#حكايات_منار
حكاية ” مش النهاية “
الجزء التانى والأخير
تامر :شذى
شذى :ايوه يا دكتور تامر
شيريهان :طيب هنسبقك احنا على الكافتيريا يا شذى
شذى بصوت واطى :ليه خليكم
شيماء بصوت واطى :مينفعش…بعد اذنك يا دكتور
تامر :اتفضلو
شذى :خير يا دكتور انا عملت حاجة غلط فى الشيت الأخير اللى سلمناه ولا حاجة
تامر :لا انا لسه مصحتتش الشيت اصلا
انا بس كنت عايز اسألك على حاجة
شذى :اتفضل
تامر :انا بقيت بشرب نعناع وبحليه بالعسل الأبيض زى ما والدك كان بيقول انا كمان قولونى بيتعبنى
بس هو مبيجيبش معايا نتيجة فكنت عايز اعرف الطريقة اللى بتعملوه بيها يمكن اكون بعمله غلط
شذى :انت بتغلى ورق النعناع ولا بتحطه فى الكوباية زى الشاى وتصب فوقه المياه السخنة وخلاص
تامر :لا بعمله زى الشاى
شذى :لا حضرتك الأفضل تغليه مع المياه وبعد ما تصبه فى الكوباية غطيها وسيبه بتاع خمس دقايق وبعدين اشربه
تامر :خلاص هجرب على الله يجيب نتيجة
شذى :هو بابا لما النعناع مبيجيبش نتيجة بيشرب حاجة تانية اقوى من النعناع بس للأسف انا مش فاكرة اسمها…انا ممكن اكلمه اسأله لو حضرتك عايز
تامر :يا ريت من فضلك
شذى :حاضر…الو يا بابا
حسن :ايه يا بت هو انا مش لسه سايبك من كام ساعة بتكلمينى ليه هيبقى فى البيت معايا وبره البيت بتكلمينى فى الموبايل لا كده كتير
شذى وهى بتضحك بحرج :تسلملى يا حبيبى
متخافش انا كويسة انا بس عايزة اسألك على حاجة
حسن :انتى بتردى كده ليه فى حد جنبك ولا ايه
شذى :اه يا حبيبى قولى بس انت ايه البتاع اللى بتشربه لما القولون يشد عليك علشان يهدا
حسن :نعناع
شذى :غير النعناع البتاع اللى بتشربه التانى ده
حسن :مش عارف انا بشرب حاجات كتير ما انتى عارفة انى بحب الأعشاب
شذى :البتاع اللى شبه اليانسون ده يا ابو على
اللى انا مبحبش طعمه ومهما تتحايل عليا مبشربوش
حسن :اه قصدك الشمر
شذى :ايوه هو ده تسلم يا بابا
خلى بالك من نفسك مع السلامة
حسن :مع السلامة
شذى :اسمه شمر يا دكتور حضرتك ممكن تجيبه من عند العطار
تامر :مفيش منه باكيت
شذى :مش عارفة بس بابا بيقول ان السايب احسن وافيد من الباكيت
تامر :خلاص هجيبه من عند اى عطار انتى قولتى اسمه ايه
شذى :شمر تعمله بنفس الطريقة اللى قولتلك تعمل بيها النعناع
تامر :ماشى شكرا يا شذى
شذى :العفو يا دكتور على ايه بعد اذنك
تامر :انتى رايحة الكافتيريا صح
شذى :اه
تامر :يضايقك لو مشيت معاكى لهناك عايز اجيب قهوة
شذى :ها…اااا…لا مفيش مشكلة
بس حضرتك لازم تقلل القهوة او تبطلها خالص لأنها بتهيج القولون اى حاجة فيها كافيين بتهيج القولون
تامر :انتى والدك بيحب القهوة برضه
شذى :لا الحمد لله مبيحبهاش اوى كان بيشربها قليل وحاليا مبطلها خالص كفاية الحاجات اللى بيحبها وبتهيج القولون مش هنزود عليهم القهوة كمان
تامر :هو مش واخد باله من صحته
شذى :للأسف لا بابا عايش بكيفه اللى يجى على باله ياكله واللى يجى على مزاجه يشربه وبعدين ياخد الدوا
تامر :كل الناس كده انا كمان والدى كده ووالدتى كمان ومهما اتكلم معاهم يقولولى انت هتعمل علينا دكتور ولا ايه
شذى وهى بتضحك :واضح ان الأهل كلهم كده
انا ابو على برضه كل ما اتكلم معاه يقولى انتى هتعملى عليا دكتورة من وانتى لسه فى الكلية ولا ايه
تامر :انتى بتقوليله يا ابو على واضح انكم صحاب
شذى :اه جدا بابا ده اعز اصحابى
تامر :لما شوفت موبايلك بيرن ومكتوب ابو على وجنبه قلبين لونهم احمر ومخليه رنته اغنية لعبدالحليم قولت ده خطيبك مثلا متوقعتش يكون والدك
شذى :انا كتباه ابو على علشان بقولهاله اغلب الوقت
واغنية عبد الحليم انا مخصصهاله علشان هو بيحبها اوى
بس القلبين الحمر هو اللى حاططهم غصب واقتدار مش انا
انا مبحبش احط ايموجيز ولا قلوب جنب الأسماء
بس هو قالى علشان اكون مميز وهو انا اى حد ولا ايه
تامر وهو بيضحك :والدك لذيذ اوى
شذى :اه جدا مش قادرة اوصفلك
وصلنا الكافيتيريا بعد اذنك يا دكتور
تامر :اتفضلى
شيريهان وهى بتغمز :ايه النظام
شذى وهى بتقعد :نظام ايه
شيريهان :دكتور تامر
شذى :ماله
شيريهان :بيسلم عليكى اوى هو ايه اللى ماله كان عايزك فى ايه
شذى :كان بيسألنى على حاجات سخنة يشربها تهدى القولون
شيماء :نعم يا اختى
شذى :اه والله كان بيسألنى على كده بعد ما كلم بابا ساعة موبايلى ما كان معاه وعرف من بابا انه بيشرب نعناع مغلى بالعسل الأبيض علشان قولونه يهدا
وهو بقى بيشربه بس مكنش بيجيب نتيجة فكان بيسألنى بنعمله ازاى
شيماء :وانا اللى قولت انه بيعطف ويلطف ويتعرف
اتاريه بيعالج قولونه
اسفخس على دى كلية زبالة مش عارفين نطلع منها بمصلحة
شذى وهى بتضحك :وانا بتاعت يعطف ويلطف ويتعرف برضه
كمان مصلحة ايه اللى عايزة تطلعى بيها من كلية علاج طبيعى ده انتى تحمدى ربنا لو طلعتى منها على رجلك اصلا
شيريهان وهى بتضحك :اه والله يا بنتى معاكى حق
بس لما هو الموضوع كده جاى معاكى لحد الكافيتيريا ليه
شذى :مفيش كان جاى يجيب قهوة وسمعكم وانتم بتقولولى هنسبقك على الكافيتيريا فقال يجى معايا
شيماء :وانا اللى كنت خلاص بفكر فى اسماء ولادكم
شيريهان :ومين سمعك انا كنت بفكر هلبس ايه فى خطوبتهم
شذى وهى بتضحك :لا ده انتم حالتكم بقت صعبة الكلية لحست مخكم على الأخر يا عينى
حسن :يعنى انتى المعيد بتاعك كان بيسألك على النعناع المغلى علشان قولون بسلامته بيشد عليه
شذى :ايوه يا ابو على
حسن :وميسألش امه ولا خالته ليه
شذى :معرفش هو سألنى وانا رديت وخلاص وانا هفتحله محضر
يا ابو على بقولك معيد عندى فى الكلية يعنى اعمال السنة فى ايده
حسن :اعمال السنة ولا حتى اعمال سفلية واحنا هنخاف منه ولا ايه
شذى :يا سيدى انا بخاف ده مستقبلى
كمان متقلقش دكتور تامر انسان محترم ومتعداش حدوده بالكلام
حسن :يعنى محصلش غير اللى حكيتيه
شذى :ايوه يا بابا وانا من امتى بكدب عليك
حسن :خلاص ماشى قومى حضرى العشا انا جوعت
شذى :بس كده انت تؤمر يا ابو على من عيونى
حسن :لا يا حلوة من المطبخ
شذى :ليه كده بس حسبى الله ونعم الوكيل
حسن :انتى بتحسبنى على ابوكى يا قليلة الأدب والله عال
شذى :وانا اقدر برضه لا انا بذكر ربنا عادى
انا هروح احضر العشا من المطبخ مش من عيونى
حسن :يكون افضل برضه
بعد شهر
تامر :فهمتى كده يا شيريهان
شيريهان :ايوه يا دكتور معلش خليتك تشرح الجزئية دى تانى بعد ما شرحتها فى السيكشن
بس انا لما جيت اذاكر لقيت انى مش فاهماها
تامر :ولا يهمك اى وقت تقف معاكى او مع اى واحدة فيكم حاجة تقولى اشرحالها
شيماء :شكرا جدا يا دكتور تامر حضرتك مفيش منك
يا ريت كل المعيدين كانو زى حضرتك كده
شذى :حضرتك فعلا من اشطر المعيدين اللى شوفناهم فى الكلية
ربنا يجازيك كل خير عن صبرك على شرحك لينا
تامر :اللهم امين
مش مستاهلة كل ده انا بعمل شغلى مش اكتر
شيريهان :مش الكل بيشتغل بضمير زى حضرتك كده
فى ناس ماشية بمبدأ اقلب واجرى
وناس معيدين لمواد هما حقيقى مش فاهمينها علشان يعرفو يفهموهالنا
واحنا اللى بنلبس فى الأخر
تامر :لا ان شاء الله متلبسوش ولا حاجة
اعملو انتم بس اللى عليكم وربنا مش هيضيع تعبكم
ولو احتاجتم حاجة حتى لو مش فى المادة اللى معايا تعالولى وانا مش هتأخر عليكم
شيماء :تسلم يا رب يا دكتور
تامر :عايزين حاجة تانية واقف معاكم حاجة
شيريهان :لحد دلوقتى لا
تامر :طيب بعد اذنكم
كلهم :اتفضل يا دكتور
تامر بعد ما مشى كام خطوة :شذى معلش ممكن ثانية
شذى وهى رايحة ناحيته :نعم يا دكتور
تامر :اشكريلى والدك كتير على الوصفة بتاعته
بقالى شهر ماشى على الشمر والنعناع وبحليهم بالعسل الأبيض
والدنيا معايا بقت احسن كتير خصوصا انى بقيت بشرب قهوة مرة واحدة بس فى اليوم
شذى :دى حاجة كويسة جدا الف سلامة لحضرتك يا دكتور
تامر :الله يسلمك بعد اذنك
شذى :اتفضل يا دكتور
شيماء :ابوس ايدك قوليلى انه كان بيعطف ويلطف ويتعرف المرة دى
شذى وهى بتضحك :هيعمل كل ده فى دقيقة وقفتها معاه قدامكم
كمان انتى ناسية انى سخصية صعبة المنال ولا ايه
شيريهان :اومال كان بيقولك ايه يا اللى سخصيتك صعبة المنال
شذى :كان بيشكر بابا علشان وصفات الأعشاب بتاعته خلت قولونه بقى احسن
شيماء :يا شيخة تباً لقولونه وللكلية الزبالة اللى عبارة عن صخرة بتتحطم عليها احلامنا العلمية والعاطفية دى
شذى :بصى هى الكلية تستاهل الشتيمة مش هقولك حاجة
بس دكتور تامر دكتور محترم وزوق ليه تشتميه
شيماء :انا مبشتموش انا بشتم قولونه متقولينيش كلام مقولتوش لو سمحتى
شيريهان :خلاص فككم من الحوار ده وتعالو نروح نجيب حاجة ناكلها من الكافيتيريا قبل المحاضرة الجاية
بعد تلت اسابيع
شذى بخضة :بابا…بابا فى ايه رد عليا…بابااااااا…اعمل ايه دلوقتى انا هطلع لعمى ياسر
ياسر :مالك يا شذى وشك مخطوف كده ليه
شذى :الحقنى يا عمى بابا…بابا مرمى على الأرض قاطع النفس ومش بيرد عليا خالص
ياسر :جراله ايه
شذى :معرفش معرفش انا رجعت من الكلية لقيته واقع فى الأرض
ابوس ايدك اعمل حاجة والحقه بسرعة
ياسر :اهدى طيب انا هكلم الإسعاف
شذى :لا الإسعاف ممكن تتأخر
معلش ممكن ناخده فى عربية حضرتك نوديه المستشفى
ياسر :معاكى حق دى فكرة احسن
لحظة واحدة هجيب مفاتيح العربية وهنده على صالح وإيهاب يشيلوه ينزلوه عربيتى
بعد ساعتين
احمد :متقلقوش يا جماعة هو كان دخل فى غيبوبة سكر لأن مستوى السكر كان ارتفع جدا فى دمه
بس خلاص احنا سيطرنا على الوضع
شذى :اومال هو مبيفوقش ليه يا دكتور
احمد :هياخد وقت على ما يفوق ممكن يفوق كمان كام ساعة وممكن يفوق بكرة او بعد بكرة بالكتير ان شاء الله ميطولش عن كده
كويس انكم لحقته وجيبتوه بسرعة الوضع كان هيبقى اخطر بكتير لو كنتم اتأخرتم
شذى :طيب انا ممكن ادخله
احمد :ممكن بس يا ريت متطوليش
شذى :حاضر
شذى وهى بتعيط :كده برضه يا بابا عايز تسيبنى
انت مش عارف انى مليش غيرك فى الدنيا دى
انت مش قولتلى انك بعد موت ماما فضلت عايش علشانى ولولا وجودى كنت حصلتها
طيب انا مليش غيرك لو روحت منى هموت وراك والله
انا معنديش حد غيرك اعيش علشانه واعيش معاه
بابا اوعى تموت وتسيبنى لوحدى انا مقدرش اعيش من غيرك
مش هعرف اعمل اى حاجة فى حياتى من غيرك
ولا هعرف اتخرج من الكلية ولا هعرف اشتغل ولا هعرف احب ولا اتجوز ولا اخلف
بابا انا عايزاك معايا فى كل ده بالله عليك اوعى تسيبنى
قوم يا بابا قوم علشان تحضر معايا حفلة التخرج
وتجوزنى وتربى معايا ولادى قوم علشان تعلمنى اربيهم ازاى
والله ما هعرف اربيهم من غيرك
متسيبنيش لوحدى وحياة اغلى حاجة عندك ما تسيبنى لوحدى هموت وراك والله لو عملتها
بابا ارجعلى بسرعة انا خايفة اوى قلبى هيقف من خوفى عليك
طيب قوم وانا مش هتضايق من قلشك عليا ولا تهزيقك ليا ولا هقولك بطل تعمل فيا مقالب
وعارف كمان هبطل احرق لسان العصفور وانا بحمره
هعملك كل اللى انت عايزه بس قوم…بابا قوم علشان خاطرى قوم علشان اقولك انى بحبك بقالى كتير مقولتلكش انى بحبك وانك اغلى حد فى حياتى انت ابويا وامى واخويا وصاحبى انت كل حاجة ليا فى الدنيا والله…ابو على انا خايفة ومليش غيرك يطمنى فوق بقى انا خايفة اوى
بعد يومين
احمد :هو الحمد لله فاق هيفضل هنا بس يوم او يومين بالكتير تحت الملاحظة
شذى :خليهم تلت ايام او حتى اسبوع يا دكتور احنا مش هنخرج من هنا غير واحنا مطمنين عليه
بالليل
حسن :اخواتى كلهم جم النهاردة حتى فيروز جت من دمياط على ملا وشها يا عينى اول ما عرفت
واخوالك وخالاتك كمان جم
على قد ما انا مضايق انهم اتخضو عليا بس مبسوط اننا اتجمعنا بقالنا كتير اوى متجمعناش
شذى :انت مرتاح ولا احطلك مخدة كمان ورا ضهرك
حسن :لا انا مرتاح كده
الحاج ياسر كمان جه الراجل ده مفيش زيه ونعم الجار بجد
من يوم اللى حصلى وهو مسبناش مش عارف هردله جميله ده ازاى
شذى :اجيبلك تشرب
حسن :لا
شذى :اطفى النور هتنام
حسن :انتى هتفضلى مخصمانى كده كتير
انا ابوكى مينفعش تخاصمينى حرام
شذى :انا مش مخصماك ما انا بتكلم معاك اهو
حسن :وهو اللى بتقوليه ده اسمه بتكلم معاك
من ساعة ما فوقت وانتى لاويالى بوزك وكلامك معايا بالقطارة
بدل ما تعيطى من الفرحة وتقولى حمدلله على سلامتك يا ابو على وحشتنى اوى
شذى :ده على اساس انك راجع من السعودية علشان كنت بتعمل عمرة
بابا انت دخلت فى غيبوبة سكر علشان كلت نص صينية بسبوسة بالقشطة لوحدك
ليه تاكل نص صينية لوحدك
وليه تاكلها وانا مش معاك فى البيت
انا لو كنت اتأخرت شوية كان ممكن ملحكقش كان ممكن تروح منى انت كمان
كان هيرضيك تسيبنى لوحدى
تستاهل يعنى البسبوسة بالقشطة انك تسيبنى وتسيب الدنيا كلها علشانها
هى اغلى عندك منى
حسن :انا معنديش اغلى منك فى الدنيا وانتى عارفة
وبعدين انتى عرفتى منين
شذى :لما روحت البيت علشان اجيبلك غيارات علشان تلبسهم وانت هنا دخلت المطبخ اشرب شوفت نص الصينية اللى فاضل وفهمت ايه اللى حصل
انت كلت نص الصينية لوحدك وقولت هتاخد حقنة انسولين بعدها بس ملحقتش ودخلت فى الغيبوبة
حسن :صح ده اكنك كنتى معايا فى البيت
هو ده اللى حصل بالظبط
شذى :ليه عملت كده وانت لوحدك فى البيت يا بابا
حرام عليك والله اللى بتعمله فيا ده
حسن :ما انا عارف انك مكنتيش هترضى اكل كل ده لو كنتى معايا
كلت نصها وسيبتلك النص التانى
وقولت هاخد حقنة الأنسولين مش عارف حصل ايه ملحقتش اخدها المرة دى
شذى بصدمة :المرة دى…ليه هو انت بتعمل كده كتير بتستغل انى برا البيت وتاكل حلويات يا بابا
حسن :مش كتير اوى يعنى هما كام مرة تفاريحى كده
شذى بانفعال :تفاريحى… حرام عليك والله حرام عليك انت بتعمل فيا كده ليه
انت عارف انا حسيت بإيه لما دخلت شوفتك واقع فى الأرض قلبى كان هيقف من الخوف عليك مكنتش عارفة اعمل ايه
جريت على عمى ياسر يلحقك علشان انا عقلى كان واقف زى قلبى ما كان هيقف من الخضة
وانت بتقولى تفاريحى بتخاطر بحياتك وحياتى معاها وتقولى تفاريحى
حسن بندم :والله ما كنت اعرف ان ده كله هيحصل
شذى وهى بتعيط :انا مليش غيرك انت عارف كده ولا لا
انا من غيرك اموت معرفش اعمل حاجة واحدة فى حياتى
ابوس ايدك يا بابا ابوس رجلك ما تعمل كده تانى
انت مش من حقك تعمل كده حياتك مش بتاعتك لوحدك علشان تعمل فيها كده حياتك دى بتاعتنا احنا الإتنين
مش من حقك تسيبنى زى ما ماما سابتنى هى سابتنى غصب عنها امر الله
انما انت كده بتسيبنى بمزاجك يا بابا
حسن :قربى منى طيب
شذى :لا مش هقرب واوعدنى انك مش هتعمل كده تانى
حسن :هتقربى ولا اقوم انا اجيلك
شذى وهى بتقرب منه :لا خليك هاجيلك انا
حسن :اقعدى…قولت اقعدى
شذى وهى بتقعد جنبه على السرير :ادينى قعدت
حسن وهو بيحضنها وبيطبطب عليها :حقك عليا انا مكنش قصدى اخليكى تعيشى كل الخوف ده عليا
شذى وهى بتعيط اكتر :مكنش خوف يا بابا كان رعب
والله لو كان جرالك حاجة لكنت هحصلك
متعملش كده تانى وحياة اغلى حاجة عندك ما تعمل كده تانى
حسن :وحياة اغلى حاجة عندى اللى هى انتى لأنى معنديش اغلى منك ما هعمل كده تانى
شذى :يعنى مفيش بسبوسة بالقشطة تانى
حسن :مش هاكل نص صينية لوحدى تانى ماشى
شذى :ولا نص ولا ربع مفيش بسبوسة بالقشطة تانى يا بابا
حسن :طيب ينفع بسبوسة سادة من غير قشطة
شذى :ولا سادة ولا بالمكسرات مفيش بسبوسة تانى مفيش حلويات تانى هتدخل البيت وانا نفسى مش هاكل حلويات فى البيت هعتبر نفسى عاملة ريجيم
حسن :بس انتى عارفة انى بحب البسبوسة
شذى :بتحبنى انا اكتر ولا البسبوسة يا بابا
حسن :ده سؤال الب…
شذى وهى بتقاطعه :بابا
حسن :انتى طبعا يا حبيبة ابوكى وانا عندى اغلى منك
خلاص مفيش حلويات تانى وامرى لله
شذى :شكرا
حسن :انتى عملتى ايه فى البسبوسة اللى كانت فاضلة
شذى :بابا احنا كنا لسه بنقول ايه ده انت لسه فايق من الغيبوبة من كام ساعة مكملتش يوم فايق
حسن :انا كان قصدى اطمن انك حطيتيها فى التلاجة لتبوظ حرام انا كنت جايبها غالية
شذى :متقلقش حطيتها فى التلاجة ولما ارجع هطلعها لعمى ياسر جارنا علشان اشكره على اللى عمله معانا
حسن :دى الأصول برضه الف هنا على قلبه…بس هو الحاج ياسر معندوش السكر
شذى :معرفش يا بابا ملناش دعوة
حسن :خلاص ملناش دعوة ملناش دعوة…انا هخرج من هنا امتى
شذى :لما الدكاترة يطمنونى عليك ولحد ما ده يحصل هنفضل عايشين فى المستشفى
حسن :على ايه كل ده مكنش نص صينية بسبوسة كلته اومال لو كنت كلت الصينية كلها كنتم عملتو فيا ايه
شذى :اهو ده اللى كان ناقص افضل خوفنى بكلامك كده
يا بابا لحد ما ارقد على السرير اللى جنبك
حسن :بعد الشر عليكى
كمان فى ايه من بعد ما فوقت وانتى بتقوليلى يا بابا ليه
شذى :علشان اصحى ضميرك واحسسك بالذنب وافكرك انك ابويا اللى مليش غيره فى الدنيا
حسن :خلاص تمت المهمة بنجاح بطلى تقولى يا بابا وقوليلى يا ابو على انتى عارفة انى بحب ابو على منك اكتر
شذى وهى بتضحك :علشان ماما عبير حبك الأول والأخير كانت بتقولهالك صح
حسن :صح طبعا
شذى :ما تحكيلى حكايتكم تانى
حسن :تانى ايه قولى للمرة الميتين الف
شذى :ماشى احكيهالى للمرة الميتين الف انا بحب اسمعها منك
حسن :ماشى بصى يا ستى انا وصبرى ابن عم امك كنا اصحاب
مفيدة اخت صبرى كان يوم عزالها فانا وبقية صحاب صبرى روحنا علشان ننزل العزال بتاعها فى العربيات اللى هتوديه شقة جوزها
وهناك شوفت عبير لأول مرة
وردة حلوة مفتحة وريحتها مسك وعنبر عبير وهى عبير فعلا
خطفت عينى وقلبى من اول ما شوفتها
هى بقى كانت سامعة اصحابى بيقولولى يا ابو على فكانت مفكرة انى متجوز وعندى ولد اسمه على
طبعا انا وضحتلها انى مش متجوز ولا حاجة
واتقدمتلها واتجوزنا واتفقنا لو خلفنا ولد نسميه على
بس ربنا مأرادش نخلف غير بعد ما اتجوزنا بتمنتاشر سنة
علشان انا كان عندى مشاكل تمنعنى من الخلفة
ورغم انى قولت لعبير كتير انها ملهاش ذنب تتحرم انها تبقى ام علشانى
كنت بقولها كده وانا قلبى بيتحرق ومرعوب توافق
بس برضه كنت مستحرم اضيع عليها فرصة انها تبقى ام وخايف يعدى بيها العمر وهى معايا من غير خلفة وتندم
وستك هنية بالذات كانت بتكلمها فى الموضوع ده كتير اوى
وابوها واخواتها واصحابها كمان
كلنا كنا بنقولها ان حقها تطلق
وهى مكنتش بتقول غير مش عايزاه الحق ده انا راضية باللى ربنا كتبهولنا
وبعد اكتر من تمنتاشر سنة صبر ربنا كرمنا بيكى وسميتك شذى علشان معناه الرائحة العطرة زى معنى اسم عبير
وبعد ما خلفناكى بخمس سنين وتمن شهور ربنا استرد امانته وسابتنا عبير
بعد موتها انا فضلت فى شقتنا لوحدى مبخرجش منها ومباكلش تقريبا ونايم طول الوقت
لحد ما فى يوم عمتك نادية جابتك ليا اصلك كنتى معاها هى وعيالها
جابتك وقالتلى بنتك لا راضية تاكل ولا تلعب مع العيال ومش مبطلة سؤال عليك انت وعبير
فوق لنفسك يا حسن وراعى البت اللى مبقاش ليها غيرك دى
عبير سايبهالك امانة وهتسألك عليها لما تشوفك
هتضيع امانة عبير ليك يا حسن
هتضيع البت اللى ربنا كرمكم بيها بعد تمنتاشر سنة جواز
هى مشيت وانا لقيتك جاية تقعدى جنبى وبتقوليلى
ابو على هى ماما جاية امتى انا جعانة اوى
ومعرفتش اكل عند عمتو نادية علشان اكلها طعمه وحش اكل ماما احلى
هى هتيجى امتى من السفر عمتو قالتلى انها مسافرة
هى مخدتناش معاها ليه
ساعتها انا عيطت وحضنتك وقولتلك انها مش هينفع تجيلنا احنا اللى وقت ما ربنا يريد هنروحلها
وقومت اعملك اكل علشان تاكلى وكلت معاكى علشان مرضيتيش تاكلى لوحدك
ومن يومها وانا مليش غيرك
كل اللى حواليا فضلو يزنو عليا اتجوز بعد عبير
قالولى انت وبنتك محتاجين زوجة وام حتى ستك هنية كانت بتقولى انا يعز عليا تتجوز بعد بنتى بس ده حلال ربنا وبيتك محتاج ست علشانك وعلشان شذى
وانا مكنتش بقول غير رد واحد انا وبنتى مش محتاجين حد احنا مع بعض ومش محتاجين اكتر من كده
حتى فاكر لما قولت كده لستك هنية حضنتنى وقالتلى انا دلوقتى بس عرفت عبير كانت بتحبك اوى كده ليه
علشان انت بتحبها وتستاهل انها تضحى بأنها تكون ام علشان تفضل معاك
وبس بقى من ساعتها وانا وانتى ملناش الا بعض
ايه ده انتى نمتى هو انا بحكيلك حدوتة قبل النوم شذى…شذى
شذى بصوت نايم :بابا سيبنى انام انا منمتش بقالى يومين
حسن :قومى يا حبيبتى نامى على السرير واتغطى كويس
شذى وهى بتقوم تنام على السرير :تصبح على خير يا ابو على
حسن :وانتى من اهله يا روح ابو على
بعد عشر ايام
شيريهان : دكتور تامر اخبار درجاتنا فى الميدتيرم ايه
تامر :الدرجات وحشة اوى
شذى انتى اجاباتك كلها ناقصة وكتير منها غلط
لو فى حاجات مش فاهماها مقولتيش ليه اشرحهالك تانى
شذى :لا يا دكتور مش كده
انا بس بابا كان تعبان وفى المستشفى فانا ملحقتش اذاكر كويس لإمتحان الميدتيرم
هى درجتى وحشة اوى امرى لله هحاول اعوض فى الفاينال
تامر :انا هحاول اعيد امتحان الميدتيرم تانى لأى حد عايز يحسن درجته تلت اربع الدفعة جايبين اقل من نص الدرجة
وفى ناس مش جايبين حتى ربع الدرجة
فانا كلمت الدكتور سليم فى اننا نعيده تانى ولو وافق هخليكم تمتحنو تانى بإذن الله
متقولوش حاجة لبقية زمايلكم لو دكتور سليم رد عليا بالموافقة انا هقول للدفعة كلها بنفسى
شيريهان :بجد مش عارفين نشكر حضرتك ازاى يا دكتور
شيماء :ميرسى جدا يا دكتور تامر حضرتك بجد عملة نادرة فى الزمن ده
شذى :حتى لو دكتور سليم موافقش شكرا يا دكتور علشان حضرتك دايما واقف جنبنا
ربنا يجازيك عنا كل خير
بعد تلت شهور
تامر :شذى…شذى
شذى وهى بتقف :ايوه يا دكتور تامر
تامر :اومال شيماء وشيريهان فين محضروش السيكشن النهاردة ليه
شذى :شيريهان خطوبة اختها النهاردة وعلشان كده مش هتيجى
وشيماء راحت عليها نومة وفاتتها اول محاضرة فكسلت تيجى تحضر باقى اليوم
خير حضرتك عايزهم فى حاجة
تامر :لا انا عايزك انتى
شذى باستغراب :نعم…قصدى يعنى حضرتك عايزنى فى ايه
تامر :عايز اجى اشرب نعناع بالعسل الأبيض عندكم فى البيت…احم احم شكلك مش فهمانى عايز اجى اقابل والدك
شذى :ليه
تامر :ها…ايه السؤال ده…هيكون ليه يعنى
عايز اتقدملك يا شذى فهمتى ولا محتاج اوضح اكتر من كده
شذى :لا فهمت…طيب يعنى انا…انا هقول لبابا وبعدين هرد على حضرتك يا دكتور
تامر :حضرتى ودكتور ربنا يستر…ماشى قوليله وردى عليا
شذى :بعد اذنك
تامر :اتفضلى
حسن :نعم سمعينى كده تانى عايز يتقدملك يعنى ايه
شذى :يعنى عايز يطلب ايدى يا ابو على
حسن :عايز ايدك يعمل بيها ايه ان شاء الله هيبوسها ويحطها جنب الحيط
شذى :معتقدش انه بعد ما يبوسها هيحطها جنب الحيط
حسن :انتى بتقولى ايه يا قليلة الأدب يا اللى شكلى معرفتش اربيكى انتى
شذى :بهزر يا ابو على ايه مبتهزرش
حسن :لا مبهزرش فى المواضيع دى انا
انتى فى حاجة بينك وبين الواد ده
شذى :حاجة ايه بس اللى هتكون بينى وبين المعيد بتاعى يا بابا
مفيش بينا تعامل اكتر من انه معيد وانا طالبة
حسن :اومال هو عايز يتقدملك ليه
شذى :معرفش مسألتوش
هو بعد ما خلصنا السيكشن خرج ورايا ونده عليا
وقالى انه عايز يشرب معاك نعناع بالعسل الأبيض
حسن :مبشربش نعناع انا مع ناس معرفهاش
وبعدين هو مش كان معيد عليكى فى مادة نجحتى فيها الترم اللى فات وخلصنا منه الحوار ده
شذى :اه بس هو بيدينى مادة تانية الترم ده
حسن :انتى موافقة عليه
شذى :معرفش انا متكلمتش معاه علشان اخد قرار
حسن :انتى عايزة تقعدى معاه
شذى :مش عارفة بس هو انسان كويس مشوفتش عليه
ولا سمعت عنه اى حاجة وحشة فى الجامعة
حسن :عادى ممكن يكون عامل فيها محترم جوا الجامعة
وهو صايع وضايع برا الجامعة
شذى :ممكن كل حاجة واردة فى الدنيا
بس انا بيتهيألى انه فعلا انسان كويس
حسن :يعنى انتى هتزعلى منى لو رفضته
شذى :لا طبعا يا حبيبى انا مش ممكن ازعل منك ابدا
بس انا كده ممكن اشيل المادة لو شيلنى اعمال السنة
مش هدخل امتحنها فاينال
حسن :مش مشكلة امتحنيها فى الصيف
شذى :طيب وعلى ايه يا بابا ما تشوفه
انا حاسة انك لو شوفته هتوافق عليه
حسن :بت انا مش مطمنلك وحاسس انك موافقة عليه
شذى :لا والله لسه مش موافقة ولا حاجة ومش ممكن اوافق قبلك
حسن :خلاص خليه يجى يوم الجمعة الساعة سبعة ونص
شذى :ماشى هقوله
تانى يوم
حسن :اهله ايه اللى عايز يجيبهم هو جاى يقرأ فاتحة
دى مجرد قاعدة تعارف وان شاء الله ميعجبناش ونرفضه
لا قوليله يجى فردانى بطوله لوحده
شذى :كل ده توكيد خلاص يا ابو على هقوله يجى فردانى بطوله لوحده
بس والنبى واحدة واحدة عليه علشان انا حاسة انك هتعمل زى عادل امام فى فيلم عريس من جهة امنية وهتقوله انك عايز ترابيزة السفرة من اسبانيا والكراسى بتاعتها من ايطاليا وطبق الفاكهة اللى هنحطه فوقها من المانيا وفى الأخر تقول بوظتى الجوازة يا انشراح ادى الجوازة باظت يا انشراح
حسن :انشراح مين هو امه اسمها انشراح عايزة تتجوزى واحد امه اسمها انشراح افرضى قال عايز يسمى بنتكم على اسم امه
ابقى انا مسميكى شذى وانتى تسمى بنتك انشراح
لا انا مش ممكن اوافق على الجوازة دى
شذى وهى بتضحك :يا بابا انشراح ده اسم البطلة فى الفيلم
انما انا معرفش اسم مامته هعرفه منين بس هو انا ليا كلام معاه
حسن :ايوه كده حسسينى انى عرفت اربى
خلاص قوليله يجى لوحده علشان نتعرف عليه ولو لا قدر الله وافقنا عليه يبقى يجى بأهله المرة اللى بعدها
شذى :ماشى هقوله
يوم الجمعة
تامر بابتسامة :والله فرصة سعيدة جدا انى اتعرفت على حضرتك يا عمى
حسن :هنشوف…هنشوف اذا كانت سعيدة ولا لا
تامر :طيب حضرتك عرفت سنى وانا شغال فين مش عايز تعرف عنى حاجة تانية
حسن :ليه انت مخبى حاجة ولا ايه
تامر :لا خالص انا قصدى لو حضرتك عايز تسألنى عن حاجة معينة
انا هجيب لشذى شبكة ب…
حسن قاطعه :ميهمنيش هتجيبلها شبكة بكام
الشبكة دى هدية منك ليها وانا مش هحكم عليك تهاديها بإيه اللى تقدر عليه هاته
انت عندك شقة
تامر :اه الحمد لله
حسن :فين
تامر :فى العبور
حسن بانفعال :نعم يا حبيبى فين…فى العبور عايز تنفيلى بنتى الوحيدة فى العبور
لا انا بنتى متتجوزش بعيد عنى
تامر بتوتر :طيب…خلاص انا…انا ممكن أاجر شقى قريب من حضرتك
حسن :الشقة اللى جنب شقتى دى انا وعبير بورثى من ابويا وبفلوس كنا محوشينها اشتريناها علشان شذى تتجوز جنبنا فيها وانا بعد ما تمت واحد وعشرين سنة كتبتها باسمها
عيشو فيها جنبى
تامر :انا اسف يا عمى بس مش هينفع
حسن :وانا بقولك تعالو عيشو معايا ده انا بقولك هتعيشو لوحدكم فى شقتكم
تامر :مسمهاش شقتنا يا عمى
اسمها شقة شذى وانا مقبلش اعيش فى شقة مراتى
حسن :خسارة
تامر :خسارة ليه بس احنا نأجر هنا وان شاء الله ربنا يكرمنى واشترى هنا
حسن :خسارة علشان ده كان اختبار ليك وللأسف انت نجحت فيه
وطلعت راجل بجد كنت هرفضك فورا لو كنت وافقت
تامر :يعنى حضرتك موافق نعيش فى ايجار
حسن :لا بيع شقتك اللى فى العبور واشترى شقة شذى بفلوسها
تامر :فلوس شقة العبور يدوب تبقى نص تمن شقة هنا
حسن :هبيعهالك بالسعر اللى اشتريناها بيه انا وعبير زمان
تامر :لا يا عمى مينفعش
حسن :لا ينفع البيع عرض وطلب انت عرضت وانا وافقت
تامر :انا معرضتش حضرتك اللى عرضت
حسن :ماشى انا اللى عرضت وانا اللى وافقت يبقى خلاص
قولت ايه
تامر :برضه مينفعش
حسن :هو اللى حقيقى مينفعش انك تبعد بنتى الوحيدة عنى
كده انت اللى عايز تبوظ الجوازة خلى بالك
تامر :طيب انا ممكن ادفع لحضرتك فلوس شقة العبور وفلوس تانية انا شايلها على جنب
واللى هيفضل من سعر الشقة هكتبلك بيه وصولات امانة
حسن :انت عايزنى اكتب واحد هجوزه بنتى وصولات امانة
يعنى انا هأمنك على اغلى حاجة عندى مفكرنى هخونك فى فلوس
تامر :مش فكرة تخوين يا عمى بس ده حق
والحق ميزعلش حد
حسن :انت مصعبها عليا مش لاقى فيك عيب ارفضك علشانه
تامر بتوتر :طيب وحضرتك ترفضنى ليه بس…انا والله شارى شذى جدا
حسن :ليه اشمعنى بنتى
تامر :علشان هى محترمة ومؤدبه ومجتهدة وعلى خلق ودين
حسن :الجامعة مليانة بنات زيها واحسن منها
تامر :مفيش واحدة احسن من شذى فى الدنيا كلها
حسن :احترم نفسك انت بتتكلم معايا عن بنتى
تامر :انا اسف
حسن :ايه اللى فى بنتى وملقيتوش فى غيرها مع انى عارف ان تعاملها معاك فى حدود انك معيد وهى طالبة
تامر :مش عارف اقولك ايه
حسن :قول اللى جواك
تامر :هى شذى فيها حاجة مميزة حاجة مشوفتهاش فى اى بنت تانية مش عارف ايه هى بس حاجة…حاجة فى روحها كده حاجة تخليك…تخليك
حسن :تخليك تتشدلها اول ما تشوفها
تامر :تتشدلها لما تاخد بالك منها وتشوفها بجد
انا مخدتش بالى منها غير بعد موقف الموبايل بتاعها
من ساعتها وانا خدت بالى منها وبقيت شايفها كويس ومركز معاها غصب عنى
واحدة واحدة مبقتش قادر مركزش معاها
بستنى السكاشن اللى هشوفها فيها بفارغ الصبر
بفرح بالكلام اللى بيجمعنا مع ان كله كلام فى الدراسة
واحدة واحدة لقتنى…
حسن قاطعه :بتتخطف
تامر :بالظبط
حسن :ايه اللى انت بتقولهولى ده مش تراعى انى ابوها
تامر بتوتر :ما انت اللى…قصدى مش حضرتك اللى قولتلى عبر عن اللى جواك
حسن :وانا قبلها مش قولتلك احترم نفسك
شذى وهى بتدخل عليهم :ملقتش شاى جيبتلكم شربات
حسن :هو انا مش قولتلك لما اندهلك تجيبى الشاى وتيجى
وشربات ايه اللى جايباه ده أن شاء الله
شذى :انا بهزر ده عصير فراولة يا بابا
وبعدين بقالى كتير مستنياك تندهلى وانت اتأخرت عليا فكرتك نستنى
هو مش الموضوع يخصنى برضه ولا ايه
حسن :خلاص خليكى قاعدة
زى ما قولتلك هتشترى منى الشقة اللى جنبى تعيشو فيها وماشى اكتبلى وصولات بباقى تمنها
بس ده هيحصل قبل الفرح بكام شهر مش دلوقتى خالص لسه بدرى
احنا ممكن نقرء فاتحة بس لحد ما الشهرين تلاتة اللى فاضلينلها السنة دى يخلصو وبعد كده تتخطبو سنة لحد ما تخلص الإمتياز
ولا قليل سنة ممكن اربع خمس سنين
شذى :بابا
حسن :خلاص تتخبطو تلت اربع سنين
شذى :بابا
حسن :طيب تتخطبو سنتين تلاتة ولا حاجة
شذى :بابا
حسن :ايه ابعت اجيب المأذون يجوزكم ويخدك معاه وهو مروح هو ايه اللى بابا بابا بابا جتك بو
شذى :انا رأيى يعنى ده بعد اذنك وبعد موافقة حضرتك طبعا
سنة او سنة ونص خطوبة بالكتير هيكون كويس اوى
تامر :ليه ما كفاية ست شهور خطوبة ونتجوز وانتى فى نص الإمتياز
حسن :لا طبعا ست شهور قليل اوى
خلاص سنة ونص خطوبة يعنى سنة الامتياز وست شهور بعدها
تامر :بس ده كتير اوى يا عمى
حسن :والله ده اللى عندى مش عاجبك انت حر شوفلك عروسة فى بيت تانى
تامر :خلاص زى ما حضرتك تحب
حسن :ممكن تيجى انت واهلك يوم الجمعة الجاية علشان نتفق على بقية اتفاقات الجواز ونقرء الفاتحة
بس لحد ما تخلص السنة دى انت زى ما انت فى الكلية معيد وهى طالبة عندك
ولا تتكلم معاها فى الكلية ولا تخرج معاها ولا اى حاجة فى الكلام الفاضى ده لحد ما تتخطبو بعد ما تخلص السنة دى
تامر :ماشى هبقى اجيلها هنا
حسن :ماشى بس مش كتير مش عايزك تشغلها عن المذاكرة
وممكن تبقى تكلمها فى الموبايل بس برضه من غير ما تشغلها عن مذاكرتها
عايزك تعرف انك لو خالفت اى حاجة من اللى اتفقنا عليهم دول
او لو تقديرها الترم ده قل عن تقديرها الترم اللى فات
هقولك انا غفلتك وبدل ما اقرء الفاتحة قريت الكوثر
وهعتبر انه مفيش فاتحة اتقرت ولا اى حاجة خالص
وانا بنتى عندى وانت ربنا يوفقك مع واحدة غيرها
تامر :لا ان شاء الله مفيش حاجة من ده هتحصل
حضرتك عندك اى طلبات تانية
حسن :لا…اشربو العصير وانا هقوم اشرب العصير بتاعى قدامكم هنا وانا بتفرج على التلفزيون
تامر :ماشى يا عمى اتفضل
والدك موتر جدا موتر ومربك كمان
انا حاسس انه مش طايقنى
شذى :لا لو مش طايقك مكنش وافق تجيب اهلك الاسبوع الجاى علشان نقرء الفاتحة
ومكنش سابنا وقام دلوقتى
وبعدين مش كنت بتقول عليه لذيذ
تامر :كان لذيذ فى الموبايل انما فى الحقيقة يخوف ويوتر بجد
شذى :لما ياخد عليك ويحبك تعامله معاك هيبقى احسن من كده كتير
هيفك وهيتعامل معاك عادى بطبيعته
وهو طبيعته صدقنى جميلة
هتلاقيه متفهم وعاقل ودمه خفيف وروحه وقلبه شباب كده كأنه من سنك
هيتعامل معاك على انكم اصحاب ده لو حبك
تامر :طيب ولو محبنيش
شذى وهى بتضحك :لا دى حدوتة تخوف بلاش احكيهالك
تامر وهو بيضحك :يبقى يا رب يحبنى
شذى بابتسامة :يا رب
تامر بسعادة :ويا رب بنته كمان تحبنى
شذى بابتسامة :برضه يا رب
تامر :يعنى فى امل
شذى وهى بتضحك :امل وعمر كمان
طول ما انت عايش يبقى فى امل
فى امل دايما
امل ان بكرة يبقى احسن من النهاردة
وامل ان اللى معرفناش نحققه النهاردة نعرف نحققه بكرة
وامل ان اللى ضاع مننا النهاردة ربنا هيعوضنا بأحسن منه بكرة
امل فى ربنا وفى نفسنا وفى الحياة
امل مخلينا بنقول لنفسنا وقت الحزن والفشل والوحدة
لا دى مش النهاية لسه فى حاجات تانية حلوة هتحصل
لولا الأمل كنا استسلمنا لكل احساس وحش حاسين بيه
علشان ماما كانت بتحب بابا وكان املها بربنا كبير ربنا رزقهم بيا لأنها رضيت وكان املها فى كرم ربنا كبير
ولولا الأمل كان بابا مات بعد ماما بس انا كنت الأمل بتاعه هو عاش علشانى وعلشان كده موت ماما مكنش النهاية
بعد العسر فى يسر ده وعد ربنا لينا فى سورة الشرح
” ان مع العسر يسرا “
لازم لما تحصلنا حاجة وحشة ونحس بمشاعر صعبة نفتكر وعد ربنا لينا ونخلى عندنا امل فى ربنا وفى اللى جاى
ونقول لسه فيه حاجات حلوة هتحصلنا لا دى مش النهاية💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر