مصطفى :شكرا جدا انك رديتى عليا يا ليالى

انتى الوحيدة فى صحابها اللى ردت عليا

بس ليه طلبتى نتقابل كان ممكن نتكلم فى الموبايل

قمر الليالى :ها اصلى يعنى…بصراحة مكنتش عارفة اقولك ايه فى الموبايل

فقولت نتقابل احسن بس طلع مش احسن ولا حاجة

انا برضه مش عارفة اقولك ايه دلوقتى

مصطفى :متقوليش حاجة انا اللى هقول انا عارف انها مضايقة منى بس والله انا فضلت ورا اهلى لحد ما اقنعتهم انى اخطبها

وخلاص موافقين وهيجو معايا وهخطبها

قمر الليالى :هو بس…يعنى…الحكاية ان ندى…

مصطفى قاطعها :زعلانة منى انا عارف ومفكرة انى كنت بتسلى بيها بس والله انا تعبت اوى على ما اقنعت اهلى وكنت عايز اقولها تحددلى ميعاد مع اهلها

بس هى مرديتش عليا وعملالى بلوك من كل حاجة

وبعت لاصحابلها القريبين كلهم محدش فيهم رد عليا غيرك

شكرا انك رديتى

وانك هتساعدينى اصالحها

قمر الليالى :مبقاش ينفع

مصطفى :انا عارف ان زعلها وحش بس البركة فيكى بقى انتى بنت زيها وهتعرفينى اصالحها ازاى وبرضه كلمتين كويسين منك فى حقى هيخلو الدنيا فل بينا والمياه ترجع لمجاريها

قمر الليالى :صدقنى مبقاش ينفع

مصطفى :هو فى ايه انتى بتقفليها فى وشى ليه

انا عارف انى اتأخرت شوية بس والله انا ما كنت بلعب ولا بتسلى بيها وواخد الموضوع جد بدليل انى اقنعت اهلى اهوه وعلى ما ظبطت امورى كنت محتاج وقت الخطوبة محتاجة فلوس برضه

قمر الليالى :المشكلة مش فيك يا مصطفى المشكلة فى ندى

مصطفى :ليه مالها ندى

قمر الليالى :خطوبتها الخميس الجاى

مصطفى :لا خطوبتها الخميس الجاى ازاى انا لسه متقدمتلهاش لسه هتقدملها انتى بتقولى ايه انتى اكيد فاهمة غلط مينفعش نحدد ميعاد الخطوبة قبل ما اتقدملها

قمر الليالى :والنبى ما تصعبها اكتر من كده عليا

ندى هتتخطب لواحد غيرك يا مصطفى

مصطفى بتوهان :واحد غيرى…طيب وانا…واهلى اللى اقنعتهم…والفلوس…الفلوس اللى جمعتها علشان اخطبها…ندى هتتخطب لواحد غيرى كل ده علشان اتخانقنا وزعلت منى هو كل واحدة تتخانق مع حبيبها تروح تتخطب لواحد غيره

انتى اكيد فاهمة غلط او بتقولى كده علشان تزعلينى زى ما زعلتها

ايوه صح هى اكيد اللى طلبت منك تقوليلى كده علشان تزعلنى زى ما زعلتها او علشان تخلينى اخد خطوة واتقدملها

بس والله خلاص انا هتقدملها ومش هزعلها منى تانى

مش محتاجة تخليكى تكدبى عليا علشان تردهالى

خليها تكلمنى وانا هصالحها ومش هزعلها تانى…انتى ساكتة ومبترديش عليا ليه

قمر الليالى :علشان انا مبكدبش عليك اللى قولتهولك ده هو الحقيقة

مصطفى :حقيقة ازاى يعنى مينفعش دى تكون الحقيقة

ندى كانت لسه بتزن عليا علشان اخطبها ومستناش لما منذر اخويا الكبير يخطب قبلى

ازاى يعنى هتتخطب لواحد غيرى

عرفته امتى وازاى

قمر الليالى :هى قالتلى انها قالتلك ان كل حاجة بينكم انتهت

مصطفى :احنا اتخانقنا وهى قالت كده بس ما هى كل مرة بتقول كده

بس اول مرة تقول كده وتبقى قصداها وتروح تتخطب

طيب هو مين عرفته امتى حبيته امتى

دى لسه قايلالى بحبك ومقدرش اعيش من غيرك من شهر

لحقت فى شهر تحب واحد تانى ومتبقاش قادرة تعيش من غيره

ولا هى كانت بتكدب عليا لما قالتهالى

قمر الليالى :يمكن المرة دى غير كل مرة وانت مش واخد بالك

مصطفى :لا هى نفس خناقة كل مرة اللى اختلف بس انها عملتلى بلوك من كل حاجة وانها هتتخطب

انا المفروض اعمل ايه دلوقتى

انا حاسس انى مش مستوعب اللى هى عملته ومش فاهم هى ليه عملت كده

قمر الليالى :اكيد عندها اسبابها

مصطفى :اللى هى ايه اسبابها دى مقالتهاليش

نهت كل حاجة وراحت تتخطب من غير ما تقولى اى حاجة وكأن مكنش فى بينا حاجة وكأنى مكنتش فى حياتها فى يوم

قمر الليالى :انا مش عارفة اقولك ايه

اجابة اسئلتك مش عندى

انا كان عندى اجابة لسؤال واحد وقولتهالك

مصطفى :معاكى حق اجابة اسئلتى مش عندك واللى عندها الإجابة مبتردش عليا

شكرا يا ليالى انك معملتيش زى بقية صحابها ورديتى عليا

قمر الليالى :العفو على ايه

انا اسفة على اللى قولته كنت اتمنى يكون عندى رد احسن من كده لسؤالك

انا بجد اسفة

مصطفى :بتتأسفى ليه انتى معملتيش حاجة

انا اللى اسف تعبتك معايا وخدت من وقتك كتير

قمر الليالى :لا متقولش كده

دى اقل حاجة اعملها

انا لازم امشى دلوقتى

بعد اذنك

مصطفى :اتفضلى

فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر