا يتمملهم على خير

هما اول اتنين فى العيلة عندكم يتجوزو من العيلة

قمر الليالى :مش اول اتنين يحاولو بس اول اتنين ينجحو ويكملو الجوازة للأخر

مصطفى :مين حاول قبلهم

قمر الليالى :انجى بنت عمى كرم وعمر ابن عمتى دلال ده انت مشفتوش معرفش يجى يوم الخروجة

وانا وسعد ابن عمى كرم سعد برضه مجاش يوم الخروجة

مصطفى :انتى وسعد ده مالكم معلش

قمر الليالى :مالنا ازاى يعنى

مصطفى :يعنى انتى بتقولى انجى وعمر وانتى وسعد مالكم بقى عملتم ايه

قمر الليالى :حاولنا نتجوز بس منفعش انجى وعمر من كتر زن العيلة عليهم فكرو يجربو يشوفو ايه الدنيا بينهم

خروجو سوا كام مرة وجربو يتكلمو فى الموبايل يقربو من بعض يعنى بس لقو انهم مينفعوش غير اخوات وقرايب محدش فيهم عرف يشوف التانى حاجة غير كده

فالموضوع اتقفل من غير ما حتى تتقرى فاتحة

مصطفى :تمام وانتى وسعد ايه جربتوا برضه زيهم ومعرفتوش

قمر الليالى :لا هما اللى جربو زينا لأنهم بعدنا وعلشان كده هما اتعلمو من غلطنا ومتخطبوش على طول

مصطفى :هو انتى كنتى مخطوبة لسعد ده

قمر الليالى :اه

مصطفى :اه ايه

قمر الليالى :اه كنا مخطوبين بس مكملناش

مصطفى :ليه

قمر الليالى :ليه ايه ليه اتخطبنا ولا ليه مكملناش

مصطفى :الاتنين

قمر الليالى :مش شايف ان السؤال شخصى شوية

مصطفى:وانتى مش شايفة اننا عدينا المرحلة اللى تقوليلى فيها على سؤال بسأله ده سؤال شخصى

انا بجاوب كل اسئلتك وفكرت ان عادى انتى كمان تجاوبى كل اسئلتى وعلى العموم لو مش عايزة تجاوبى متجاوبيش

واضح ان السؤال بيقلب عليكى المواجع

قمر الليالى :لا مفيش مواجع يقلبها سؤالك بالعكس

دى كانت تجربة انا استفدت منها كتير

شكلك زعلت انى قولتلك ان السؤال شخصى على فكرة مش قصدى اضايقك انا بنكشك علشان تقولى عارف ان السؤال شخصى شويتين مش شوية وعايزك تجاوبيه فجاوبه على طول

مش معقول تكون لسه معرفتش اسلوبى وخدت عليه

مصطفى :خلاص انا عارف ان السؤال شخصى شويتين تلاتة اربعة مش شوية وعايزك تجاوبيه جاوبى بقى

قمر الليالى :خلاص متزوقش هجاوب

بص يا سيدى انا وسعد من صغرنا وعلاقتنا ببعض قوية احنا الاتنين اقرب اتنين لبعض فى العيلة كلها

اسرارنا واحلامنا وحتى مخاوفنا كانت كلها مع بعض

بعد ما سعد اتخرج واشتغل بدأت العيلة تتكلم فى اننا نتخطب ناس تلمحلى وناس تلمحله وناس يفاتحونا فى الموضوع بشكل مباشر احنا بقى مع الزن الكتير قولنا ماشى نتخطب هيحصل ايه يعنى

مصطفى :وحصل ايه خلا الخطوبة تتفسخ

قمر الليالى :محصلش حاجة

مصطفى :انتى بتهزرى يا قمر الليالى انا بتكلم جد

قمر الليالى :انا كمان بتكلم جد

محصلش حاجة وعلشان كده انا طلبت منه اننا نفسخ الخطوبة

افهمك اكتر انا وسعد بعد الخطوبة فضلنا زى ما احنا

مفيش حاجة فى علاقتنا اتغيرت مفيش حاجة فى نظرة كل واحد فينا للتانى او فى احساس كل واحد فينا بالتانى اتغيرت

العيلة كلها كانت مقضياها هزار علينا وبيتعاملو على اساس اننا قصة حب كبيرة توجت بالخطوبة وانا وهو مش حاسين بكلامهم ده

سعد لما كان بيحكيلى عن البنات اللى بتحاول تتعرف عليه او تقرب منه زى ما كان بيحكيلى قبل ما نتخطب مكنتش بغير ولا بتضايق زى برضه ما كنت مبضايقش ولا بغير قبل ما نتخطب

انا فاكرة فى مرة كان بيحكيلى عادى عن واحدة زميلته فى الشغل اسمها حبيبة بيحكى عن حاجات عادية يعنى بينهم فى الشغل بس كان بيتكلم عنها كتير شوية وبتركيز كده

انا كنت حاسة من كلامه عنها أنها لايقة عليه

فقولتله سعد ما تجرب كده تقرب منها انا شايفة انها لايقة عليك وحاسة ان ممكن يحصل بينكم حاجة حلوة لو اديت الموضوع فرصة

لقيته بيضحك وبيقولى انتى ناسية انك خطيبتى ولا ده فخ واختبار ليا لا يا قمر انا واعى اوى ومصحصح مش هتعرفى توقعينى مش انا اللى اخون لا

الفكرة انى مكنتش بختبره ولا حاجة انا فعلا لحظتها نسيت انى خطيبته وكنت بكلمه عادى

واكتشفت انى اغلب الوقت بنسى حكاية اننا مخطوبين دى

وبتعامل معاه عادى على اساس اننا ولاد عم واخوات واصحاب

انا مبفتكرش اننا مخطوبين تقريبا غير لما حد فى العيلة يقول اننا مخطوبين او لما سعد نفسه يقول

مصطفى :طيب كلامك ده معناه ان انتى اللى مفيش حاجة اختلفت عندك

انما هو بقى ما عادى ممكن تكون حاجات كتير اختلفت عنده فى احساسه بيكى

قمر الليالى :لا لو حصل مكنتش هسيبه لأنى وقتها كنت هبقى بكسر قلبه وانا مقدرش اكسر قلبه

ولا اقدر اكسر قلب اى حد

سعد فضل زى ما هو معايا فضلت بحس انى اعز اصحابه وزى انجى اخته محستش للحظة واحدة انى حبيبته وخطيبته اللى هتبقى مراته

وعلشان كده طلبت نفسخ الخطوبة لأن كل واحد فينا بقى واخد مكان مش بتاعه

وقتها سعد رفض

مصطفى :علشان بيحبك

قمر الليالى :لا علشان مكنش مقتنع اننا مينفعش نتجوز واحنا مش بنحب بعض مينفعش نتجوز لمجرد اننا اصحاب وصداقتنا قوية

معرفتش افهمه ان ممكن بكرة حد فينا يقابل اللى يحبه نعمل ايه وقتها بقى نخون بعض ولا نكمل مع بعض فى حياة تعيسة

حاولت افهمه كتير بس مفهمش ولا اقتنع غير لما حب واتجوز عن حب

مصطفى :هو حب واتجوز كمان

قمر الليالى :اه الحمد لله ربنا يسعدهم يا رب

مصطفى :هو اتجوز مين حد من عيلتكم

قمر الليالى :لا حبيبة زميلته اللى قولتلك انى قولتله يحاول يقرب منها

مصطفى :اتجوزها

قمر الليالى :حصل

بعد ما خطوبتنا اتفسخت هو شافها وشاف قد ايه هى لايقة عليه هو كان معجب بيها ومش عارف او وجودى كان منعه يشوف انه معجب بيها ومركز معاها زيادة عن تركيزه مع اى حد

لأن فى العادى سعد اصلا مبيركزش مع اى حد

وده اللى خلانى اعرف انها مميزة من تركيزه وكلامه الزايد عنها

هو كلامه كان عادى بس احنا بنحس بالحاجات دى

انتم مبتاخدوش بالكم بسهولة انما احنا بنفهمها وهى طايرة

مصطفى :انتى فهماه اكتر من نفسه ليه حق يرفض يسيبك مش كل يوم الواحد بيلاقى واحدة تفهمه اكتر من نفسه

قمر الليالى :يعنى يتجوزنى علشان بفهمه اكتر من نفسه وبعدها يلاقى اللى تخطف قلبه ويحبها اكتر من نفسه فيبقى وضعى ايه بقى ساعتها

مينفعش ده مش عدل فى حق اى حد فينا

مصطفى :وعلاقتكم بقت عاملة ازاى بعد ما فسختى الخطوبة غصب عنه

قمر الليالى :مرجعتش زى الأول طبعا

مكنش ينفع ترجع زى الأول بعد اللى حصل خصوصا ان هو كان مضايق منى شوية علشان مكنش عايز يفسخ الخطوبة

وبعد كده لما حب حبيبة وخطبها وخلاص اقتنع انى عملت الصح وفهم كلامى اللى قولتهوله كتير ومفهموش ولا اقتنع بيه

مكنش ينفع برضه علاقتنا ترجع زى الأول علشان هى عمرها ما كانت هتفهم اننا قرايب واخوات واصحاب

كانت هتفضل شايفانى خطيبته الأولانية

فانا راعيت احساسها واحترمت وجودها ومحاولتش اتعامل مع سعد زى زمان

علشان وجودها وعلشان مبقاش ينفع فى حاجات لما بتتغير مينفعش ترجع زى الأول مهما حصل بتمسخ

مصطفى :بتمسخ

قمر الليالى :اه بتبقى ماسخة ولا ليها لون ولا طعم

مصطفى :يعنى انتى دلوقتى تعاملك مع سعد بقى عامل ازاى

قمر الليالى :تعامل عادى زيه زى اى حد فى شباب العيلة بقينا ولاد عم وبس انما اصحاب واقرب اتنين لبعض دى خلاص مبقتش تنفع

كمان ده مكان المفروض حبيبة اللى تاخده ده حقها

مصطفى :متضايقة ان علاقتكم مبقتش زى الأول

قمر الليالى :متضايقة انى مفكرتش اننا لو اتخطبنا ولا اتجوزنا وفشلنا التعامل بينا هيختلف وعلاقتنا هيبقى فيها توتر كبير

قولت ايه اللى هيحصل يعنى

وطلع ممكن حاجات كتير تحصل

انا من بعد الحكاية دى وانا بقيت بفكر كويس اوى قبل ما اخد اى قرار مهم

قلة التفكير خسرتنا كتير زى ما بيقولو

عمر وانجى بقى لما اتحطو فى نفس الوضع اللى اتحطينا فيه انا وسعد

قررو انهم مش هيتخطبو على طول لا قبل اى حاجة هيتأكدو ان هو ده اللى هما فعلا عايزينه

مصطفى :هما علاقتهم ببعض كانت قوية اوى زيك انتى وسعد

قمر الليالى :لا بس هما شافو بنفسهم ان موضوع الخطوبة ده لو مكملش بيبقى فى توتر فى التعامل فقالو انهم مش عايزين يخاطرو

ويمكن هما واعيين اكتر وبيفكرو احسن منى انا وسعد

احنا ضبشنا كده وخلاص انما هما بيحسبو خطواتهم صح

برافو عليهم والله

مصطفى :يعنى انتى لو كنتى حبيتى سعد كنتى هتكملى معاه

قمر الليالى :ايوه طبعا

مصطفى :مكنتيش هتسيبيه

قمر الليالى :محدش بيسيب حد بيحبه والا ميبقاش بيحبه

مصطفى :صح محدش بيسيب حد بيحبه ده لو كان بيحبه بقى

قمر الليالى :انا قلبت عليك المواجع من غير ما اقصد صح

مكنش قصدى والله

مصطفى :مقلبتيش المواجع ولا حاجة

انتى عارفة انك طيبة ورقيقة اكتر من اللزوم يا قمر الليالى

قمر الليالى :طيبة دى سمعتها من ناس كتير انما رقيقة دى اول مرة حد يقولهالى

دايما بيقولولى يا سرسوجة

مصطفى وهو بيضحك :انتى ارق سرسوجة فى الدنيا يا قمر الليالى

انتى عارفة انك الوحيدة اللى بتضحكنى جامد كده

قمر الليالى :ليه انت كل اللى تعرفهم دمهم تقيل ولا ايه

مصطفى :لا بس برضه مفيهمش حد بخفة دمك

ولا خفة روحك انتى روحك خفيفة اوى بجد

وجودك معايا مخلى الدنيا خفيفة على قلبى بعد ما كانت مفيش اتقل منها

قمر الليالى :وجودى معاك واحنا مبنتقابلش ده اللى هو ازاى

مصطفى :كفاية وجودك بكلامك كفاية صوتك

انتى عارفة انى بحب صوتك اوى برتاح لما بسمعه

قمر الليالى :الوقت اتأخر وانا لازم اقفل

ادينا اتكلمنا كتير اهو وعوضتك عن الفترة اللى فاتت واعتبره تعويض كمان عن انشغالى اللى لسه هنشغله مع سلمى فى الفرح

مصطفى :يعنى انا عايز اشوفك ومش عارف

هيبقى لا بشوفك ولا بتكلم معاكى كمان

قمر الليالى :لا هنتكلم بس اليومين الجايين دول هيبقى كلامنا على خفيف

سلمى بنكمل معاها حاجات ناقصاها

وعايزين نشترى فساتين للحنة والفرح كمان فهنلف كتير اوى

مصطفى :طيب انا عايز اشوفك بالفستان ابقى ابعتيلى صورتك يومها

قمر الليالى :اكيد مش هعمل كده

مصطفى :ليه بس

قمر الليالى :مش عارفة هتحرج ومش هكون مرتاحة

مصطفى :يعنى انتى عادى هيشوفك الناس فى الشارع وكل الناس اللى هتكون فى القاعة يومها

بس هتتحرجى تبعتيلى صورتك وهتكونى مش مرتاحة

قمر الليالى :اه

مصطفى :هو ايه اللى اه ما أمة اشهد ان لا اله الا الله هتشوفك كلها اهيه جات عليا يعنى

قمر الليالى :اه جات عليك مش هعرف وربنا بجد مش هقدر

انا هقفل بقى بقالنا كتير بنتكلم

مصطفى :ما بنعوض الفترة اللى فاتت وانتى مسقعالى فيها وبنعوض مقدما الكام يوم الجايين اللى هتسقعيلى فيهم

قمر الليالى وهى بتضحك :وللأسف هسقعلك دلوقتى واقفل علشان عندى شغل بكرة ولازم انام دلوقتى

مصطفى وهو بيضحك :هى بقت كده

قمر الليالى وهى بتضحك :اه بقت كده

تصبح على خير يا مصطفى

مصطفى :وانتى من اهل الخير يا قمر الليالى

فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر